Nana Patekar Death: రజినీకాంత్ విలన్ కన్నుమూత..విలక్షణ నటుడు నానా పటేకర్ సినీ ప్రయాణం ఎలా సాగిందంటే?

Nana Patekar Biography: ప్రముఖ బాలీవుడ్, మరాఠీ నటుడు నానా పటేకర్ (75) కన్నుమూశారు. గోవాలోని ఆయన నివాసంలో గుండెపోటుకు గురై తుదిశ్వాస విడిచారు. గురువారం తెల్లవారుజామున ఆయన ఇంట్లో అపస్మారక స్థితిలో ఉండగా వెంటనే మణిపాల్ ఆస్పత్రికి తరలించారు. వెంటనే వైద్యులు సుమారు 45 నిమిషాల పాటు CPR చేసినప్పటికీ ఆయన ప్రాణాన్ని కాపాడలేకపోయారు. దీంతో గురువారం తెల్లవారుజామున 5:20 గంటలకు మృతి చెందినట్లు వైద్యులు ప్రకటించారు. ఈ ఘటనపై మెడికో లీగల్ కేసు నమోదు చేసి, పోస్టుమార్టం నిర్వహించనున్నట్లు సమాచారం.

అసలు పేరు ఏంటి?
నానా పటేకర్ అసలు పేరు విశ్వనాథ్ పటేకర్. ఆయన 1951 జనవరి 1న మహారాష్ట్రలోని మురుడ్ - జంజీరాలో జన్మించారు. ముంబైలోని సర్ జె.జె. ఇన్‌స్టిట్యూట్ ఆఫ్ అప్లైడ్ ఆర్ట్‌ పట్టా పొందారు. రంగస్థలం నటుడిగా తన ప్రయాణాన్ని ప్రారంభించిన నానా పటేకర్.. 1978లో వచ్చిన 'గమన్' సినిమాతో వెండితెరకు పరిచయమయ్యారు.

'పరిందా'తో వచ్చిన భారీ గుర్తింపు
నానా పటేకర్ కెరీర్ ప్రారంభంలో పలు సినిమాల్లో నటించినా 1988లో వచ్చిన 'సలామ్ బాంబే!' చిత్రంతో మంచి గుర్తింపు వచ్చింది. ఆ తర్వాత 1989లో విడుదలైన 'పరిందా' ఆయన కెరీర్‌ను మరింత మలుపు తిప్పింది. ఈ చిత్రంలోని నటనకు ఉత్తమ సహాయ నటుడిగా జాతీయ చలనచిత్ర అవార్డుతో పాటు ఫిల్మ్‌ఫేర్ అవార్డును కూడా అందుకున్నారు.

'క్రాంతివీర్' చిత్రంతో జాతీయ అవార్డు
1994లో విడుదలైన 'క్రాంతివీర్' నానా పటేకర్ కెరీర్‌లో అత్యంత ముఖ్యమైన చిత్రాల్లో ఒకటిగా నిలిచింది. ఇందులో ఆయన పోషించిన పాత్రకు ఉత్తమ నటుడిగా జాతీయ చలనచిత్ర అవార్డు లభించింది. 'అగ్నిసాక్షి', 'ఖామోషీ: ది మ్యూజికల్', 'అబ్ తక్ ఛప్పన్', 'అపహరణ్', 'రాజ్‌నీతి', 'వెల్‌కమ్', 'నటసమ్రాట్' వంటి చిత్రాల్లోనూ ఆయన తన విలక్షణ నటనతో ప్రేక్షకులను ఆకట్టుకున్నారు. రజినీకాంత్ హీరోగా తెరకెక్కిన 'కాలా' సినిమాలోనూ నానా పటేకర్ నటించి మెప్పించారు. ఈ సినిమాలో తెలుగులో డబ్బింగ్ వెర్షన్ విడుదలైంది.

నటుడిగానే కాదు.. దర్శకుడిగానూ
నానా పటేకర్ నటుడిగానే కాకుండా దర్శకుడిగానూ మంచి గుర్తింపు పొందారు. 1991లో విడుదలైన 'ప్రహార్: ది ఫైనల్ అటాక్' చిత్రానికి దర్శకత్వం వహించారు. తన కెరీర్‌లో మూడు జాతీయ చలనచిత్ర అవార్డులు, పలు ఫిల్మ్‌ఫేర్ పురస్కారాలు అందుకున్నారు. భారత ప్రభుత్వం 2013లో ఆయనను పద్మశ్రీ పురస్కారంతో సత్కరించింది.

నానా పటేకర్ నటనలో సహజత్వం, బలమైన డైలాగ్ డెలివరీ, పాత్రకు తగ్గ భావోద్వేగాలను అద్భుతంగా పలికించడం ఆయన ప్రత్యేకతగా నిలిచాయి. సీరియస్ పాత్రలతో పాటు కామెడీ, విలన్, పోలీస్, సామాజిక నేపథ్య పాత్రల్లోనూ ఆయన తనదైన శైలిని చూపించారు. దశాబ్దాల పాటు హిందీ, మరాఠీ చిత్ర పరిశ్రమల్లో ప్రేక్షకులను అలరించిన నానా పటేకర్ మరణం సినీ ప్రపంచానికి తీరని లోటుగా మిగలనుంది. ఆయన నటించిన పాత్రలు, సినిమాలు మాత్రం ప్రేక్షకుల జ్ఞాపకాల్లో చిరస్థాయిగా నిలిచిపోనున్నాయి.