Virat Kohli World Cup: "2027 ప్రపంచకప్ నా చివరి మ్యాచ్": విండీస్ సిరీస్‌కు ముందు విరాట్ కోహ్లీ సంచలన ప్రకటన

Virat Kohli 2027 World Cup: దక్షిణాఫ్రికా ఆతిథ్యం ఇవ్వబోయే 2027 ఐసీసీ పురుషుల క్రికెట్ ప్రపంచకప్‌పై భారత దిగ్గజ ఆటగాడు విరాట్ కోహ్లీ గట్టి దృష్టి సారించారు. వెస్టిండీస్‌తో వన్డే సిరీస్ ప్రారంభానికి ముందు నిర్వహించిన ఒక ఇంటర్వ్యూలో మాట్లాడిన కోహ్లీ, రాబోయే 50 ఓవర్ల ప్రపంచకప్ భారత్ తరపున తాను ఆడబోయే చివరి వన్డే ప్రపంచకప్ అని తేల్చి చెప్పారు.

వన్డే ప్రపంచకప్‌లోని ఒత్తిడి గురించి వివరిస్తూ.. దాదాపు 10 మ్యాచ్‌లను టీ20 స్థాయి తీవ్రతతో ఆడాల్సి ఉంటుందని, ఇది విదేశీ పరిస్థితులలో ఒక ఆటగాడి నుంచి అత్యుత్తమ ప్రదర్శనను కోరుకుంటుందని వ్యాఖ్యానించారు. భారత జట్టుకు ప్రపంచ కప్ అందించడమే తనకు అతిపెద్ద ప్రేరణ అని, దానికోసం ఏది చేయాల్సి వచ్చినా పూర్తిగా సిద్ధంగా ఉన్నానని ఆయన స్పష్టం చేశారు.

ప్రపంచ కప్ చరిత్రలోనే అద్భుతమైన రికార్డు ఉన్న కోహ్లీ, ఇప్పటివరకు 37 వన్డే ప్రపంచ కప్ మ్యాచ్‌లలో 59.83 సగటుతో 1,795 పరుగులు చేశారు. అందులో 5 సెంచరీలు, 12 అర్ధ సెంచరీలు సాధించగా, అత్యధిక స్కోరు 117 గా ఉంది. తన మొత్తం వన్డే కెరీర్‌లో 302 ఇన్నింగ్స్‌లలో 58.59 సగటుతో 14,941 పరుగులు సాధించి, 54 సెంచరీలు, 79 అర్ధ సెంచరీలు నమోదు చేశారు. అంతేకాకుండా టీ20 ప్రపంచ కప్‌లలో 35 మ్యాచ్‌లలో 1,292 పరుగులు చేసి, 2014, 2016లలో రెండుసార్లు 'ప్లేయర్ ఆఫ్ ది టోర్నమెంట్'గా ఎంపికయ్యారు.

మరోవైపు, రోహిత్ శర్మ మాట్లాడుతూ ఐసీసీ టోర్నమెంట్‌లలో ఆడటం ఒక ప్రత్యేకమైన సవాలని వ్యాఖ్యానించారు. మైదానంలో ఆడుతున్నంత కాలం కొత్త లక్ష్యాలు ఎదురవుతూనే ఉంటాయని, విభిన్న ప్రత్యర్థులు, వేదికలపై ఆడేందుకు భిన్నమైన వ్యూహాలు అవసరమని చెప్పారు. భారత్, వెస్టిండీస్ మధ్య మొదటి వన్డే మ్యాచ్ ఆదివారం మధ్యాహ్నం 2 గంటలకు ప్రారంభమై, Jio Hotstar (జియో హాట్‌స్టార్), Star Sports Network (స్టార్ స్పోర్ట్స్ నెట్‌వర్క్) ద్వారా ప్రత్యక్ష ప్రసారం కానుంది.