Railway Ticket Price Drop: రైల్వే ప్రయాణికులకు సూపర్ గుడ్‌న్యూస్..ఇకపై రైల్వే టికెట్ల ధరల్లో భారీ తగ్గింపు!
Railway Ticket Price Fall: భారతీయ రైల్వే పరిధిలోని 47 సూపర్‌ఫాస్ట్ ఎక్స్‌ప్రెస్ రైళ్లను సాధారణ ఎక్స్‌ప్రెస్ రైళ్లుగా పునర్వర్గీకరించాలని రైల్వే శాఖ నిర్ణయించింది. సదరు మార్గాల్లో నిర్దేశిత సూపర్‌ఫాస్ట్ వేగాన్ని అందుకోలేకపోవడం వల్ల ఈ మార్పు చేస్తున్నారు. ఈ నిర్ణయంతో 2027 జనవరి 1వ తేదీ నుంచి ప్రయాణించే వారికి టికెట్ ఛార్జీలలో రూ. 15 నుండి రూ. 75 వరకు ఊరట కలగనుంది.
Railway Ticket Price Fall: రైలు ప్రయాణికులకు మరింత సౌకర్యవంతమైన సేవలు అందించే క్రమంలో భారతీయ రైల్వే శాఖ కీలక నిర్ణయం తీసుకుంది. కొన్ని ప్రత్యేక మార్గాల్లో నిర్ణీత సూపర్‌ఫాస్ట్ వేగంతో ప్రయాణించలేకపోతున్న 47 సూపర్‌ఫాస్ట్ రైళ్ల హోదాను తొలగించి, వాటిని రెగ్యులర్ ఎక్స్‌ప్రెస్ రైళ్లుగా మార్చనుంది.
సర్‌ఛార్జీ మినహాయింపు - టికెట్ ధరల తగ్గింపు
రైళ్ల వర్గీకరణలో మార్పు రావడం వల్ల వీటిపై ఇప్పటివరకు వసూలు చేస్తున్న సూపర్‌ఫాస్ట్ సర్‌ఛార్జీ భారం ప్రయాణికులపై ఉండదు. ఇకపై వీటికి సాధారణ ఎక్స్‌ప్రెస్ రైళ్ల ధరలే వర్తిస్తాయి. ప్రయాణికులు ఎంచుకునే తరగతిని బట్టి ఒక్కో టికెట్‌పై రూ. 15 నుండి రూ. 75 వరకు ఆదా కానుంది.
ఈ సవరించిన ఛార్జీలు 2027 జనవరి 1 నుంచి అమల్లోకి వస్తాయి. జనవరి 1 తర్వాతి తేదీలకు సంబంధించి ఇప్పటినుంచే ముందస్తు రిజర్వేషన్ చేసుకునే ప్రయాణికులకు తగ్గింపు ధరలకే టికెట్లు లభిస్తాయి.
రైళ్ల వేళలు, రూట్ల వివరాలు
రైళ్ల హోదా మారినప్పటికీ, వాటి ప్రయాణ వేళల్లో (Timings) ఎలాంటి మార్పులు ఉండవని రైల్వే అధికారులు ధ్రువీకరించారు. అయితే కొన్ని రైళ్లకు కొత్త నంబర్లను కేటాయించే అవకాశం ఉంది.
ఈ మార్పులు ప్రధానంగా క్రింది రైల్వే మండలాల్లో వర్తిస్తాయి. సెంట్రల్ రైల్వే పరిధిలో CSMT - పూణే ప్రగతి ఎక్స్‌ప్రెస్, LTT - అయోధ్య కంటోన్మెంట్ తులసి ఎక్స్‌ప్రెస్ సహా మొత్తం 18 రైలు సేవలు ఉన్నాయి. ఈస్ట్ సెంట్రల్ రైల్వే పరిధిలో సప్త క్రాంతి ఎక్స్‌ప్రెస్ సహా 20 సర్వీసులు ఈ జాబితాలో ఉన్నాయి.
2027 జనవరి 1 తర్వాత ప్రయాణ ప్లాన్ చేసుకునే ప్రయాణికులు తమ రైళ్ల సవరించిన నంబర్లు, ఛార్జీల వివరాలను ముందుగానే భారతీయ రైల్వే అధికారిక వెబ్‌సైట్ ద్వారా సరిచూసుకోవాలని అధికారులు విజ్ఞప్తి చేశారు.
