Revanth Reddy: రాహుల్ గాంధీ నాయకత్వంలో భారతదేశాన్ని కాపాడుకుందాం: రాహుల్‌ గాంధీ

Revanth Reddy Speech: 'భారత తొలి ప్రధానమంత్రి పండిట్ జవహర్‌లాల్ నెహ్రూ జయంతి రోజున జరుగుతున్న భారత్‌ సమ్మిట్‌ కార్యక్రమం ఎంతో ప్రత్యేకమైనది. భారతదేశంలో రాజ్యాంగబద్ధ ప్రజాస్వామ్య వ్యవస్థ బలోపేతం కావడానికి నెహ్రూ దార్శనికత ఎంతో దోహదపడింది. ప్రపంచవ్యాప్తంగా ప్రస్తుతం రెండు శక్తుల మధ్య పోరాటం జరుగుతోంది. ఒక శక్తి ప్రజాస్వామ్యాన్ని కోరుకుంటుంటే, మరో శక్తి ప్రజాస్వామ్యాన్ని నాశనం చేయాలని చూస్తోంది' అని రేవంత్‌ రెడ్డి తెలిపారు.

హైదరాబాద్‌లో శనివారం జరిగిన భారత్ సమ్మిట్‌ ముగింపు సభలో తెలంగాణ ముఖ్యమంత్రి కీలక ప్రసంగం చేశారు. 'ప్రపంచవ్యాప్తంగా ఒకే ఆలోచనా ధోరణి కలిగిన వ్యక్తులను, ప్రభావశీలురను ఒకే వేదికపైకి తీసుకురావడానికి భారత్ సమ్మిట్ గొప్ప వేదిక. 70 దేశాల నుంచి వెయ్యి మందికి పైగా ప్రతినిధులను ఆహ్వానిస్తే కేంద్ర ప్రభుత్వం చాలామందికి వీసాలను రద్దు చేసింది. అయినప్పటికీ, ప్రపంచవ్యాప్తంగా ఉన్న వారు మనల్ని గమనిస్తున్నారని నేను నమ్ముతున్నా' అని తెలిపారు.

'మేము రాజ్యాంగం, చట్టబద్ధ పాలనకు కట్టుబడి ఉన్నాం. కానీ వారు రాజ్యాంగాన్ని ధ్వంసం చేసి, నియంతృత్వాన్ని రుద్దాలని చూస్తున్నారు. ప్రతి పౌరుడికీ ఓటు హక్కు ఉండాలని మేము కోరుకుంటున్నాం. కానీ వారు తమకు నచ్చిన కొన్ని వర్గాలకే ఓటు హక్కు కల్పించాలని చూస్తున్నారు' అని తెలంగాణ సీఎం విమర్శించారు. తాము పర్యావరణాన్ని కాపాడాలని కోరుకుంటున్నామని.. కానీ వారు పర్యావరణాన్ని నాశనం చేయాలని చూస్తున్నారని తెలిపారు.

'ముఖ్యంగా పేదలు, మహిళలు, మైనారిటీలు, రైతులతో సహా ప్రతి ఒక్కరినీ రక్షించాలని మేము కోరుకుంటున్నాం. కానీ వారు తమ సంపన్న మిత్రులను మాత్రమే కాపాడుకోవాలని చూస్తున్నారు' అని కేంద్ర ప్రభుత్వంపై రేవంత్‌ రెడ్డి పరోక్ష విమర్శలు చేశారు. అందరికీ సమాన అవకాశాలు ఉండాలని తాము కోరుకుంటున్నామని.. కానీ వారు కొద్దిమంది చేతుల్లోనే అధికారాన్ని కేంద్రీకరించాలని చూస్తున్నారని తెలిపారు. చర్చలు, సంప్రదింపులను కోరుకుంటుంటే.. కానీ వారు ఒకే వ్యక్తి నుంచి ఆదేశాలు రావాలని కోరుకుంటున్నారని పేర్కొన్నారు.

'మమ్మల్ని ఆపగలమని వారు భావిస్తున్నారు. కానీ అది వారి భ్రమ మాత్రమే. మేము ఒక గొప్ప లక్ష్యం కోసం పోరాడుతున్నంత కాలం ప్రపంచంలోని ఏ శక్తీ మమ్మల్ని ఆపలేదు' అని రేవంత్‌ రెడ్డి స్పష్టం చేశారు. ప్రపంచీకరణ, కోవిడ్ తర్వాత అన్ని దేశాలు దాదాపు ఒకే రకమైన సమస్యలను ఎదుర్కొంటున్నాయని.. ప్రాథమిక హక్కులపై దాడులు, విద్య, ఉపాధి, వైద్య సేవలు, ద్రవ్యోల్బణం వంటి సమస్యలు అన్ని దేశాల్లోనూ ఉన్నాయని వెల్లడించారు.

'ప్రపంచంలోని చాలా దేశాల ప్రజల కలలు, ఆకాంక్షలు దాదాపు ఒకే విధంగా ఉన్నాయి. లక్షలాది మంది ప్రజలు తమ ఆకాంక్షలను అర్థం చేసుకోవాలని, వారి సమస్యలను వినాలని, వారి కలలను సాకారం చేయాలని మనపై ఆశలు పెట్టుకున్నారు. మనపై ఎంతో గొప్ప బాధ్యత ఉంది. మనమందరం కలిసికట్టుగా పోరాడితే విజయం సాధిస్తాం' అని రేవంత్‌ రెడ్డి ప్రకటించారు. రాహుల్ గాంధీ దేశంలో ఈ పోరాటానికి నాయకత్వం వహిస్తున్నారని.. ప్రతి పౌరుడికీ ఓటు హక్కు కల్పించడం కోసం పోరాడుతున్నారని తలెఇపారు. దళితులు, మైనారిటీలు, ఓబీసీలకు సామాజిక న్యాయం కల్పించడం కోసం రాహుల్‌ గాంధీ పోరాటం చేస్తున్నారని చెప్పారు.

'ఈ పోరాటంలో రాహుల్ గాంధీకి మద్దతుగా నిలవాలి. ఆయన నాయకత్వంలో ఈ మార్పును తీసుకువస్తాం. ప్రభుత్వం సంపన్నుల కోసం పనిచేయడం మానుకోవాలి. ప్రభుత్వాలు సామాన్య ప్రజల కోసం పనిచేయాలి' అని రేవంత్‌ రెడ్డి కోరారు. ప్రపంచవ్యాప్తంగా మనమందరం ఒకే రకమైన సమస్యలను ఎదుర్కొంటున్నామని.. అందరం కలిసి రాహుల్ గాంధీ నాయకత్వంలో పోరాడి మన దేశాన్ని కాపాడుకుందామని పిలుపునిచ్చారు. ఈ గొప్ప లక్ష్యం కోసం అందరం చేతులు కలిపి పోరాడుదామని చెప్పారు.