Greater Noida Bus Fire: మరోసారి ఘోర బస్సు ప్రమాదం.. 9 మంది సజీవ దహనం..!

Greater Noida Bus Fire: ఉత్తరప్రదేశ్‌లోని గ్రేటర్ నోయిడాలో గురువారం తెల్లవారుజామున ఘోర ప్రమాదం జరిగింది. యమునా ఎక్స్‌ప్రెస్‌వేపై ప్రయాణిస్తున్న ఓ స్లీపర్ టూరిస్ట్ బస్సులో ఒక్కసారిగా మంటలు చెలరేగాయి. ఈ ప్రమాదంలో కనీసం 9 మంది ప్రాణాలు కోల్పోయారు. పలువురు ప్రయాణికులు గాయపడినట్లు సమాచారం.

నివేదికల ప్రకారం, ఈ బస్సు ఢిల్లీ నుంచి ఉత్తరప్రదేశ్‌లోని మహోబా వైపు వెళ్తోంది. ప్రమాదం జరిగిన సమయంలో బస్సులో 30 మందికి పైగా ప్రయాణికులు ఉన్నట్లు తెలుస్తోంది. వారిలో చాలా మంది నిద్రలో ఉన్న సమయంలో బస్సులో మంటలు మొదలయ్యాయి.

మంటలు వేగంగా బస్సు మొత్తం వ్యాపించడంతో ప్రయాణికులు తీవ్ర భయాందోళనకు గురయ్యారు. ప్రాణాలు కాపాడుకునేందుకు కొంతమంది ప్రయాణికులు బస్సు కిటికీల నుంచి బయటకు దూకినట్లు సమాచారం. దీంతో పలువురు గాయపడినట్లు తెలుస్తోంది.

బస్సు యమునా ఎక్స్‌ప్రెస్‌వే పక్కన పూర్తిగా మంటల్లో చిక్కుకున్న దృశ్యాలు కనిపించాయి. సమాచారం అందుకున్న వెంటనే అగ్నిమాపక సిబ్బంది, జేవర్ పోలీస్ స్టేషన్‌కు చెందిన అధికారులు ఘటనాస్థలికి చేరుకున్నారు. మంటలను అదుపులోకి తీసుకువచ్చేందుకు, ప్రయాణికులను రక్షించేందుకు సహాయక చర్యలు చేపట్టారు.

ఈ ప్రమాదానికి అసలు కారణం ఏమిటనేది ఇంకా స్పష్టంగా తెలియలేదు. మంటలు ఎలా ప్రారంభమయ్యాయనే విషయంపై పోలీసులు, సంబంధిత అధికారులు దర్యాప్తు చేస్తున్నారు. బస్సులో ఏదైనా సాంకేతిక సమస్య కారణమా లేదా ఇతర కారణాల వల్ల మంటలు చెలరేగాయా అనే కోణంలో పరిశీలిస్తున్నారు.

ప్రమాద ఘటనపై ఉత్తరప్రదేశ్ ముఖ్యమంత్రి యోగి ఆదిత్యనాథ్ స్పందించారు. మృతుల కుటుంబాలకు ఆయన సంతాపం తెలిపారు. గాయపడిన వారికి మెరుగైన వైద్యం అందించాలని అధికారులను ఆదేశించారు. అలాగే బాధిత కుటుంబాలకు అవసరమైన అన్ని రకాల సహాయం అందించాలని సూచించారు.

ప్రస్తుతం పోలీసులు, అగ్నిమాపక శాఖ అధికారులు ఘటనాస్థలిలో సహాయక చర్యలు కొనసాగిస్తున్నారు. గాయపడిన వారిని సమీపంలోని ఆసుపత్రులకు తరలించి చికిత్స అందిస్తున్నట్లు సమాచారం. ప్రమాదానికి సంబంధించిన పూర్తి వివరాలు అధికారుల దర్యాప్తు తర్వాత వెల్లడయ్యే అవకాశం ఉంది.

Also Read: Maharashtra School: లంచ్ బాక్స్‌లో మెంతికూర తెచ్చినందుకు జరిమాన.. మహారాష్ట్రలోని స్కూల్లో వింత ఘటన.. మ్యాటర్ ఏమిటంటే..?..

Also Read: Jamui Harassment Case: జముయిలో మైనర్ బాలికపై ఘోరం.. రంగంలోకి జాతీయ మహిళ కమిషన్.. సిట్ ఏర్పాటు.!.