Army Engineers For Kaleshwaram: కాళేశ్వరం కోసం రంగంలోకి ఆర్మీ..ఢిల్లీలో పాగ వేసిన తెలంగాణ ప్రభుత్వ బృందం!

Army Engineers For Kaleshwaram SLBC: ఢిల్లీ పర్యటనలో భాగంగా తెలంగాణ సీఎం రేవంత్ రెడ్డి, మంత్రి ఉత్తమ్ కుమార్ రెడ్డి, మంత్రి వివేక్ వెంకటస్వామి, ఎంపీ వంశీ గడ్డం వినోద్, ప్రభుత్వం నీటిపారుదల సలహాదారు ఆదిత్యనాథ్ దాస్‌లతో కూడిన బృందం కేంద్ర జలవనరుల శాఖ మంత్రి సి.ఆర్. పాటీల్‌ను కలిసింది. గతంలో మహారాష్ట్రతో 148 మీటర్ల ఎత్తులో ఒప్పందం ఉన్న తుమ్మిడిహెట్టి బ్యారేజీ నిర్మాణాన్ని 152 మీటర్ల ఫుల్ రిజర్వాయర్ లెవెల్ (FRL) వద్ద చేపట్టేలా మహారాష్ట్ర ప్రభుత్వాన్ని ఒప్పించాలని విజ్ఞప్తి చేయబోతున్నట్లు జీ తెలుగు న్యూస్ ఎడిటర్ శ్రీ భరత్ విశ్లేషించారు. ఎత్తు పెంచడం ద్వారా ఎల్లంపల్లి ప్రాజెక్టుకు నీటిని గ్రావిటీ పద్ధతిలోనే తరలించే అవకాశం ఏర్పడి, విద్యుత్ వ్యయం గణనీయంగా తగ్గుతుందని ఆయన వివరించారు.

కేంద్రానికి అనుమతుల విన్నపం..
రాష్ట్రంలోని ముఖ్యమైన నీటిపారుదల ప్రాజెక్టులైన పాలమూరు రంగారెడ్డి, సీతారామసాగర్, గౌరవెల్లి రిజర్వాయర్లకు తక్షణమే పర్యావరణ అనుమతులు మంజూరు చేయాలని ముఖ్యమంత్రి రేవంత్ రెడ్డి అధ్యక్షతన ఢిల్లీ వెళ్లిన బృందం కోరనుందని ఎడిటర్ శ్రీ భరత్ వెల్లడించారు.  దీంతో పాటు సమ్మక్క సాగర్ ప్రాజెక్టుకు సంబంధించి కేంద్ర జలసంఘం (CWC) వద్ద పెండింగ్‌లో ఉన్న అనుమతులను వెంటనే క్లియర్ చేయాలని కేంద్ర మంత్రి సి.ఆర్. పాటీల్‌ను విజ్ఞప్తి చేసినట్లు తెలుస్తోంది.

రంగంలోకి ఆర్మీ ఇంజనీర్లు
కాళేశ్వరం ప్రాజెక్టు పరిధిలోని మేడిగడ్డ, అన్నారం, సుందిళ్ల బ్యారేజీల పునరుద్ధరణ బాధ్యతలతో పాటు ఎస్ఎల్బీసీ (SLBC) టన్నెల్ తవ్వకాలను పర్యవేక్షించేందుకు ఆర్మీ ఇంజనీరింగ్ అధికారులను కేటాయించాలని మంత్రి ఉత్తమ్ కుమార్ రెడ్డి ఆర్మీ చీఫ్ జనరల్ ధీరేజ్ సేతును కలిసి కోరారు. మంత్రి ఉత్తమ్ కుమార్ రెడ్డి, ఆర్మీ చీఫ్ జనరల్ ధీరేజ్ సేతు పూణేలోని నేషనల్ డిఫెన్స్ అకాడమీ (NDA)లో కలిసి చదువుకున్నారు. అయితే మంత్రి ఉత్తమ్ కుమార్ రెడ్డి గతంలో ఐఏఎఫ్ ఫైటర్ పైలట్‌గా సేవలు అందించడం విశేషం.

మంత్రి విజ్ఞప్తికి స్పందించిన ఆర్మీ హెడ్ క్వార్టర్స్ డిప్యుటేషన్ కోసం ముగ్గురు అధికారుల పేర్లను సిఫారసు చేసింది. వారిలో కర్నల్ సత్యదేవ్ సింగ్, లెఫ్టినెంట్ కర్నల్ రంజిత్ మీనన్, లెఫ్టినెంట్ కర్నల్ బల్ల ఉన్నారు. మొత్తం 44 కిలోమీటర్ల పొడవైన ఎస్ఎల్బీసీ టన్నెల్‌‌లో ఇప్పటివరకు 35 కిలోమీటర్ల తవ్వకం పూర్తి కాగా, మిగిలిన 9 కిలోమీటర్ల క్లిష్టమైన పనులను డిప్యుటేషన్‌పై వచ్చే ఆర్మీ అధికారి ప్రత్యక్షంగా పర్యవేక్షించనున్నారు. మరోవైపు నేషనల్ డ్యాం సేఫ్టీ అథారిటీ (NDSA) ఇచ్చిన సిఫారసుల ప్రకారం కాంక్రీట్ మరియు ఫౌండేషన్ పరీక్షల ప్రక్రియ ప్రస్తుతం తుది దశకు చేరుకున్నట్లు జీ తెలుగు న్యూస్ ఎడిటర్ శ్రీ భరత్ స్పష్టం చేశారు.