సమస్తిపూర్‌లో జమూయ్ తరహా ఘటన.. నన్ను ఏం చేయలేరురా! అని రోడ్డుపైనే మృగాళ్లతో ఒంటరిగా పోరాడిన అమ్మాయి! వీడియో

Samastipur Viral Video: బీహార్ రాష్ట్రంలో శాంతి భద్రతలు దెబ్బతింటున్నట్లు స్పష్టంగా కనిపిస్తోంది. ఇటీవలే జమూయ్‌లో ఒక మైనర్ బాలికను కొందరు వ్యక్తులు వేధించిన సంగతి తెలిసిందే. కొంతమంది మృగల్లాంటి వ్యక్తులు కలిసి ఒక అమ్మాయిని చుట్టుముట్టి, అత్యంత అసభ్యకరంగా ప్రవర్తిస్తూ ఆమెను వేధించారు. ఆ సమయంలో ఒక యువకుడు ధైర్యంగా ముందుకు వచ్చి, పదేపదే ఆమె చేతిని పట్టుకుని రక్షించడానికి ప్రయత్నించి, ఎట్టకేలకు ఆమెను ఆ ఆకతాయిల నుండి కాపాడగలిగాడు. జమూయ్‌లో జరిగిన ఈ ఘటన దేశవ్యాప్తంగా పెద్ద సంచలనంగా మారింది. ఈ దారుణ ఘటనను చూసి ప్రజలందరూ ఒక్కసారిగా ఉలిక్కిపడ్డారు, దీనివల్ల బీహార్‌లో అమ్మాయిలకు ఎలాంటి రక్షణ లేదని కూడా స్పష్టంగా అర్థమవుతోంది.

అయితే, ఈ జమూయ్‌ ఘటన ముగియక ముందే బీహార్‌లోని సమస్తిపూర్‌లో మరో భయంకరమైన సంఘటన వెలుగులోకి వచ్చింది. ఒక అమ్మాయి తన స్నేహితుడితో కలిసి జగత్ సింగ్ పూర్ ప్రాంతంలోని ఒక గుట్ట వద్దకు వచ్చి ఫోటోలు దిగుతుండగా, అక్కడి స్థానికులైన కొందరు వ్యక్తులు అకస్మాత్తుగా వారిని చుట్టుముట్టి వేధించడం ప్రారంభించారు. వెంటనే అక్కడి నుండి తప్పించుకోవడానికి ప్రయత్నించిన ఆ అమ్మాయిని వదలకుండా, పలువురు వ్యక్తులు ఆమెను చుట్టుముట్టి వేధించారు. ఆకతాయిలు ఏమాత్రం భయపడకుండా ఆమె జుట్టు పట్టి లాక్కొని, అసభ్యంగా తాకడం వంటి పనులు చేశారు. ఈ దారుణ ఘటన నడిరోడ్డు పైనే చోటుచేసుకుంది. ఆ అమ్మాయి తన అన్నకు ఫోన్ చేస్తానని హెచ్చరించినప్పటికీ, ఆ మాటలను పట్టించుకోకుండా, వెటకారంగా "ఫోన్ చెయ్" అని అంటూ మరింత అసభ్యంగా ప్రవర్తించారు.

స్థానికంగా ఉన్న కొందరు వ్యక్తులు ఈ దారుణమైన ఘటనను వీడియో తీసి సోషల్ మీడియాలో పోస్ట్ చేయడంతో, అది కొద్దిసేపటికే వైరల్ అయింది. సెప్టెంబర్ 23వ తేదీ సాయంత్రం సోషల్ మీడియా మానిటర్ల ద్వారా ఈ వీడియోను చూసిన ఎస్పీ అరవింద్ ప్రతాప్ సింగ్, దీనిని అత్యంత సీరియస్ అంశంగా తీసుకున్నారు. బాధితురాలు మైనర్ కావడంతో ఆమె నుండి ఫిర్యాదు అందకపోయినప్పటికీ, పోలీసులు స్వయంగా స్పందించి POCSO చట్టం కింద కేసు నమోదు చేశారు. ఈ ఘటన కర్పూరి గ్రామానికి చెందిన పోలీస్ స్టేషన్ పరిధిలోని జగత్ సింగ్ పూర్ వంతెన సమీపంలో జరిగినట్లు సమాచారం అందుతోంది. వీడియో ఆధారంగా పోలీసులు వేగంగా స్పందించి, ఆరు గంటల వ్యవధిలోనే నిందితులను అరెస్టు చేశారు. బాధితురాలు మైనర్ కావడంతో, ఆమె గుర్తింపుకు ఎటువంటి భంగం కలగకుండా ఉండేందుకు ఆమె ఫోటోలను షేర్ చేయవద్దని పోలీసులు ప్రజలకు విజ్ఞప్తి చేశారు. అలాగే, ఈ వీడియో లేదా ఇతరుల వ్యక్తిగత వివరాలతో కూడిన కంటెంట్‌ను షేర్ చేస్తే కఠినమైన శిక్షలు విధిస్తామని హెచ్చరించారు. జమూయ్‌లో జరిగిన తరహాలోనే ఇప్పుడు సమస్తిపూర్‌లో కూడా ఇలాంటి ఘటన జరగడంతో, బీహార్‌లో మహిళలకు అసలు భద్రత లేదని మరోసారి తేలిపోయింది.