Drumstick Soup Recipe: వర్షకాలంలో వేడి వేడి మునక్కాడల సూప్.. ఇలా చేస్తే రుచి అదిరిపోతుంది

సులభమైన సూప్ రెసిపీ

మిరియాలు, జీలకర్ర, వెల్లుల్లి, ఉల్లిపాయల రుచితో మునక్కాడ కలిసినప్పుడు సూప్ మంచి రుచిని ఇస్తుంది. ముఖ్యంగా వర్షం పడుతున్న సమయంలో సాయంత్రం వేడిగా ఈ సూప్ తాగితే ఎంతో బాగుంటుంది.

కావాల్సిన పదార్థాలు

మునక్కాడలు 2, చిన్న ఉల్లిపాయలు 6 నుంచి 8, ఒక చిన్న టమాటా, నాలుగు వెల్లుల్లి రెబ్బలు, ఒక టీ స్పూన్ మిరియాలు, అర టీ స్పూన్ జీలకర్ర, పావు టీ స్పూన్ పసుపు, ఒక టీ స్పూన్ నూనె లేదా వెన్న, 3 నుంచి 4 కప్పుల నీళ్లు, సరిపడా ఉప్పు, కొద్దిగా కొత్తిమీర తీసుకోవాలి.

మునక్కాడల సూప్ తయారీ విధానం

ముందుగా మునక్కాడలను బాగా కడిగి చిన్న ముక్కలుగా కోసుకోవాలి. వాటిని కుక్కర్‌లో వేసి కొద్దిగా పసుపు, నీళ్లు పోసి సుమారు మూడు విజిల్స్ వచ్చే వరకు ఉడికించాలి. మునక్కాడలు చల్లారిన తర్వాత వాటి లోపల ఉన్న గుజ్జును స్పూన్‌తో తీసుకోవాలి. మునక్కాడలు ఉడికిన నీటిని మాత్రం పారబోయకుండా పక్కన పెట్టుకోవాలి. ఇప్పుడు గుజ్జులో కొద్దిగా ఆ నీళ్లు పోసి మిక్సీలో మెత్తగా చేసుకోవాలి. సూప్ ఇంకా మెత్తగా కావాలంటే వడకట్టుకోవచ్చు.

మునగకాయ వంటకాలు

తర్వాత ఒక గిన్నెలో నూనె వేసి వేడి చేయాలి. అందులో కొద్దిగా దంచిన మిరియాలు, జీలకర్ర వేసి వేయించాలి. తరువాత వెల్లుల్లి, సన్నగా తరిగిన ఉల్లిపాయలు వేసి మంచి వాసన వచ్చే వరకు వేయించాలి. టమాటా ముక్కలు వేసి మెత్తగా ఉడికించాలి.

ఇంట్లో సూప్ తయారీ

ఇప్పుడు మునక్కాడ గుజ్జు, మిగిలిన ఉడికించిన నీళ్లు పోసి ఉప్పు కలపాలి. మీడియం మంటపై 5 నుంచి 7 నిమిషాలు మరిగించాలి. చివరగా కొత్తిమీర చల్లి స్టవ్ ఆఫ్ చేస్తే వేడి వేడి మునక్కాడల సూప్ సిద్ధమవుతుంది. మరింత స్పైసీగా కావాలంటే మిరియాలు కొంచెం ఎక్కువగా వేసుకోవచ్చు. క్రీమీ రుచి కోసం కొద్దిగా కొబ్బరి పాలు కలపవచ్చు. ఇలా ఇంట్లోనే సులభంగా మునక్కాడల సూప్ తయారు చేసుకుని వానాకాలంలో వేడిగా ఆస్వాదించవచ్చు.