విద్యార్థుల్లో పఠనాసక్తి పెంపే లక్ష్యం.. రాష్ట్రవ్యాప్తంగా ‘తెలంగాణ రీడింగ్ డిప్లొమా’ ప్రారంభం.!!
Telangana Reading Diploma scheme: తెలంగాణ విద్యాశాఖ ఓ సరికొత్త కార్యక్రమానికి శ్రీకారం చుట్టింది. పాఠశాల విద్యార్థుల్లో పుస్తక పఠనాసక్తిని పెంపొందించడంతోపాటు విజ్ఞాన తృష్ణను పెంచడమే లక్ష్యంగా విద్యాశాఖ సరికొత్త అడుగులు వేసింది.
Telangana Reading Diploma scheme: తెలంగాణ విద్యాశాఖ ఓ సరికొత్త కార్యక్రమానికి శ్రీకారం చుట్టింది. పాఠశాల విద్యార్థుల్లో పుస్తక పఠనాసక్తిని పెంపొందించడంతోపాటు విజ్ఞాన తృష్ణను పెంచడమే లక్ష్యంగా విద్యాశాఖ సరికొత్త అడుగులు వేసింది. రాష్ట్ర వ్యాప్తంగా ఎంపిక చేసిన దాదాపు 2, 935 సర్కారు బడుల్లో తెలంగాణ రీడింగ్ డిప్లొమా కార్యక్రమాన్ని అమలు చేస్తున్నట్లు పాఠశాల విద్యాడైరెక్టర్ నవీన్ నికోలస్ వెల్లడించారు. ఈ కార్యక్రమానికి ప్రభుత్వం రూ. 5,803ల నిధులను కేటాయించినట్లు వెల్లడించింది.
కాగా ఈ స్కీమ్ రాష్ట్రంలోని ప్రభుత్వ, స్థానిక సంస్థల ప్రాథమిక, ప్రాథమికోన్నత పాఠశాలలతోపాటు కస్తూర్బా గాంధీ బాలికల విద్యాలయాల విద్యార్థులకు కూడా అందుబాటులోకి రానున్నట్లు తెలిపారు. దీనికి సంబంధించి తెలుగు, ఇంగ్లీష్, ఉర్దూ భాషల్లో ప్రత్యేకంగా ముద్రించిన రీడింగ్ పుస్తకాలను ఆయా బడులకు ప్రభుత్వం అందించనుంది.
రీడింగ్ డిప్లొమా అంటే విద్యార్థులు కేవలం పుస్తకాలు చదవడమే కాదు.. పలు సృజనాత్మక పనుల్లో కూడా పాల్గొనాల్సి ఉంటుంది. పుస్తకం చదివిన తర్వాత అందులోని ప్రధాన చిత్రాన్ని గీసి.. కథా సారాంశాన్ని తన సొంత మాటల్లో క్లుప్తంగా రాయాలి.. అంతేకాదు ఆ పుస్తకాన్ని తోటి స్నేహితులకు చదవమని సూచించాలి.
ఈ విధంగా విద్యార్థులు చదివిన పుస్తకాల సంఖ్య ఆధారంగా బ్రాడ్జీలు.. స్టిక్కర్లు అందించడంతోపాటు ప్రతినెలా పాఠశాల స్థాయిలో రీడింగ్ వేడుకలు కూడా నిర్వహిస్తారు. ముఖ్యంగా 1, 5,10,15,20,25 పుస్తకాలను విజయవంతంగా పూర్తి చేసిన విద్యార్థులను ప్రత్యేకంగా గుర్తించి.. వారికి మార్చి 2027 నాటికి నిర్దేశిత వార్షిక లక్ష్యాలు చేరుకున్న విద్యార్థులకు జిల్లా విద్యాశాఖ అధికారిచే అధికారిక డిప్లొమా సర్టిఫికేట్ ను అందిస్తారు.
ఈ విధంగా పాఠశాల స్థాయిలో విద్యార్థులకు రీడింగ్ డిప్లొమా అలవాటు చేసినట్లయితే.. విద్యార్థుల్లో పుస్తక పఠనాసక్తి పెంపొందుతుందని తల్లిదండ్రులు ఆశాభావం వ్యక్తం చేస్తున్నారు. అంతేకాదు.. విద్యార్థుల్లో జ్ఞాన సమాజ నిర్మాణానికి ఊతమిచ్చేలా విద్యాశాఖ చేపట్టిన ఈ కార్యక్రమం పట్ల విద్యార్థులు, ఉపాధ్యాయులు హర్షం వ్యక్తం చేస్తున్నారు.
Also Read:
