Hafiz Saeed Masood Azhar: ఆపరేషన్ సింధూర్ ఎఫెక్ట్? భారత్ దెబ్బకు ఉగ్రవాదులు.. రహస్య ప్రాంతానికి హఫీజ్ సయీద్, మసూద్ అజార్?

Hafiz Saeed Masood Azhar In Safehouse: ఆపరేషన్ సింధూర్ తర్వాత పాకిస్థాన్‌కు చెందిన ఉగ్రవాద సంస్థల నేతల భద్రతపై కొత్త చర్చ మొదలైంది. లష్కరే తోయిబా అధినేత హఫీజ్ సయీద్, జైషే మహమ్మద్ చీఫ్ మసూద్ అజార్‌లను పాకిస్థాన్ నిఘా సంస్థ ఐఎస్ఐ రహస్య ప్రాంతాలకు తరలించినట్లు నిఘా వర్గాలను ఉటంకిస్తూ కొన్ని కథనాలు వెల్లడించాయి. అయితే ఈ సమాచారంపై అధికారిక నిర్ధారణ లేదు.

కొన్ని జాతీయ మీడియాల్లో వెలువడిన సమాచారం ప్రకారం.. హఫీజ్ సయీద్‌ను లాహోర్‌లోని జోహర్ టౌన్ నుంచి రావల్పిండిలోని గారిసన్ గ్రౌండ్ పరిసరాలకు తరలించినట్లు ప్రచారం జరుగుతోంది. ఈ ప్రాంతం పాకిస్థాన్ సైనిక ప్రధాన కార్యాలయానికి సమీపంలో ఉండటం గమనార్హం. మరోవైపు మసూద్ అజార్‌ను సింధ్ ప్రావిన్స్‌లోని నవాబ్‌షాలో ఉన్న రహస్య నివాసానికి మార్చినట్లు నిఘా వర్గాల సమాచారం చెబుతోంది.

ఈ పరిణామాలకు ఆపరేషన్ సింధూర్‌తో సంబంధం ఉందని ఆయా కథనాలు పేర్కొంటున్నాయి. ఆ ఆపరేషన్ సమయంలో పాకిస్థాన్‌లోని ఉగ్రవాద స్థావరాలపై భారత్ దాడులు నిర్వహించింది. ముఖ్యంగా బహవల్పూర్‌లోని జైషే మహమ్మద్ స్థావరంపై జరిగిన దాడి ఆ సంస్థ కార్యకలాపాలపై ప్రభావం చూపినట్లు వార్తలు వెలువడ్డాయి. హఫీజ్ సయీద్ తన అనుచరులతో ప్రత్యక్ష సమావేశాలను తగ్గించి ఆడియో సందేశాల ద్వారా మాత్రమే మాట్లాడుతున్నట్లు కూడా సమాచారం.

మసూద్ అజార్ సైతం కొద్దిమంది ముఖ్య అనుచరులతోనే సంబంధాలు కొనసాగిస్తున్నట్లు కథనాలు చెబుతున్నాయి. హఫీజ్ సయీద్, మసూద్ అజార్‌లు అంతర్జాతీయ ఉగ్రవాదులుగా ఐక్యరాజ్యసమితి ఆంక్షల జాబితాలో ఉన్నారు. 26/11 ముంబై దాడుల నేపథ్యంలో సయీద్ పేరు ప్రముఖంగా వినిపించగా, పుల్వామా, పఠాన్‌కోట్ వంటి దాడులతో అజార్ నేతృత్వంలోని సంస్థకు సంబంధాలున్నాయని ఆరోపణలు ఉన్నాయి.

ఇప్పుడు అందరిలో ఉన్న ప్రధాన ప్రశ్న ఏమిటంటే..? వీరిద్దరినీ నిజంగానే కొత్త ప్రాంతాలకు తరలించారా? ప్రస్తుతం ఎక్కడ ఉన్నారు? ఈ విషయాలపై అధికారిక ప్రకటన లేదా స్వతంత్ర ధృవీకరణ వచ్చే వరకు తాజా కథనాలను నిఘా వర్గాల సమాచారంగా మాత్రమే పరిగణించాలి. ముఖ్యంగా హఫీజ్ సయీద్ జైలు శిక్ష అనుభవిస్తున్నాడన్న పాకిస్థాన్ వాదనకు, అతను రహస్య నివాసంలో ఉన్నాడన్న సమాచారంపై స్పష్టత రావాల్సి ఉంది.