Abhishek Sharma T20 Ranking: ఐసీసీ టీ20 ర్యాంకింగ్స్‌లో దూసుకెళ్లిన అభిషేక్ శర్మ..విధ్వంసకర బ్యాటింగ్‌తో ఒక్కసారిగా అగ్రస్థానానికి!

Abhishek Sharma ICC T20 Ranking: వెల్లింగ్టన్ వేదికగా న్యూజిలాండ్‌తో జరిగిన మూడో టీ20ఐ మ్యాచ్‌లో అభిషేక్ శర్మ తన విద్వంసకర బ్యాటింగ్‌తో ప్రత్యర్థి బౌలర్లను పూర్తిగా చిన్నాభిన్నం చేశాడు. క్రీజులోకి వచ్చిన తొలి క్షణం నుంచే భారీ షాట్లు ఆడుతూ విరుచుకుపడిన అతడు, కేవలం 35 బంతుల్లోనే తన సెంచరీ మైలురాయిని పూర్తి చేసుకున్నాడు.

మొత్తం 38 బంతుల్లో ఫోర్లు, సిక్సర్లతో 113 పరుగులు సాధించి మ్యాచ్‌ను భారత్ వైపు ఏకపక్షంగా మార్చేశాడు. ఆరంభం నుంచే వేగంగా పరుగులు చేస్తూ న్యూజిలాండ్ బౌలర్లకు కోలుకునే అవకాశం ఇవ్వకుండా, భారత జట్టు భారీ స్కోరు సాధించడానికి, అద్భుత విజయం అందుకోవడానికి మార్గం సుగమం చేశాడు.

ర్యాంకింగ్స్ పాయింట్ల వివరాలు..
తాజా ఐసీసీ టీ20ఐ బ్యాటింగ్ ర్యాంకింగ్స్‌లో అభిషేక్ శర్మ 897 రేటింగ్ పాయింట్లతో నంబర్ 1 స్థానాన్ని దక్కించుకున్నాడు. గతంలో మొదటి స్థానంలో ఉన్న భారత వికెట్ కీపర్ - బ్యాట్స్‌మెన్ ఇషాన్ కిషన్ ప్రస్తుతం 866 పాయింట్లతో మూడో స్థానానికి చేరాడు. పాకిస్థాన్ ఆటగాడు సాహిబ్జాదా ఫర్హాన్ 883 పాయింట్లతో రెండో స్థానంలో కొనసాగుతూ, టాప్‌లో ఉన్న అభిషేక్ శర్మ కంటే 14 పాయింట్లు వెనుకబడి ఉన్నాడు. అంతకుముందు అభిషేక్ రెండో స్థానంలో ఇషాన్ మొదటి స్థానంలో ఉండేవారు.

ర్యాంకింగ్స్ చరిత్ర..
అభిషేక్ శర్మ 2025 జూలై నెలలో ఆస్ట్రేలియాకు చెందిన ట్రావిస్ హెడ్‌ను అధిగమించి మొదటిసారిగా ప్రపంచ నంబర్ 1 టీ20ఐ బ్యాట్స్‌మన్‌గా నిలిచాడు. ఆ తర్వాత ఈ ఏడాది జూలైలో ఐర్లాండ్‌పై అద్భుత ప్రదర్శన కనబరిచిన ఇషాన్ కిషన్, అభిషేక్‌ను దాటి ప్రపంచ నంబర్ 1 స్థానాన్ని కైవసం చేసుకున్నాడు.

ఇప్పుడు మళ్లీ న్యూజిలాండ్‌పై సాధించిన సంచలన సెంచరీతో అభిషేక్ శర్మ తన అగ్రపీఠాన్ని పునరుద్ధరించుకుని, భారత జట్టుకు మరో ప్రధాన విజయాన్ని అందించాడు.

అభిషేక్ శర్మ ప్రత్యేక బ్యాటింగ్ శైలి..
భారత టీ20 జట్టులో అభిషేక్ శర్మ అత్యంత దూకుడుగా ఆడే బ్యాట్స్‌మెన్‌లలో ఒకడిగా పేరుగాంచాడు. సాంప్రదాయ పద్ధతిలో ఇన్నింగ్స్‌ను నిర్మించడం కంటే, పవర్‌ప్లే నుంచే ప్రత్యర్థి బౌలర్లపై ఒత్తిడి తేవడంపై అతని బ్యాటింగ్ శైలి దృష్టి పెడుతుంది. అతి తక్కువ సమయంలో మ్యాచ్ గమనాన్ని మార్చగల సామర్థ్యం అతని బ్యాటింగ్‌ను మరింత ప్రత్యేకం చేస్తోంది.