Janhvi Kapoor Chuttamalle AI: జాన్వీకపూర్ వీడియో చేసిందెవరు? AI టెక్నాలజీ మనిషిలకే ప్రాణాతంకమా?

Janhvi Kapoor Chuttamalle AI Case: టెక్నాలజీ ఎంత వేగంగా విస్తరిస్తుందో, ఆర్టిఫిషియల్ ఇంటెలిజెన్స్ (AI) దుర్వినియోగం కూడా అంతే ప్రమాదకరంగా మారుతోంది. అందుకు ఇటీవలే జరిగిన 'దేవర' సినిమాలోని 'చుట్టమల్లే' సాంగ్ డీప్ ఫేక్ వీడియో బయటకు రావడం ప్రధాన కారణంగా నిలుస్తోంది. యంగ్ టైగర్ ఎన్టీఆర్, జాన్వీ కపూర్ కాంబినేషన్‌లో వచ్చిన ఈ 'చుట్టమల్లే' పాట దేశవ్యాప్తంగా ఎంతో పాపులర్ అయ్యింది. 

అయితే, కొందరు ఆకతాయిలు ఈ పాట ఒరిజినల్ వీడియోను ఆధారంగా చేసుకుని ఏఐ టెక్నాలజీతో మార్ఫింగ్ చేస్తూ జాన్వీ కపూర్‌ను అసభ్యంగా చూపించేలా డీప్ ఫేక్ వీడియోను సృష్టించారు. అంతే కాకుండా ఆ అసభ్యకరమైన వీడియోను సోషల్ మీడియాలో వైరల్ చేశారు. దీంతో విపరీతంగా ఆ వీడియో వైరల్ అయ్యింది.

ఈ ఘటనపై టాలీవుడ్ కథానాయకుడు యంగ్ టైగర్ ఎన్టీఆర్ సామాజిక మాధ్యమం 'ఎక్స్' (X) వేదికగా అత్యంత తీవ్రంగా స్పందించారు. మహిళలను గౌరవించే మన దేశంలో ఏఐ సాంకేతికతను ఇలా దిగజారిన పద్ధతిలో ఉపయోగించడం తీవ్రమైన సిగ్గుచేటైన చర్య అని ఆయన మండిపడ్డారు. ఈ మార్ఫింగ్ వీడియోను క్రియేట్ చేసే వాళ్లే కాకుండా.. దాన్ని షేర్ చేస్తూ ప్రమోట్ చేస్తున్న వారిపై కఠిన చర్యలు తప్పవని హెచ్చరించారు. 

ఇలాంటి డీప్ ఫేక్ వీడియోలను ఎవరూ చూడవద్దని, షేర్ చేయవద్దని, వాటితో ఎంగేజ్ కాకూడదని అభిమానులకు, ప్రజలకు జూనియర్ ఎన్టీఆర్ విజ్ఞప్తి చేశారు. నేడు సినీ ప్రముఖులకు ఎదురైన ఈ సైబర్ ముప్పు, రేపు మన ఇళ్లలోని ఆడపిల్లలకు కూడా ఎదురయ్యే ప్రమాదముందని ఆయన తీవ్రంగా హెచ్చరించారు.

ఎన్టీఆర్ ఆందోళనకు మద్దతుగా మెగాస్టార్ చిరంజీవి కూడా ఘాటుగా స్పందించారు. ఏఐ సాంకేతికతతో మహిళల గౌరవానికి భంగం కలిగించడం అత్యంత క్రూరమైన, అమోగ్యమైన చర్య అని ఖండించారు. ఈ సమస్య కేవలం ఒక నటిది లేదా చిత్రసీమది కాదని, సమాజంలోని మహిళలందరి భద్రతకు సంబంధించినదని స్పష్టం చేశారు. 

తెలుగు ఫిలిం చాంబర్, ప్రొడ్యూసర్ కౌన్సిల్‌లతో చర్చించి సైబర్ వేధింపుల అడ్డుకట్టకు సినీ పరిశ్రమ తరఫున ఒక ప్రత్యేక కమిటీని ఏర్పాటు చేయాలని ప్రతిపాదించారు. విజయ్ దేవరకొండ, రామ్ పోతినేని సహా పలువురు టాలీవుడ్ ప్రముఖులు కూడా ఈ హేయమైన చర్యను ముక్తకంఠంతో ఖండించారు.

హైదరాబాద్‌లో కేసు నమోదు..
మరోవైపు, ఈ వ్యవహారాన్ని హైదరాబాద్ సైబర్ క్రైమ్ పోలీసులు సీరియస్ నమోదు చేసుకుని దర్యాప్తు వేగవంతం చేశారు. ఐటీ చట్టాల కింద కేసులు నమోదు చేసి, డిజిటల్ ఆధారాల సాయంతో వీడియోను మొదట సృష్టించినవారిని, ఆ తర్వాత ప్రచారం చేసినవారిని గుర్తించేందుకు వేట ప్రారంభించారు. ఆకతాయిల ప్రచారాలకు తావు ఇవ్వకుండా నెటిజన్లు ఇలాంటి ఫేక్ కంటెంట్‌ను చూడటం, డౌన్‌లోడ్ చేయడం లేదా షేర్ చేయడం నిలిపివేసి నేరుగా సైబర్ క్రైమ్ అధికారులకు, సోషల్ మీడియా ప్లాట్‌ఫామ్‌లకు రిపోర్ట్ చేయాలని పోలీసులు, సినీ ప్రముఖులు పిలుపునిచ్చారు.