కాగితాల్లో లెక్కలే కానీ చేతికి సున్నా..ఈ-కుబేర్‌లో మగ్గుతున్న CPS ఉద్యోగుల DA నిధులు..!!

CPS Employees DA Arrears e-Kuber: రాష్ట్రంలో కాంట్రిబ్యూటరీ పెన్షన్ స్కీమ్ (CPS) పరిధిలోని ఉద్యోగులు, ఉపాధ్యాయులకు చెల్లించాల్సిన డీఏ (DA) బకాయిలు సాంకేతిక, ఆర్థిక ప్రక్రియల మధ్యే నిలిచిపోతున్నాయి. ప్రభుత్వ ఆదేశాల మేరకు ట్రెజరీల నుంచి బిల్లులు ఈ-కుబేర్ కు చేరుతున్నప్పటికీ.. అక్కడి నుంచి ఉద్యోగుల ఖాతాల్లో జమ కావడంలో తీవ్ర జాప్యం జరుగుతుండటంతో ఉద్యోగ వర్గాల్లో తీవ్ర ఆందోళన వ్యక్తమవుతోంది.

'ఈ-కుబేర్' అనేది భారతీయ రిజర్వ్ బ్యాంక్ (RBI) నిర్వహిస్తున్న కోర్ బ్యాంకింగ్ సొల్యూషన్ సిస్టమ్. రాష్ట్ర ప్రభుత్వాలు తమ ఉద్యోగుల జీతాలు, పెన్షన్లు, ఇతర బకాయిల చెల్లింపులను నేరుగా లబ్ధిదారుల బ్యాంక్ ఖాతాల్లో జమ చేయడానికి ఈ పోర్టల్‌ను ఉపయోగిస్తాయి.

ట్రెజరీల నుంచి బిల్లులు ఆమోదం పొందిన తర్వాత అవి ఈ-కుబేర్ కు చేరుతాయి. అక్కడి నుంచి ప్రభుత్వ ఖాతాలోని నిధుల లభ్యత ఆధారంగా ఆర్బీఐ ద్వారా నేరుగా ఉద్యోగుల వ్యక్తిగత ఖాతాల్లోకి నగదు బదిలీ అవుతుంది. అయితే.. బిల్లులు ఈ-కుబేర్ కు చేరినప్పటికీ, ప్రభుత్వ ఖాతాలో తగినన్ని నిధులు లేకపోతే అవి అక్కడే పెండింగ్‌లో ఉండిపోతాయి.

బకాయిల లెక్కలు.. ఈ-కుబేర్ లో పెండింగ్ ఇదీ:
తాజా గణాంకాల ప్రకారం సీపీఎస్ ఉద్యోగులకు సంబంధించిన మూడు జీవోల పరిధిలోని డీఏ బకాయిలు అత్యధికంగా ఈ-కుబేర్ లోనే నిలిచిపోయాయి.

GO.120 (తేదీ: 30.10.2024): దీని కింద మొత్తం 17 వాయిదాలు చెల్లించాల్సి ఉంది. ఈ 17 వాయిదాలకు సంబంధించిన బిల్లులు ఈ-కుబేర్ కు చేరుకున్నాయి. కానీ, అందులో కేవలం ఒక (1) వాయిదా మాత్రమే క్లియర్ అవ్వగా.. మరో 16 వాయిదాలు ఇంకా పెండింగ్‌లోనే ఉన్నాయి.

GO.78 (తేదీ: 13.06.2025): ఈ ఉత్తర్వుల ప్రకారం మొత్తం 28 వాయిదాలు రావాల్సి ఉండగా.. 15 వాయిదాలు ఈ-కుబేర్ కు వెళ్లాయి. వీటిలో 2 మాత్రమే క్లియర్ అయ్యాయి, మిగతా 13 వాయిదాలు పెండింగ్‌లో ఉన్నాయి.

GO.2 (తేదీ: 12.01.2026): దీని ద్వారా మొత్తం 30 వాయిదాలు చెల్లించాల్సి ఉంది. కేవలం 8 వాయిదాలు మాత్రమే ఈ-కుబేర్ కు చేరగా, అందులో ఒక్కటి కూడా క్లియర్ కాలేదు. మొత్తం 8 పెండింగ్‌లోనే ఉండిపోయాయి.

సమగ్రంగా చూస్తే.. ఈ మూడు జీవోలకు కలిపి మొత్తం 75 వాయిదాల బకాయిలు రావలసి ఉంది. అందులో 40 వాయిదాలకు సంబంధించిన బిల్లులు ఈ-కుబేర్ ప్రాసెస్‌లో ఉండగా.. ఇప్పటి వరకు కేవలం 3 మాత్రమే క్లియర్ అయ్యాయి. ఏకంగా 37 వాయిదాలు ఇంకా పెండింగ్‌లోనే ఉన్నాయి.

ఉద్యోగ సంఘాల ఆవేదన ఇదే: 
హక్కుగా రావాల్సిన డీఏ బకాయిలు చేతికి అందకపోవడంపై ఉద్యోగ, ఉపాధ్యాయ సంఘాలు తీవ్ర ఆవేదన వ్యక్తం చేస్తున్నాయి. బిల్లులు ట్రెజరీల్లో పాస్ అయ్యి ఈ-కుబేర్ కు వెళ్లాయని అధికారులు చెబుతున్నప్పటికీ, అకౌంట్లలో మాత్రం పైసా జమ కావడం లేదని ఉద్యోగులు వాపోతున్నారు. సాంకేతికంగా బిల్లులు ప్రాసెస్‌లో ఉన్నట్లు చూపిస్తున్నా.. నెలల తరబడి అవి ఈ-కుబేర్ లోనే మగ్గిపోతుండటంతో ఆర్థికంగా ఎన్నో ఇబ్బందులు ఎదుర్కొంటున్నామని ఆందోళన చెందుతున్నారు.

పండుగల సమయం దగ్గరపడుతున్న నేపథ్యంలో, పెండింగ్‌లో ఉన్న మొత్తం 37 వాయిదాల బకాయిలను వెంటనే క్లియర్ చేసి తమ ఖాతాల్లో జమ చేయాలని.. కేవలం కాగితాలపై లెక్కలకు పరిమితం కాకుండా వాస్తవ రూపంలో నగదు అందించాలని ఉద్యోగ సంఘాలు ప్రభుత్వాన్ని ముక్తకంఠంతో డిమాండ్ చేస్తున్నాయి.