KT Rama Rao: నీళ్ల కోసం పోరాడిన రైతుల అరెస్ట్‌.. కేటీఆర్ తీవ్ర ఆగ్రహం
KTR Fire On Revanth Reddy About Farmers Arrest By Police: నీళ్లు లేక తమ పంటలు ఎండిపోతున్నాయని ఆవేదన చెందుతూ ఆందోళన చేపట్టిన రైతులను పోలీసులు అరెస్ట్‌ చేయడాన్ని బీఆర్ఎస్ పార్టీ వర్కింగ్ ప్రెసిడెంట్‌ ఖండించారు. రైతులతోపాటు బీఆర్ఎస్ పార్టీ నాయకులను అరెస్ట్‌పై పోలీసులపై మండిపడ్డారు.
Palamuru Farmers Protest: ఎల్‌నినో ప్రభావంతో ఇప్పటికే తీవ్ర వర్షాభావ పరిస్థితులు నెలకొనగా రైతులు సాగునీటి కోసం ఆందోళన చేపట్టారు. తమ పంటను కాపాడుకునేందుకు వీధి పోరాటానికి దిగారు. తమ పొలాలకు సాగునీరు అందించి పంటలను కాపాడాలని కోరుతూ రైతులు భారీ ఎత్తున నిరసన చేపట్టగా పోలీసులు ఎక్కడికక్కడ అరెస్ట్‌లు చేశారు. వారితోపాటు బీఆర్ఎస్ పార్టీ నాయకులను కూడా అరెస్ట్‌ చయేడంతో తీవ్ర ఉద్రిక్తత ఏర్పడింది. రైతులు, గులాబీ పార్టీ నాయకుల అరెస్ట్‌ను బీఆర్ఎస్ పార్టీ వర్కింగ్ ప్రెసిడెంట్‌ కేటీఆర్ ఖండించారు.
జూరాల ఆయకట్టుకు సాగునీరిచ్చి పంటలు కాపాడాలని రైతుల పక్షాన డిమాండ్ చేసిన ఉమ్మడి పాలమూరు జిల్లా బీఆర్ఎస్ పార్టీ నాయకులను అక్రమంగా అరెస్టు చేయడం అత్యంత దుర్మార్గమైన చర్య మాజీ మంత్రి కేటీఆర్ తెలిపారు. మాజీ మంత్రులు సింగిరెడ్డి నిరంజన్ రెడ్డి, సి.లక్ష్మారెడ్డి, శ్రీనివాస్ గౌడ్, మాజీ ఎమ్మెల్యేలను, బీఆర్ఎస్ పార్టీ నాయకుందరినీ అక్రమంగా నిర్బంధించడం రేవంత్ రెడ్డి రాక్షస మనస్తత్వానికి నిదర్శనం అని ఆగ్రహం వ్యక్తం చేశారు.
'కళ్లముందే పంటలు ఎండిపోయి అల్లాడుతున్న అన్నదాతల గోసను ప్రభుత్వం తీర్చాల్సిందిపోయి.. న్యాయమైన డిమాండ్‌తో నిరసనకు సిద్ధమైన బీఆర్ఎస్ పార్టీ శ్రేణులను అణచివేసేందుకు రేవంత్ సర్కారు కుట్ర చేస్తోంది' అని మాజీ మంత్రి కేటీఆర్ విమర్శించారు. 'సీఎంగా విఫలమైన రేవంత్ రెడ్డి తన చేతకానితనాన్ని కప్పిపుచ్చుకోవడానికి.. జిల్లాలోని అనేక మండలాల్లో బీఆర్ఎస్ పార్టీ నాయకుల ముందస్తు అరెస్టులు, గృహనిర్బంధాలకు చీకటి ఆదేశాలిచ్చాడు' అని తెలిపారు.
'జూరాల ప్రాజెక్టులో 9 టీఎంసీల నీటి లభ్యత ఉన్నా కూడా విడుదల చేయకుండా పనికిరాని కుంటిసాకులతో రేవంత్ సర్కార్‌ పచ్చని పంటల ఉసురు తీస్తోంది' అని బీఆర్ఎస్ పార్టీ వర్కింగ్ ప్రెసిడెంట్‌ కేటీఆర్ ఆవేదన వ్యక్తం చేశారు. తమ పంటలను కాపాడుకునే ఏకైక తపనతో గుండెపగిలిన రైతులు జూరాల గేట్లు ఎత్తే ప్రయత్నం చేస్తే.. వారిపై అక్రమ కేసులు బనాయించిన ప్రభుత్వం అన్నదాతలను అన్నివిధాలా అరిగోస పెడుతోందని మండిపడ్డారు.
తెలంగాణ గడ్డపై ఉన్న జూరాల ప్రాజెక్టు పరిసరాల్లోకి రైతులు రాకుండా ఎక్కడికక్కడ బారికేడ్లు ఏర్పాటుచేసి, వందలాది పోలీసులను చుట్టుపక్కల మోహరించడం ముమ్మాటికీ సిగ్గుమాలిన చర్య అని మాజీ మంత్రి కేటీఆర్ తెలిపారు. తాగునీటికి కేవలం రెండు టీఎంసీలు సరిపోతాయని తెలిసినా.. 9 టీఎంసీలు ఉన్న జూరాల నుంచి చుక్క నీరు విడుదల చేయకుండా ప్రాజెక్టు కింద ఉన్న ఆయకట్టు రైతులను సంక్షోభంలోకి నెట్టడం క్షమించరాని పాపం అని రేవంత్ రెడ్డి తీరును కేటీఆర్ ఖండించారు.
అక్రమంగా అరెస్టు చేసిన బీఆర్ఎస్ పార్టీ నాయకులను ప్రభుత్వం విడుదల చేయడంతోపాటు జూరాల ఆయకట్టు రైతులకు వెంటనే రిలీజ్ చేయాలని మాజీ మంత్రి కేటీఆర్ డిమాండ్ చేశారు. లేకపోతే అన్నదాతల ఆగ్రహానికి ఈ కాంగ్రెస్ సర్కారు కుప్పకూలడం ఖాయం అని హెచ్చరించారు.
