October Bank Holidays 2026: అక్టోబర్‌లో 15 రోజులు బ్యాంకులకు సెలవులు.. ఈ తేదీల్లో బ్యాంకుకు వెళ్లొద్దు..!

అక్టోబర్ బ్యాంక్ సెలవులు

అక్టోబర్ నెలలో బ్యాంకు పనులు ఉన్నవారు ముందుగానే ప్లాన్ చేసుకోవడం మంచిది. పండుగలు, జాతీయ సెలవులు, రెండో మరియు నాలుగో శనివారాలు, ఆదివారాల కారణంగా దేశంలోని వివిధ ప్రాంతాల్లో బ్యాంకులకు సెలవులు ఉన్నాయి. రిజర్వ్ బ్యాంక్ ఆఫ్ ఇండియా (RBI) విడుదల చేసిన సెలవుల జాబితా ప్రకారం అక్టోబర్ 2026లో వివిధ రాష్ట్రాల్లో మొత్తం 15 రోజుల వరకు బ్యాంకులు మూతపడనున్నాయి. అయితే అన్ని రాష్ట్రాల్లోనూ ఈ 15 రోజులు బ్యాంకులు మూసి ఉండవు. కొన్ని సెలవులు ఆయా రాష్ట్రాలు, ప్రాంతాల్లో జరుపుకునే పండుగలను బట్టి ఉంటాయి. అందుకే మీ ప్రాంతంలోని బ్యాంకు సెలవులను ముందుగా తెలుసుకుని ముఖ్యమైన పనులను ప్లాన్ చేసుకోవాలి.

బ్యాంకులు ఎప్పుడు మూసి ఉంటాయి

అక్టోబర్ 2న మహాత్మా గాంధీ జయంతి సందర్భంగా దేశవ్యాప్తంగా బ్యాంకులకు సెలవు ఉంటుంది. అక్టోబర్ 4న ఆదివారం కావడంతో బ్యాంకులు పనిచేయవు. అక్టోబర్ 10న రెండో శనివారం కారణంగా దేశవ్యాప్తంగా బ్యాంకులకు సెలవు ఉంటుంది. అక్టోబర్ 18న మరో ఆదివారం సెలవు ఉంటుంది. అక్టోబర్ 17న త్రిపురలో మహా సప్తమి సందర్భంగా బ్యాంకులు మూసి ఉంటాయి. అక్టోబర్ 19న దసరా, మహా అష్టమి, మహా నవమి, ఆయుధ పూజ, దుర్గా పూజ, విజయదశమి వంటి పండుగల కారణంగా పలు రాష్ట్రాల్లో బ్యాంకులకు సెలవు ఉంది.

బ్యాంక్ హాలిడేస్ ఇండియా

అక్టోబర్ 20న కూడా దసరా, మహానవమి, ఆయుధ పూజ, దుర్గా పూజ కారణంగా చాలా రాష్ట్రాల్లో బ్యాంకులు పనిచేయవు. అక్టోబర్ 21న త్రిపుర, కర్ణాటక, సిక్కిం, అసోం, కేరళ, పశ్చిమ బెంగాల్ రాష్ట్రాల్లో బ్యాంకులకు సెలవు ఉంటుంది. సిక్కింలో దుర్గా పూజ సందర్భంగా అక్టోబర్ 22, 23 తేదీల్లో కూడా బ్యాంకులు మూసి ఉంటాయి.

2026 బ్యాంక్ సెలవులు

అక్టోబర్ 24న నాలుగో శనివారం, అక్టోబర్ 25న ఆదివారం కావడంతో దేశవ్యాప్తంగా బ్యాంకులు పనిచేయవు. అక్టోబర్ 26న కొన్ని ప్రాంతాల్లో లక్ష్మీ పూజ, యాక్సెషన్ డే, మహర్షి వాల్మీకి జయంతి సందర్భంగా సెలవు ఉంటుంది. అక్టోబర్ 29న హిమాచల్ ప్రదేశ్‌లో కర్వా చౌత్ సందర్భంగా బ్యాంకులకు సెలవు ఉంది. అక్టోబర్ 31న గుజరాత్‌లో సర్దార్ వల్లభభాయ్ పటేల్ జయంతి సందర్భంగా బ్యాంకులు మూసి ఉంటాయి.

అక్టోబర్ బ్యాంక్ సెలవుల లిస్ట్

బ్యాంకు సెలవు ఉన్న రోజుల్లో కూడా కస్టమర్లు ఆన్‌లైన్ బ్యాంకింగ్, మొబైల్ బ్యాంకింగ్ యాప్‌లు, UPI సేవలను ఉపయోగించుకోవచ్చు. డబ్బు బదిలీ, బిల్లు చెల్లింపులు, ఖాతా వివరాలు చూసుకోవడం వంటి అనేక పనులు ఇంటి నుంచే చేసుకోవచ్చు. అయితే నగదు జమ చేయడం, కొన్ని పత్రాల పనులు వంటి సేవలకు బ్యాంకు బ్రాంచ్‌కు వెళ్లాల్సి రావచ్చు. అందుకే అక్టోబర్‌లో బ్యాంకుకు వెళ్లే ముందు సెలవుల జాబితాను ఒకసారి చూసుకోవడం మంచిది.