supreme court UPI: యూపీఐ ఛార్జీలపై స్టే‌కు సుప్రీంకోర్టు నిరాకరణ..అక్టోబరు 15 నుంచి ఛార్జీలు అమలు!

Supreme Court On UPI MDR: అక్టోబర్ 15 నుంచి అమల్లోకి రానున్న కొత్త యూపీఐ నిబంధనలను నిలిపివేయాలని కోరుతూ దాఖలైన ప్రజా ప్రయోజన వ్యాజ్యంపై ప్రధాన న్యాయమూర్తి సూర్యకాంత్ నేతృత్వంలోని ధర్మాసనం విచారణ చేపట్టింది. కేంద్ర ప్రభుత్వం తీసుకున్న ఈ నిర్ణయంపై స్టే ఇచ్చేందుకు సర్వోన్నత న్యాయస్థానం స్పష్టంగా స్టే విధించకపోవడంతో.. షెడ్యూల్ ప్రకారమే మోదీ సర్కార్ కొత్త ఛార్జీలను అమలులోకి తీసుకొచ్చేందుకు మార్గం సుగమం అయ్యింది. అయితే ఈ నిర్ణయం వెనుక ఉన్న కారణాలను వివరిస్తూ వివరణాత్మక అఫిడవిట్ సమర్పించాలని కేంద్ర ప్రభుత్వాన్ని, రిజర్వ్ బ్యాంక్ ఆఫ్ ఇండియా, నేషనల్ పేమెంట్స్ కార్పొరేషన్ ఆఫ్ ఇండియా (ఎన్‌పీసీఐ)ని కోర్టు ఆదేశించింది

ఛార్జీల స్వరూపం, మినహాయింపులు.. 
సెప్టెంబర్‌లో కేంద్ర ప్రభుత్వం విడుదల చేసిన నోటిఫికేషన్ ప్రకారం.. వ్యక్తుల నుంచి వ్యాపారులకు జరిగే డిజిటల్ యూపీఐ లావాదేవీలు రూ. 2,000కు మించితే ప్రతి లావాదేవీలపై 0.4 శాతం ఎండీఆర్ వర్తిస్తుంది. రూ. 75,000 లేదా అంతకంటే ఎక్కువ మొత్తం ఉన్న లావాదేవీలకు గరిష్ఠంగా రూ. 300 వరకు మాత్రమే రుసుము వసూలు చేస్తారు. అయితే సాధారణ వినియోగదారులు, చిన్న వ్యాపారులపై భారం పడకుండా పలు మినహాయింపులు కల్పించారు.

వ్యక్తుల మధ్య (P2P) లావాదేవీలు జరిపే వాటిపై ఎలాంటి ఛార్జీలు లేకుండా పూర్తిగా ఉచితంగా ఉంటాయి. అలాగే వ్యాపారులకు చెల్లింపుల్లో రూ. 2,000 లోపు చేసే చెల్లింపులపై ఎలాంటి రుసుము ఉండదు.

అదే విధంగా చిన్న వ్యాపారులు.. యూపీఐ క్యూఆర్ కోడ్‌ల ద్వారా నెలకు రూ.1 లక్ష వరకు చెల్లింపులు స్వీకరించే చిన్న వ్యాపారులకు 'సున్నా-ఎండీఆర్' నిబంధన వర్తిస్తుంది. మరోవైపు ప్రత్యేక సేవలైన అత్యావసర సేవలకు ఫ్లాట్‌గా రూ.5, క్యాపిటల్ మార్కెట్ లావాదేవీలకు 0.02 శాతం చొప్పున తక్కువ ఛార్జీలు వర్తిస్తాయి.

కేంద్ర ప్రభుత్వ వాదన..
విచారణ సందర్భంగా కేంద్ర ప్రభుత్వం తరఫున అదనపు సొలిసిటర్ జనరల్ సుప్రీంకోర్టులో వాదనలు వినిపిస్తూ.. ఈ కొత్త నిబంధనల వల్ల దాదాపు 96 శాతం మర్చంట్ లావాదేవీలపై ఎటువంటి ప్రభావం ఉండదని తెలిపారు. ఇది ప్రభుత్వ ఆదాయం కోసం విధించే పన్ను కాదని, డిజిటల్ పేమెంట్ వ్యవస్థ నిర్వహణలో భాగమైన ఒక సెటిల్‌మెంట్ ఫీజు మాత్రమేనని వివరించారు.

అలాగే ఈ ఛార్జీలను నేరుగా వినియోగదారుల నుంచి వసూలు చేయరని స్పష్టం చేశారు. కేంద్రం సమర్పించే వివరణ పరిశీలించిన పిమ్మట సుప్రీంకోర్టు ఈ అంశంపై తుది నిర్ణయం తీసుకోనుంది.