IPL 2027 Captaincy: ఐపీఎల్ వేలానికి ముందే కెప్టెన్సీ టెన్షన్..ఆ 5 టీమ్స్ కొత్త సారథుల మార్పుపై సస్పెన్స్!
IPL 2027 Captaincy Race: ఇండియన్ ప్రీమియర్ లీగ్ 2027 వేలానికి ముందు పలు ఫ్రాంచైజీల్లో కెప్టెన్సీ మార్పులపై ఆసక్తికర చర్చ సాగుతోంది. ముంబయి ఇండియన్స్లో తిలక్ వర్మ, కేకేఆర్లో రింకూ సింగ్, ఢిల్లీలో రిషభ్ పంత్, లఖ్నవూలో ఐదెన్ మార్క్రమ్, సన్రైజర్స్లో ఇషాన్ కిషన్ పేర్లు తెరపైకి వచ్చాయి. కొత్త సీజన్కు నాయకత్వ ఎంపికలు ఎలా ఉంటాయన్నది అభిమానుల్లో ఆసక్తి పెంచుతోంది.
IPL 2027 Captaincy Race: ఇండియన్ ప్రీమియర్ లీగ్ 2027 సీజన్కు సంబంధించిన ఆటగాళ్ల రిటెన్షన్, రిలీజ్ ప్రక్రియ ముగియడంతో వచ్చే నెలలో వేలం జరగనుంది. ఈ కీలక తరుణంలో ముంబయి ఇండియన్స్, దిల్లీ క్యాపిటల్స్, కేకేఆర్, లఖ్నవూ, సన్రైజర్స్ వంటి ప్రముఖ ఫ్రాంచైజీలను కెప్టెన్సీ సమస్య వెంటాడుతోంది. భవిష్యత్ అవసరాలు, గత ప్రదర్శనల ఆధారంగా కొత్త సారథులను ఎంపిక చేసేందుకు యాజమాన్యాలు కసరత్తు చేస్తున్నాయి. అయితే జట్టు కూర్పుతో పాటు పలు కీలక జట్లను నాయకత్వ సమస్య కలవరపెడుతోంది. ఆటగాళ్ల మార్పులు, చేర్పుల అనంతరం ఆయా జట్లను ముందుకు నడిపించేందుకు కొత్త ముఖాలు తెరపైకి వస్తున్నాయి
కోల్కతా నైట్రైడర్స్ నయా సారథి!
గత సీజన్లో కోల్కతా నైట్రైడర్స్ కెప్టెన్గా వ్యవహరించిన అజింక్యా రహానే వీడ్కోలు పలకడంతో కోల్కతా నైట్రైడర్స్ జట్టులో సారథి స్థానం ఖాళీ అయింది. ఇతర ఆటగాళ్లు పోటీలో ఉన్నప్పటికీ, గత సీజన్లలో వైస్ కెప్టెన్గా వ్యవహరించిన విధ్వంసకర బ్యాటర్ రింకూ సింగ్ను పూర్తిస్థాయి కెప్టెన్గా నియమించే అవకాశాలు బలంగా ఉన్నాయని వార్తలు వినిపిస్తున్నాయి.
దిల్లీ క్యాపిటల్స్ జట్టులో కెప్టెన్సీకి పోటీ!
సొంతగూటికి చేరిన రిషభ్ పంత్కు నాయకత్వం అప్పగించేందుకే తెచ్చారని ప్రచారం సాగుతోంది. అయితే గత సీజన్లో నడిపించిన అక్షర్ పటేల్తో పాటు సీనియర్ బ్యాటర్ కేఎల్ రాహుల్ కూడా పగ్గాలపై ఆశలు పెట్టుకోవడంతో దిల్లీ సారథ్య రేసు రసవత్తరంగా మారింది.
లఖ్నవూ సూపర్ జెయింట్స్కు కెప్టెన్ అతనే?
గతంలో ఈ జట్టుకు నాయకత్వం వహించిన రిషభ్ పంత్ ప్రస్తుతం ఢిల్లీ క్యాపిటల్స్ జట్టుకు ట్రేడ్ అవ్వగా.. కుల్దీప్ యాదవ్ లఖ్నవూ సూపర్ జెయింట్స్ గూటికి చేరాడు. నికోలస్ పూరన్, మిచెల్ మార్ష్ రేసులో ఉన్నప్పటికీ, గతంలో సన్రైజర్స్ను నడిపించిన అపార అనుభవం ఉన్న సీనియర్ ప్లేయర్ ఐదెన్ మార్క్రమ్కు పగ్గాలు దక్కే అవకాశాలు స్పష్టంగా ఉన్నాయి.
ముంబయి ఇండియన్స్ కొత్త కెప్టెన్ ఎవరు?
ఐపీఎల్ చరిత్రలో అత్యధిక టైటిళ్లు గెలిచిన ముంబయి ఇండియన్స్ గత కొన్ని సీజన్లుగా ఆశించిన స్థాయిలో రాణించలేకపోతోంది. హార్దిక్ పాండ్య నాయకత్వంలోనూ జట్టు మెరుగైన ఫలితాలు సాధించకపోవడంతో అతడిని పంజాబ్కు ట్రేడ్ చేసి, అక్కడి నుంచి అర్ష్దీప్ను తీసుకుంది. ఈ క్రమంలో సీనియర్లు జస్ప్రీత్ బుమ్రా, సూర్యకుమార్ యాదవ్, రోహిత్ శర్మలతో పాటు యువ బ్యాటర్ తిలక్ వర్మ పేర్లు పరిశీలనలో ఉన్నాయి. జట్టు దీర్ఘకాలిక భవిష్యత్తును దృష్టిలో పెట్టుకుని తిలక్ వర్మకే సారథ్య బాధ్యతలు అప్పగించే అవకాశాలు ఎక్కువగా కనిపిస్తున్నాయి.
సన్రైజర్స్ హైదరాబాద్కు పాట్ కమిన్స్ దూరం?
సన్రైజర్స్ హైదరాబాద్ జట్టులో సరికొత్త దూకుడు నింపి ఎన్నో రికార్డులు సృష్టించిన పాట్ కమిన్స్ అందుబాటుపై ఇంకా స్పష్టత రాలేదు. ఒకవేళ అతడు అందుబాటులో లేకపోతే గత సీజన్ తొలి భాగంలో సారథిగా ఉన్న ఇషాన్ కిషన్కు మళ్లీ బాధ్యతలు అప్పగించే ఛాన్స్ ఉంది. అదే సమయంలో యువ ఓపెనర్ అభిషేక్ శర్మ కూడా ఈ రేసులో ఉండే అవకాశం కనిపిస్తోంది.