PPF, సుకన్య సమృద్ధి వడ్డీ రేట్లపై కేంద్రం గుడ్‌న్యూస్.. కొత్త రూల్స్ తెలుసా..!

Small Savings Interest Rates 2026: స్మాల్ సేవింగ్ స్కీమ్స్‌లో ఇన్వెస్ట్ చేస్తున్న వారికి కేంద్ర ప్రభుత్వం గుడ్‌న్యూస్ చెప్పింది. అక్టోబర్-డిసెంబర్ త్రైమాసికానికి వడ్డీ రేట్లను కేంద్రం ప్రకటించింది. ప్రస్తుతం ఉన్న వడ్డీ రేట్లనే కొనసాగిస్తున్నట్లు వెల్లడించింది. అంటే అక్టోబర్ 1 నుంచి డిసెంబర్ 31 వరకు వివిధ చిన్న పొదుపు పథకాలకు వర్తించే వడ్డీ రేట్లు జూలై-సెప్టెంబర్ త్రైమాసికానికి ఉన్న రేట్లే వర్తిస్తాయి. పబ్లిక్ ప్రావిడెంట్ ఫండ్ (PPF), సుకన్య సమృద్ధి యోజన (SSY), నేషనల్ సేవింగ్స్ సర్టిఫికేట్ (NSC) వంటి పథకాల వడ్డీ రేట్లను కేంద్ర ఆర్థిక మంత్రిత్వ శాఖ యథాతథంగా కొనసాగిస్తున్నట్లు తెలిపింది. దీంతో పాటు అక్టోబర్ 1 నుంచి ఖాతాల నిర్వహణకు సంబంధించిన నిబంధనలు కూడా అమల్లోకి వస్తున్నాయని పేర్కొంది.

వివిధ పథకాల వారీగా వడ్డీ రేట్ల వివరాలు ఇలా..

సుకన్య సమృద్ధి యోజన (SSY): 8.2 శాతం
పీపీఎఫ్ (PPF): 7.1 శాతం
సీనియర్ సిటిజన్స్ సేవింగ్స్ స్కీమ్ (SCSS): 8.2 శాతం
నేషనల్ సేవింగ్స్ సర్టిఫికేట్ (NSC): 7.7 శాతం
కిసాన్ వికాస్ పత్ర (KVP): 7.5 శాతం
పోస్టాఫీస్ మంత్లీ ఇన్‌కమ్ స్కీమ్ (POMIS): 7.4 శాతం
పోస్టాఫీస్ సేవింగ్స్ డిపాజిట్: 4.0 శాతం
టైమ్ డిపాజిట్లు (1 నుంచి 5 సంవత్సరాలు): 6.9 నుండి 7.5 శాతం వరకు

నేటి నుంచి అమల్లోకి వచ్చిన రూల్స్ ఇవే..

సుకన్య సమృద్ధి యోజన (SSY): తల్లిదండ్రులు కాకుండా ఇతరులు తెరిచిన ఖాతాలను ఇకపై సహజసిద్ధమైన తల్లిదండ్రులు లేదా చట్టబద్ధమైన సంరక్షకుల పేరిట తప్పనిసరిగా బదిలీ చేయాలి. ఒకే చిన్నారి పేరిట నిబంధనలకు విరుద్ధంగా రెండు కంటే ఎక్కువ ఖాతాలు తెరిచి ఉంటే.. అదనపు ఖాతాలను రద్దు చేస్తారు.

పబ్లిక్ ప్రావిడెంట్ ఫండ్ (PPF): మైనర్ పేరిట తెరిచిన పీపీఎఫ్ ఖాతాకు సంబంధించి.. ఆ చిన్నారికి 18 ఏళ్లు నిండే వరకు పోస్టాఫీస్ సేవింగ్స్ ఖాతా వడ్డీ (ప్రస్తుతం 4%) మాత్రమే లభిస్తుంది. 18 ఏళ్లు దాటిన తర్వాతే పూర్తిస్థాయి పీపీఎఫ్ వడ్డీ వర్తిస్తుంది. ఒకరి పేరిట ఒకటికి మించి పీపీఎఫ్ ఖాతాలు ఉంటే.. రెండో ఖాతాను ప్రైమరీ ఖాతాతో విలీనం చేస్తారు. నిబంధనలకు విరుద్ధంగా అదనంగా కొనసాగించిన ఖాతాలపై వడ్డీ లభించదు.

చిన్న మొత్తాల పొదుపు పథకాల్లోని అవకతవకలను సరిచేసేందుకు కేంద్ర ప్రభుత్వం కొత్త మార్గదర్శకాలను అమలు చేస్తోంది. వడ్డీ రేట్లను స్థిరంగా ఉంచడంతో పెట్టుబడిదారులకు భరోసా లభిస్తుందని ప్రభుత్వం భావిస్తోంది. ప్రతి త్రైమాసికానికి ఒకసారి ఈ వడ్డీ రేట్లను కేంద్రం సమీక్షిస్తుంది. తాజా నిర్ణయంతో పండుగల సీజన్‌లో సురక్షితమైన రాబడులను ఆశించే సామాన్య మదుపరులకు, సీనియర్ సిటిజన్లకు ఉపశమనం లభించింది.