Old Pension Scheme: పాత పెన్షన్ స్కీమ్‌పై ఉద్యోగులకు గుడ్ న్యూస్.. టెక్నికల్ తప్పిదంతో ప్రయోజనం ఆపొద్దన్న హైకోర్టు

టెక్నికల్ రిజిగ్నేషన్

ప్రభుత్వ ఉద్యోగులకు పెన్షన్ విషయంలో కలకత్తా హైకోర్టు కీలక తీర్పు ఇచ్చింది. ఉద్యోగం మారే సమయంలో జరిగిన ఒక చిన్న విధానపరమైన తప్పిదం కారణంగా పాత పెన్షన్ స్కీమ్‌ ప్రయోజనాన్ని పూర్తిగా నిరాకరించకూడదని కోర్టు స్పష్టం చేసింది. అర్హత ఉన్న ఉద్యోగి కేసును మరోసారి పరిశీలించాలని అధికారులను ఆదేశించింది.

ప్రభుత్వ ఉద్యోగం

ఈ కేసు ఓ ప్రభుత్వ ఉద్యోగికి సంబంధించినది. ఆయన తొలుత ప్యూన్ ఉద్యోగం కోసం దరఖాస్తు చేసుకున్నారు. 2006లో ఆ ఉద్యోగంలో చేరారు. అంతకుముందే మరో ప్రభుత్వ ఉద్యోగమైన లోయర్ గ్రేడ్ క్లర్క్ పోస్టుకు కూడా దరఖాస్తు చేశారు. ఆ ఉద్యోగానికి ఎంపికైన తర్వాత 2007లో ప్యూన్ పోస్టుకు రాజీనామా చేసి కొత్త ఉద్యోగంలో చేరారు.

పెన్షన్ నిబంధనలు

అయితే కొత్త ఉద్యోగం నేషనల్ పెన్షన్ స్కీమ్ పరిధిలోకి వచ్చింది. చాలా సంవత్సరాల తర్వాత 2023లో కేంద్ర ప్రభుత్వం తీసుకొచ్చిన ప్రత్యేక నిబంధనల ప్రకారం పాత పెన్షన్ స్కీమ్‌కు మారే అవకాశం వచ్చింది. దీంతో సదరు ఉద్యోగి కూడా తనకు పాత పెన్షన్ ప్రయోజనం ఇవ్వాలని కోరారు. అయితే అధికారులు ఆయన అభ్యర్థనను తిరస్కరించారు. పాత ఉద్యోగం నుంచి బయటకు వచ్చేటప్పుడు ‘టెక్నికల్ రిజిగ్నేషన్’ కోసం దరఖాస్తు చేయలేదని కారణంగా చెప్పారు.

2023 పెన్షన్ నిబంధనలు

ఈ విషయంపై ఉద్యోగి కోర్టును ఆశ్రయించారు. కేసును పరిశీలించిన కలకత్తా హైకోర్టు అధికారుల వాదనను పూర్తిగా అంగీకరించలేదు. ఒక వ్యక్తి నిరుద్యోగిగా ఉన్న సమయంలో ఒకటి కంటే ఎక్కువ ప్రభుత్వ ఉద్యోగాలకు దరఖాస్తు చేసుకోవడం సాధారణమేనని కోర్టు పేర్కొంది. ఏ ఉద్యోగానికి ఎంపిక అవుతారో ముందుగా ఎవరికీ తెలియదని తెలిపింది. అలాగే ఉద్యోగి ప్యూన్‌గా చేరిన సమయంలో పెండింగ్‌లో ఉన్న ఇతర ఉద్యోగ దరఖాస్తుల గురించి తప్పనిసరిగా సమాచారం ఇవ్వాలని ఆయనకు స్పష్టంగా చెప్పిన ఆధారాలు కూడా లేవని కోర్టు గమనించింది.

నేషనల్ పెన్షన్ స్కీమ్

టెక్నికల్ రిజిగ్నేషన్‌కు సంబంధించిన నిబంధనలు కూడా తర్వాతి కాలంలో వచ్చాయని కోర్టు గుర్తుచేసింది. అందువల్ల అప్పట్లో తెలియని విధానాన్ని ఇప్పుడు కారణంగా చూపి ఉద్యోగికి పెన్షన్ ప్రయోజనాన్ని పూర్తిగా నిరాకరించడం సరైంది కాదని అభిప్రాయపడింది. అయితే ఈ తీర్పుతో ప్రతి ఉద్యోగికి ఆటోమేటిక్‌గా పాత పెన్షన్ వస్తుందని అర్థం కాదు. 2023 నిబంధనల ప్రకారం ఉద్యోగి అర్హతను అధికారులు పరిశీలించాల్సి ఉంటుంది. అర్హత ఉంటే అవసరమైన ప్రయోజనాలు ఇవ్వాలని కోర్టు ఆదేశించింది.

ప్రభుత్వ ఉద్యోగుల పెన్షన్

ఈ తీర్పు పాత ఉద్యోగం నుంచి మరో ప్రభుత్వ ఉద్యోగానికి మారిన వారికి ముఖ్యమైన సందేశంగా మారింది. కేవలం ఒక విధానపరమైన లోపం కారణంగా సంక్షేమ ప్రయోజనాన్ని పూర్తిగా నిరాకరించకూడదని కోర్టు స్పష్టం చేసింది.