Oil Free Crispy Pooris: ఎయిర్ ప్రైయర్ లేకుండా కూడా నూనె పీల్చని పూరీలు ఎలా చేయాలో తెలుసా..

పూరీ పిండి చిట్కాలు

పూరీ అంటే పిల్లల నుంచి పెద్దల వరకు చాలామందికి ఇష్టమైన టిఫిన్. వేడి వేడి పూరీలను బంగాళాదుంప కూరతో తింటే రుచి అదిరిపోతుంది. అయితే ఇంట్లో పూరీలు తయారు చేసేటప్పుడు ఒక సమస్య చాలామందిని ఇబ్బంది పెడుతుంది. పూరీలు నూనెను ఎక్కువగా పీల్చుకోవడం, కొద్దిసేపటికే మెత్తగా మారడం వంటివి జరుగుతుంటాయి. అయితే కొన్ని సింపుల్ చిట్కాలు పాటిస్తే పూరీలు తక్కువ నూనెతోనే కరకరలాడుతూ, బాగా పొంగేలా తయారు చేసుకోవచ్చు.

పూరీ వంటకం

పూరీ పిండిలో బొంబాయి రవ్వ లేదా సూజీ కలపడం ఒక ముఖ్యమైన చిట్కా. రెండు కప్పుల గోధుమపిండికి సుమారు రెండు టేబుల్ స్పూన్ల రవ్వ కలిపితే పూరీలు మంచి టెక్స్చర్‌తో వస్తాయి. రవ్వ పిండిలోని తేమను కొంత నియంత్రించడంలో సహాయపడుతుంది. దీంతో పూరీలు వేయించేటప్పుడు ఎక్కువగా నూనె పీల్చుకునే అవకాశం తగ్గుతుంది. రవ్వ అందుబాటులో లేకపోతే కొద్దిగా శనగపిండి కూడా ఉపయోగించవచ్చు.

నూనె తక్కువగా పీల్చే పూరీలు

ఇక పూరీ పిండిని చపాతీ పిండిలా చాలా మెత్తగా కలపకూడదు. కొద్దికొద్దిగా నీటిని పోస్తూ గట్టిగా పిండి కలుపుకోవాలి. పిండి కలిపే సమయంలో ఒక చిన్న స్పూన్ వేడి నూనె లేదా నెయ్యి వేసుకుంటే పూరీలు మంచి టెక్స్చర్‌తో వస్తాయి.

ఇంట్లో పూరీలు

మరో ముఖ్యమైన విషయం పిండిని ఎక్కువసేపు నానబెట్టకపోవడం. పూరీ పిండిని గంటల తరబడి ఉంచాల్సిన అవసరం లేదు. పిండి కలిపిన తర్వాత సుమారు 10 నుంచి 15 నిమిషాల్లో పూరీలు చేసుకోవచ్చు. పూరీలు ఒత్తేటప్పుడు ఎక్కువగా పొడి పిండి ఉపయోగించకపోవడం మంచిది. బదులుగా పీటకు, లట్టణానికి కొద్దిగా నూనె రాసుకుని పూరీలను ఒత్తుకోవచ్చు. పూరీ మరీ పలుచగా లేదా మరీ మందంగా కాకుండా మధ్యస్థంగా ఉండేలా చూసుకోవాలి.

పూరీ కుకింగ్ టిప్స్

ఇక నూనె వేడి కూడా చాలా ముఖ్యం. నూనె సరిగ్గా వేడెక్కకపోతే పూరీలు ఎక్కువ నూనె పీల్చుకునే అవకాశం ఉంటుంది. నూనెలో చిన్న పిండి ముక్క వేసినప్పుడు అది వెంటనే పైకి తేలితే నూనె సరైన వేడిలో ఉన్నట్లు అర్థం. పూరీని నూనెలో వేసిన వెంటనే గరిటెతో తేలికగా నొక్కితే అది బాగా పొంగుతుంది. రెండు వైపులా వేగంగా వేయించి బంగారు రంగు వచ్చిన వెంటనే బయటకు తీసేయాలి. ఇలా పిండిలో కొద్దిగా రవ్వ కలపడం, పిండిని గట్టిగా కలపడం, నూనెను సరైన వేడిలో ఉంచడం వంటి చిన్న చిట్కాలు పాటిస్తే ఇంట్లోనే మంచి పూరీలు తయారు చేసుకోవచ్చు.