రాజన్న సిరిసిల్లలో నాటుసారా స్థావరాలపై మెరుపు దాడులు..

Rajanna Sircilla In Telugu: గ్రామీణ ప్రాంతాల్లో ప్రజారోగ్యానికి చేటుచేస్తూ.. శాంతిభద్రతలకు ముప్పుగా మారిన అక్రమ నాటుసారా తయారీ ముఠాలపై ఎక్సైజ్ శాఖ అధికారులు ఉక్కుపాదం మోపారు.. రాజన్న సిరిసిల్ల జిల్లా వీర్నపల్లి మండల పరిధిలో నాటుసారా తయారు చేస్తున్న వారిపై ఎక్సైజ్, ఎన్‌ఫోర్స్‌మెంట్ బృందాలు విస్తృత స్థాయిలో సంయుక్త ఆపరేషన్ చేపట్టాయి. ఏకకాలంలో పలు తండాలపై మెరుపు దాడులు నిర్వహించిన్నట్ల తెలుస్తోంది.

వీర్నపల్లి మండల పరిధిలోని మారుమూల ప్రాంతాల్లో కొందరు గుట్టుచప్పుడు కాకుండా నాటుసారా తయారు చేసి.. విచ్చలవిడిగా విక్రయిస్తున్నారన్న పక్కా సమాచారంతో అధికారులు రంగంలోకి దిగారట.. పక్కా ప్లానింగ్‌తో మండలంలోని గర్జనపల్లి తండా.. జవహర్‌లాల్ నెహ్రూ తండాతో పాటు భూక్యారెడ్డి తండా, బొంగిరెడ్డి తండాల్లో ఏకకాలంలో అధికారులు దాడులు నిర్వహించారు. అటవీ శివారు ప్రాంతాలు, వాగుల పరిసరాల్లో రహస్య స్థావరాలను అధికారులు జల్లెడ పట్టారు.

ఈ ఆకస్మిక తనిఖీల్లో అధికారులకు భారీగా నాటుసారా నిల్వలు పట్టుబడ్డట్లు తెలుస్తోంది.. అక్రమంగా నిల్వ చేసిన సుమారు 100 లీటర్ల బెల్లం ఊటను అధికారులు గుర్తించి.. అక్కడికక్కడే పారబోసి ధ్వంసం చేసిన్నట్లు అధికారులు వెల్లడించారు. తయారీకి సిద్ధంగా ఉంచిన పాత్రలతో పాటు సామగ్రిని సీజ్ చేయడంతో పాటు పెద్ద మొత్తంలో కాచిన నాటుసారాను స్వాధీనం చేసుకున్నట్లు అధికారులు తెలిపారు. అంతేకాకుండా అక్రమ దందాను నడిపిస్తున్న ఇద్దరు కీలక వ్యక్తులను ఎక్సైజ్ పోలీసులు అదుపులోకి తీసుకుని.. వారిపై ప్రత్యేకమైన కేసులు కూడా బుక్‌ చేశారు.

గ్రామాల్లో నాటుసారా తయారీ, విక్రయాలు ఎవరైనా చేపడితే.. వారిపై కఠినమైన చట్టపరమైన చర్యలు తప్పవని ఎక్సైజ్ అధికారులు స్పష్టం చేశారు. నాటుసారా తాగడం వల్ల ప్రాణాలకే ప్రమాదమని.. ఎవరైనా విక్రయిస్తున్నట్లు సమాచారం తెలిస్తే వెంటనే అధికారులకు తెలపాలని ప్రజలను కోరినట్లు తెలుస్తోంది.. సమాచారం ఇచ్చిన వారి వివరాలు సిక్రెట్‌గా ఉంచుతామని హామీ అందించారు..