Silver Price Crash News: ఈ ఏడాది ఆరంభంలో బంగారాన్ని మించి రాకెట్ వేగంతో దూసుకెళ్లిన వెండి ధర ప్రస్తుతం అంతే వేగంగా కుప్పకూలింది. దాదాపు 10 నెలల క్రితం కిలో వెండి ధర రూ. 4,10,000 గరిష్ఠ స్థాయికి చేరుకోగా, ప్రస్తుతం రూ. 1,60,000 స్థాయికి పడిపోయింది. గత వారం రోజులుగా కొనసాగుతున్న ఈ క్షీణత వల్ల కిలో ధర రూ. 1,48,000 వద్ద ట్రేడవుతోంది. అయితే డాలర్ బలోపేతం, వడ్డీ రేట్ల పెంపు సంకేతాలు, ఈక్విటీల ఒత్తిడి కారణంగా ఈ క్షీణత కనిపిస్తున్నప్పటికీ, దీర్ఘకాలంలో వెండికి గ్రీన్ ఎనర్జీ, ఈవీ రంగాల వల్ల డిమాండ్ బలంగానే ఉంటుందని నిపుణులు విశ్లేషిస్తున్నారు
ధరల పతనానికి గల ముఖ్య కారణాలు..
మార్కెట్ నిపుణుడు ప్రభు తెలిపిన వివరాల ప్రకారం.. ఈ పతనానికి పలు అంతర్జాతీయ, దేశీయ పరిణామాలు కారణమవుతున్నాయి.
డాలర్, బాండ్ ఈల్డ్స్ పెరుగుదల: అంతర్జాతీయంగా డాలర్ బలపడటంతో పాటు బాండ్ ఈల్డ్స్ పెరుగుతుండటంతో లోహాల నుంచి పెట్టుబడులు బాండ్ల వైపు మళ్లుతున్నాయి.
వడ్డీ రేట్ల పెంపు భయాలు: డిసెంబర్ తొలి వారంలో జరిగే రిజర్వ్ బ్యాంక్ ఆఫ్ ఇండియా (RBI), యూఎస్ ఫెడ్ (US Fed) సమావేశాల్లో ద్రవ్యోల్బణాన్ని అదుపు చేయడానికి 25 నుంచి 50 బేసిస్ పాయింట్ల మేర వడ్డీ రేట్లు పెంచే అవకాశాలు ఉన్నాయి. వడ్డీ రేట్లు పెరిగినప్పుడు సాధారణంగా విలువైన లోహాల ధరలు తగ్గుతాయి.
ఈక్విటీ మార్కెట్లు, మార్జిన్ కాల్స్: స్టాక్ మార్కెట్లలో హెడ్జింగ్ ఉపసంహరించుకోవడం, మార్జిన్ లోటును పూడ్చుకునేందుకు కమోడిటీలలో పొజిషన్లను విక్రయించడం కూడా ఒత్తిడికి దారితీసింది.
దీర్ఘకాలిక డిమాండ్ - కొనుగోలుదారులకు సూచన..
ఈవీ (ఎలక్ట్రిక్ వాహనాలు) తయారీకి ప్రతి కారుకు 25 నుంచి 30 కేజీల వెండి అవసరం కావడం, సోలార్, గ్రీన్ ఎనర్జీ రంగాల్లో పారిశ్రామిక వినియోగం స్థిరంగా ఉండటంతో దీర్ఘకాలంలో వెండి ట్రెండ్ బుల్లిష్గానే ఉంటుందని నిపుణులు స్పష్టం చేస్తున్నారు. సెంట్రల్ బ్యాంకులు కూడా తమ నిల్వలను విక్రయించడం లేదు.
సాంకేతికంగా వెండికి రూ. 1,40,000 - రూ. 1,41,000 వద్ద కీలక మద్దతు ఉంది. అది బ్రేక్ అయితే రూ. 1,35,000 - రూ. 1,37,000 వరకు రావొచ్చని, అయితే నేరుగా రూ. లక్ష లేదా రూ. 90,000 కి పడిపోతుందని ఖచ్చితంగా చెప్పలేమని తెలిపారు. అందువల్ల వెండి కొనాలనుకునే వారు ఆర్బీఐ, ఫెడ్ నిర్ణయాలు వెలువడే వరకు (డిసెంబర్ 10వ తేదీ వరకు) వేచి చూడటం మంచిదని సూచించారు.