Jayalalitha: బిడ్డ పుడితే ఇబ్బందులు వస్తాయని భయపడ్డారా.. శరత్ బాబు గురించి జయలలిత సంచలన వ్యాఖ్యలు

 Jayalalitha: జయలలిత తన వ్యక్తిగత జీవితంలో ఎదుర్కొన్న కొన్ని సమస్యల సమయంలో శరత్ బాబు తనకు అండగా నిలిచారని చెప్పారు. ముఖ్యంగా ఆమె మొదటి వివాహం విఫలమైన సమయంలో తాను ఎంతో ఇబ్బందులు ఎదుర్కొన్నానని తెలిపారు. ఆ సమయంలో శరత్ బాబు తనకు మంచి స్నేహితుడిగా, శ్రేయోభిలాషిగా తోడుగా ఉన్నారని గుర్తు చేసుకున్నారు.

సినిమా పరిశ్రమకు సంబంధించిన విషయాల్లో కూడా ఆయన తనకు మంచి సలహాలు ఇచ్చేవారని చెప్పారు. ఆర్థిక వ్యవహారాల విషయంలో కూడా సరైన మార్గనిర్దేశం చేసేవారని తెలిపారు. ఇలా ఇద్దరి మధ్య స్నేహం క్రమంగా మరింత బలపడిందని జయలలిత పేర్కొన్నారు. ఒక దశలో ఇద్దరూ పెళ్లి చేసుకోవాలని కూడా ఆలోచించారట. అంతేకాదు తమకు ఒక బిడ్డ ఉండాలని కూడా అనుకున్నట్లు జయలలిత వెల్లడించారు. అయితే చివరికి ఆ నిర్ణయం అమలులోకి రాలేదు. దీనికి ప్రధాన కారణం శరత్ బాబు ఆలోచనా విధానమేనని ఆమె తెలిపారు.

తమకు బిడ్డ పుడితే భవిష్యత్తులో ఏదైనా సమస్య వస్తే ఆ పిల్లవాడు ఇబ్బందులు పడే అవకాశం ఉందని శరత్ బాబు భావించారట. ముఖ్యంగా ఆస్తులు, కుటుంబ వ్యవహారాల విషయంలో పిల్లలకు సమస్యలు రావచ్చని ఆయన ఆందోళన చెందేవారని జయలలిత చెప్పారు.

అందుకే భార్యాభర్తలుగా మారడం కంటే జీవితాంతం మంచి స్నేహితులుగా ఉండటం మంచిదని ఇద్దరూ నిర్ణయించుకున్నట్లు తెలిపారు. శరత్ బాబు తనపై ఎప్పుడూ ఎలాంటి ఒత్తిడి తీసుకురాలేదని కూడా జయలలిత చెప్పారు. తన నుంచి ఆయన ఎప్పుడూ డబ్బు ఆశించలేదని అన్నారు. తన జీవితంలో శరత్ బాబు ఒక మంచి మనిషిగా, స్నేహితుడిగా నిలిచిపోయారని భావోద్వేగంతో గుర్తు చేసుకున్నారు.

ఇటీవల జయలలిత ఇచ్చిన ఇంటర్వ్యూలోని ఈ విషయాలు సోషల్ మీడియాలో వైరల్ అవుతున్నాయి. దీంతో శరత్ బాబుతో ఆమెకు ఉన్న అనుబంధం గురించి మరోసారి చర్చ మొదలైంది. 2023లో శరత్ బాబు కన్నుమూసిన విషయం తెలిసిందే. ఆయన సినిమాలు, పాత్రలతో పాటు వ్యక్తిగత జీవితానికి సంబంధించిన ఈ ఆసక్తికర విషయాలు కూడా ఇప్పుడు అభిమానుల దృష్టిని ఆకర్షిస్తున్నాయి.