2 నెలలుగా అమ్మానాన్నలకు దూరంగా బాలుడు.. చివరకు తల్లిదండ్రుల చెంతకు చేర్చిన అధికారులు!

Jagtial News: గత రెండు నెలలుగా తల్లిదండ్రుల ప్రేమకు దూరమై.. శివు సంరక్షణ కేంద్రంలో బిక్కబిక్కమంటూ గడిపిన ఓ పసివాడు ఎట్టకేలకు కనవారి వద్దకు చేరుకున్నాడు.. నిబంధనల పేరుతో అధికార యంత్రాంగం చేసిన జాప్యం.. మీడియా కథనాలతో పాటు సోషల్ మీడియా ద్వారా వెలుగులోకి రావడంతో ఉన్నతాధికారులు ఎట్టకేలకు స్పందించారు. జిల్లా కలెక్టర్ చొరవతో బాలుడిని తల్లిదండ్రులకు అప్పగించడంతో ఈ ఘటన సుఖాంతమైంది. అసలు ఏం జరిగింది? ఈ ఘటకు సంబంధించిన పూర్తి వివరాలేంటో ఇప్పుడు మనం తెలుసుకుందాం..

జగిత్యాల జిల్లాకు సంబంధించిన ఈ బాలుడు గత 2 నెలలుగా నిబంధనల ప్రకారం.. శిశు సంరక్షణ కేంద్రంలో పెరుగుతున్నారు.. అయితే.. అమ్మ భయమేస్తోంది... నన్ను ఇక్కడి నుంచి తీసుకెళ్లండి..! అంటూ ఆ బాలుడు తన తల్లిని చూసి భయంతో మాట్లాడిన దృశ్యాలు సోషల్‌ మీడియాలో విపరీతంగా వైరల్‌ అయ్యాయి.. కంటికి రెప్పలా చూసుకోవాల్సిన చిన్నారి పడుతున్న మానసిక వేదన.. ఆవేదనతో కూడిన ఆ వీడియో ప్రతి ఒక్కరి గుండెలను తాకాయి.. రాష్ట్రవ్యాప్తంగా ప్రజలతో పాటు ప్రజాసంఘాలు ఈ ఘటనపై తీవ్ర ఆగ్రహం, సానుభూతి వ్యక్తం చేస్తూ వచ్చారు.

అయితే, ఈ ఘటనలో ఆ బాలుడిని తల్లిదండ్రులకు అప్పగించాలని ఉన్నత న్యాయస్థానం ఆదేశాలు జారీ చేసినప్పటికీ.. క్షేత్రస్థాయి అధికారులు ఆ ప్రక్రియను వేగవంతం చేయడంలో కాస్త వెనక ఉండడంతో తల్లిదండ్రులు తీవ్ర ఆరోపణలు చేస్తూ వచ్చారు. రోజురోజుకూ సంరక్షణ కేంద్రంలో తమ బిడ్డ ఆరోగ్యం దెబ్బతినిందని.. మానసికంగా తీవ్రంగా సమస్యలు ఎదుర్కొంటున్నారని.. వారు కన్నీరుమున్నీరయ్యారు. న్యాయస్థానం తీర్పు ఉన్నా.. అధికారులు స్పందించకపోవడంపై మీడియా కూడా బాలుడికి సపోర్ట్‌ చేస్తూ.. వరుస కథనాలను ప్రసారం చేసింది..

మీడియాలో వచ్చిన వరుస కథనాలు.. ప్రజల నుంచి వచ్చిన తీవ్ర వ్యతిరేకత జిల్లా అధికార యంత్రాంగాన్ని కదలించేలా చేసింది.. ఈ వ్యవహారంపై తక్షణమే జిల్లా కలెక్టర్ స్పదించింది.. ఏమాత్రం ఆలస్యం చేయకుండా నిబంధనల ప్రకారం.. బాలుడిని తల్లిదండ్రులకు అప్పగించాలని సంబంధిత సంరక్షణ అధికారులను ఆదేశించారు.. కలెక్టర్ ఆదేశాల మేరకు అధికారులు నిన్న బాలుడిని అధికారికంగా తల్లిదండ్రులకు అప్పగించారు.