Telangana Temperature Hike: ఈ ఏడాదిలో 7 నెలల పాటు వేసవి కాలం..పగటిపూట మండిపోతున్న ఎండలు..ఎల్లో అలర్ట్ జారీ!

Telangana Temperature Hikes: తెలుగు రాష్ట్రాల్లో ప్రస్తుతం భిన్నమైన వాతావరణ మార్పులు చోటుచేసుకుంటున్నాయి. సాధారణంగా ఈ సమయంలో వాతావరణం చల్లబడాల్సి ఉండగా, ప్రస్తుతం రెండో వేసవి కాలాన్ని తలపించే పరిస్థితులు ఏర్పడ్డాయి. తెలంగాణ రాష్ట్రంలో  పగటి పూట ఉష్ణోగ్రతలు రికార్డు స్థాయిలో పెరిగి భానుడి తీవ్రతకు వీధులు నిప్పుల కొలిమిలా మారుతున్నాయి. కేవలం పగలే కాకుండా రాత్రి వేళల్లో కూడా ఉక్కపోత తీవ్రమవ్వడంతో ప్రజలు ఇబ్బందులు పడుతున్నారు. మైదాన ప్రాంతాల్లో పెరిగిన గాలి కాలుష్యం కూడా ఈ వేడి తీవ్రత పెరగడానికి ఒక కారణమని వాతావరణ నిపుణులు వెల్లడిస్తున్నారు

పడిపోయిన తేమ శాతం, రికార్డు స్థాయి ఉష్ణోగ్రతలు
గాలిలో తేమ శాతం తగ్గడం వల్ల వేడి తీవ్రత మరింతగా పెరిగింది. శుక్ర, శనివారాల్లో తెలంగాణలోని అనేక ప్రాంతాల్లో సాధారణం కంటే 3 డిగ్రీలు అదనంగా ఉష్ణోగ్రతలు నమోదయ్యాయి. ముఖ్యంగా ఖమ్మం, మహబూబ్‌నగర్ జిల్లాల్లో సాధారణం కన్నా 2 నుండి 3 డిగ్రీలు అధికంగా నమోదు కావడం ప్రజలను ఆందోళనకు గురిచేస్తోంది. సాధారణంగా గాలిలో ఉండాల్సిన తేమ శాతం 60% నుండి 70% మధ్య ఉండాల్సి ఉండగా, పలు ప్రాంతాల్లో అది 50% కంటే తక్కువకు పడిపోయింది.

హైదరాబాద్‌లో శుక్రవారం రోజున తేమ శాతం 49 శాతానికి పడిపోగా, రామగుండంలో 42%, నిజామాబాద్.. నల్గొండల్లో 45%, హనుమకొండలో 49%, మహబూబ్‌నగర్‌లో 51% చొప్పున నమోదయ్యాయి.

వాతావరణ శాఖ ఎల్లో అలర్ట్..
మరో ఒకటి లేదా రెండు రోజుల్లో తెలంగాణ నుంచి నైరుతి రుతుపవనాలు పూర్తిగా నిష్క్రమించే సూచనలు ఉన్నాయి. రాబోయే మూడు రోజుల పాటు పలు జిల్లాల్లో సాధారణం కంటే ఎక్కువ ఉష్ణోగ్రతలు నమోదవుతాయని వాతావరణ శాఖ హెచ్చరించింది. ఖమ్మం, నల్గొండ, పెద్దపల్లి, మంచిర్యాల, నాగర్‌కర్నూల్, మహబూబాబాద్, జయశంకర్‌ భూపాలపల్లి, నిర్మల్‌, సూర్యాపేట, భద్రాద్రి కొత్తగూడెం, కుమురం భీం ఆసిఫాబాద్, ములుగు, నారాయణపేట, జోగులాంబ గద్వాల, జగిత్యాల, వనపర్తి, మహబూబ్‌నగర్ జిల్లాలకు ఎల్లో అలర్ట్ జారీ చేశారు. ఈ తీవ్ర వేడి పరిస్థితుల దృష్ట్యా ప్రజలు అప్రమత్తంగా ఉండాలని అధికారులు సూచిస్తున్నారు.