Nani On Chiru Srikanth Odela: మెగాస్టార్ చిరంజీవి, 'ది ప్యారడైజ్' డైరెక్టర్ శ్రీకాంత్ ఓదెల సినిమా ఉందా? ఇప్పట్లో కష్టమే అంటున్న హీరో నాని!

Nani On Chiru Srikanth Odela Movie: తెలుగు చిత్రసీమలో మెగాస్టార్ చిరంజీవి, 'దసరా', 'ది ప్యారడైజ్' సినిమాలతో అలరించిన డైరెక్టర్ శ్రీకాంత్ ఓదెల కలయికలో రానున్న చిత్రంపై ప్రేక్షకుల్లోనూ, అభిమానుల్లోనూ విపరీతమైన ఆసక్తి నెలకొంది. ఈ క్రేజీ ప్రాజెక్ట్‌కు నేచురల్ స్టార్ నాని సమర్పకుడిగా, అలాగే నిర్మాతగా వ్యవహరించనున్నారు. అయితే ఈ సినిమా గురించి ప్రకటించి దాదాపుగా ఏడాది కావొస్తున్నా.. దీని అప్‌డేట్ ఇంకా రాకపోవడంతో మెగా ఫ్యాన్స్ ఏమైఉంటుందని చర్చించుకుంటున్నారు. అయితే, ఈ ప్రాజెక్ట్ ఇప్పట్లో పట్టాలెక్కేలా కనిపించడం లేదని, ఆ సినిమా షూటింగ్ మరింత ఆలస్యం అవ్వొచ్చని నిర్మాత నాని వెల్లడించారు.

ఈ సినిమా ఆలస్యానికి గల ప్రధాన కారణాలను ఇటీవల 'ది ప్యారడైజ్' సినిమా ప్రమోషన్స్‌లో భాగంగా ఓ నేషనల్ మీడియాకు ఇచ్చిన ఇంటర్వ్యూలో హీరో నాని వివరించారు. తాను నటించిన 'ది ప్యారడైజ్' సినిమా షూటింగ్ కావడానికి అనుకున్న దాని కంటే ఎక్కువ సమయం తీసుకుందని నాని వెల్లడించారు. దాంతో ఆ ప్రభావం చిరంజీవి సినిమాపై పడిందని, ఆ విధంగా ఆ సినిమా షెడ్యూల్ అటకెక్కిందని ఆయన పేర్కొన్నారు.

అయితే తమ ముందు ప్లానింగ్ ప్రకారం.. ఈపాటికే ఈ సినిమా చిత్రీకరణ చివరి దశలో ఉండాల్సిందని, కానీ 'ది ప్యారడైజ్' చిత్రం ఆలస్యం వల్ల అది సాధ్యపడలేదని స్పష్టం చేశారు. అంతేకాకుండా, ఈ ప్రాజెక్ట్ గురించి తాము ఇంకా కూర్చుని చర్చించుకోలేదని, నిర్ణయం తీసుకోవడానికి మరికొంత సమయం పడుతుందని చెప్పారు. ఈ గ్యాప్‌లో చిరంజీవి గారు కూడా తమ ఇతర సినిమాల చిత్రీకరణలను పూర్తి చేశారని ఆయన తెలియజేశారు.

ఈ క్రేజీ ప్రాజెక్ట్‌ను 2024 డిసెంబర్‌లో అధికారికంగా ప్రకటించిన సంగతి తెలిసిందే. చిరంజీవి సుదీర్ఘ సినీ ప్రయాణంలోనే ఇది 'అత్యంత హింసాత్మక చిత్రం'గా రాబోతుందని ఓ పోస్టర్‌ ద్వారా చిత్రబృందం తెలియజేసింది. దీంతో మెగాస్టార్ - శ్రీకాంత్ ఓదెల సినిమాపై ఒక్కసారిగా అంచనాలు భారీగా పెరిగాయి. 

అయితే ప్రస్తుత పరిస్థితుల దృష్ట్యా.. చిరంజీవి, దర్శకుడు శ్రీకాంత్ ఓదెల ఇద్దరి డేట్లు తిరిగి సర్దుబాటు అయిన తర్వాత మాత్రమే ఈ ప్రాజెక్ట్‌పై తదుపరి అప్‌డేట్ వచ్చే అవకాశం ఉంది. సినిమా నిర్మాణం కొంత ఆలస్యమైనప్పటికీ, ఈ ప్రతిష్టాత్మక కాంబినేషన్ కోసం మెగా అభిమానులు, సాధారణ సినీ ప్రియులు ఎంతో ఆసక్తిగా ఎదురుచూస్తున్నారు.