సర్కారు బడికి కళొచ్చింది.. అల్పాహారంతో 22శాతం పెరిగిన హాజరు.. బడి పిల్లలకు అత్యంత ఇష్టమైన టిఫిన్ ఏంటో తెలుసా?

Breakfast Scheme: తెలంగాణ సర్కారు బడుల్లో బ్రేక్ ఫాస్ట్ స్కీమ్ సత్ఫలితాలను ఇస్తోంది. స్కూళ్లలో ఉదయం టిఫిన్ అందుబాటులోకి రావడంతో విద్యార్థుల హాజరు శాతం పెరిగింది. అంతేకాదు వారి ఆరోగ్యం కూడా బాగుంటుందని తేలింది. గతంతో పోల్చుకుంటే పిల్లల ఆకలి ఫిర్యాదులు గణనీయంగా తగ్గాయి. రాష్ట్రంలోని కోస్గీ, బొంరాసిపేట, దోమ, దౌల్తాబాద్, దుద్యాల, కొడంగల్, కుల్కచర్ల, పరిగి, తాండూర్, యాలాల్ మండలాల్లోని ప్రభుత్వ పాఠశాలల్లో బ్రేక్ ఫాస్ట్ స్కీమ్ ను ప్రభుత్వం ప్రారంభించిన సంగతి తెలిసిందే. ముఖ్యమంత్రి రేవంత్ రెడ్డి  ఆలోచన మేరకు కొడంగల్ లోని సెంట్రలైజ్డ్ కిచెన్ ద్వారా హరే క్రిష్ణ మూమెంట్ ఛారిటబుల్ ఫౌండేషన్ అమలు చేస్తున్న బ్రేక్ ఫాస్ట్ స్కీమ్ పై థర్డ్ విజన్ రీసెర్చ్ అండ్ సర్వీసెస్ సంస్థ సర్వే నిర్వహించిన ఓ రిపోర్టు రూపొందించింది.

ఈ సర్వేలో 1,153 మంది విద్యార్థులు, 575 మంది తల్లిదండ్రులు, 176 మంది ఉపాధ్యాయులు.. ప్రిన్సిపాల్స్ పాల్గొన్నారు. సర్వే నివేదిక ప్రకారం.. బ్రేక్ ఫాస్ట్ స్కీమ్  ప్రారంభించినప్పటి నుండి 60 పాఠశాలల్లో 1,525 మంది కొత్త విద్యార్థులు చేరినట్లు తేలింది. 99.9శాతం మంది విద్యార్థులు పాఠశాలల్లో అందించే బ్రేక్ ఫాస్ట్  తింటున్నారు.  సర్కారు బడుల్లో బ్రేక్ ఫాస్ట్ తోపాటు  పాలు అందుబాటులో ఉన్నాయని 99.7శాతం మంది తల్లిదండ్రులకు ఈ విషయం తెలుసని నివేదిక స్పష్టం చేసింది. ఈ పథకం అమలుపై ఉపాధ్యాయులు కూడా సానుకూల అభిప్రాయాలను వ్యక్తం చేశారు. వారిలో 98.9శాతం మంది నిర్వహణ బాగా పనిచేస్తోందని, 97.7శాతం మంది అల్పాహారం సమయానికి అందిస్తున్నారని చెప్పారు.

గత విద్యా సంవత్సరంతో పోలిస్తే సగటు విద్యార్థుల హాజరు 20-22శాతం పెరిగిందని, ఆకలి ఫిర్యాదులు 98.3శాతం తగ్గాయని నివేదిక పేర్కొంది. 92.7 శాతం మంది విద్యార్థులు అల్పాహారం నాణ్యత బాగుందని, 91.3 శాతం మంది రుచి బాగుందని, 84.6 శాతం మంది ఫర్వాలేదని చెప్పినట్లు తేలింది. ఉపాధ్యాయుల అభిప్రాయం ప్రకారం, రుచి.. పరిమాణం రెండింటిలోనూ మెరుగుదల అవసరం. 76.5 శాతం మంది ఉపాధ్యాయులు రుచికి మంచి రేటింగ్ ఇవ్వగా, 76.7 శాతం మంది కేవలం పరిమాణానికి మాత్రమే ఇచ్చారు. 43.6 శాతం మంది నాణ్యతను మెరుగుపరచాలని, 33.1 శాతం మంది ఇతర సౌకర్యాలను మెరుగుపరచాలని సూచించారు.

95 శాతానికి పైగా విద్యార్థులు ఎక్కువగా బోండా-చట్నీ..  దోస-చట్నీ టిఫిన్లు తింటున్నారని..  93.6 శాతం మంది జొన్నలతో చేసిన ఇడ్లీ-సాంబార్‌ను ఇష్టపడ్డారని నివేదిక పేర్కొంది. 92 శాతం మందికి పాలు, 89.7 శాతం మందికి ఇడ్లీ-సాంబార్, 88 శాతం మందికి పూరీ-బంగాళాదుంప కుర్మా నచ్చాయి. కేవలం 75 శాతం మంది మాత్రమే ఉప్మా చట్నీకి సానుకూలంగా స్పందించారు. 29.2 శాతం మంది విద్యార్థులు మెనూలో వడను చేర్చాలని కోరుకుంటున్నారని నివేదిక పేర్కొంది.