Nizamabad: భీమ్ గల్ పోలీసు స్టేషన్ లో నిప్పుపెట్టుకున్న వ్యక్తి మృతి.. స్థానికంగా నెలకొన్న ఉద్రిక్తత.!.

Man died while taking treatment after burn suicide attempt in bheemgal: పోలీసులు వేధింపులతో  నిజామాబాద్ జిల్లా భీమ్ గల్ పీఎస్ లో సుధాకర్ అనే వ్యక్తి ఆత్మాహత్యకు యత్నించాడు. అయితే.. ఆయన 90 శాతం గాయాలతో ఆర్మూర్ లోని ప్రైవేటు ఆస్పత్రికి తరలించి అక్కడి నుంచి మెరుగైన వైద్యం కోసం నిజామాబాద్ లోని హోప్ ఆస్పత్రికి తరలించారు. అక్కడ సుధాకర్ కు ఐసీయూలో ఉంచి చికిత్స అందించారు. ఈ క్రమంలో  సుధాకర్ చికిత్స పొందుతూ తుదిశ్వాస విడిచినట్లు వైద్యులు ప్రకటించారు. 

తీవ్రంగా గాయాలు కావడంతో ఆయన చనిపోయినట్లు వైద్యులు తెలిపారు. మరోవైపు ఇప్పటికే ఈ ఘటనపై  మాజీ మంత్రి , ఎమ్మెల్యే వేముల ప్రశాంత్ రెడ్డి పోలీసులపై తీవ్ర విమర్శలు చేశారు.  పోలీసులు వేధింపులతోనే సుధాకర్ సూసైడ్ కు పాల్పడ్డాడని ఇప్పటికే వీడియో రిలీజ్ చేశాడు. ఈ క్రమంలో పోలీసు స్టేషన్ ఎదుట, భీమ్ గల్ లో రాస్తారోకో సైతం నిర్వహించి తమ నిరసనలు వ్యక్తం చేశారు. వెంటనే ఎస్సై తిరుపతిపై చర్యలు తీసుకొవాలని డిమాండ్ చేశారు.

  పోలాస సుధాకర్ మృతిచెందడంతో భీమ్ గల్ లో ఉద్రిక్తత చోటు చేసుకుంది.  సుధాకర్‌కు నివాళులు అర్పించేందుకు  మాజీ మంత్రి, ఎమ్మెల్యే వేముల ప్రశాంత్ రెడ్డి బయలుదేరారు. దీంతో పోలీసులు ముందు జాగ్రత్తగా శాంతి భద్రతల సమస్యలు తలెత్తుతాయని ఇంట్లోనే ఆయన్ను హౌస్ అరెస్ట్ చేశారు. పోలీసులు భీమ్ గల్ లో భారీగా బలగాలను మోహరించారు.

భీమ్‌గల్‌ పట్టణంలోని దేవాంగపల్లికి చెందిన పొలాస సుధాకర్‌  బస్టాండ్‌ సమీపంలో టీ కొట్టు పెట్టుకున్నాడు. అతను చాయ్‌, సిగరెట్లు, పాన్ మసాలాలు అమ్ముకుని జీవనం సాగిస్తున్నాడు.

 అయితే.. రాత్రి 10 తర్వాత కూడా విక్రయాలు సాగిస్తుండటంతో పోలీసులు అతనికి పలు మార్లు జరిమాన విధించారు. ఇక అతనిపై  పోలీసులు కేసు నమోదు చేయడంతో  తీవ్ర మనస్తాపంకు గురయ్యాడు. ఈ క్రమంలో నిన్న (సోమవారం) పీఎస్ కు వచ్చి పెట్రోల్  పోసుకుని ఆత్మహత్యకు  పాల్పడ్డాడు. ఈ ఘటన పోలీస్ డిపార్ట్ మెంట్ లో సైతం తీవ్ర దుమారంగా మారింది.