విటమిన్ B12 లోపం ఉంటే ముఖంపై ఈ లక్షణాలు కనిపిస్తాయా? డాక్టర్లు ఏం చెబుతున్నారు?

Vitamin B12 Deficiency Symptoms: సాధారణంగా మానవ శరీరానికి విటమిన్ బి12 ఎంతో ముఖ్యం. ఎందుకంటే ఈ విటమిన్ తగ్గితే ఆరోగ్యం చాలా వరకు దెబ్బతింటుంది. ఈ లోపాన్ని ఎలాంటి లక్షణాల ఆధారంగా పసిగట్టాలనే అంశంపై సోషల్ మీడియాలో ఎన్నో ప్రచారాలు సాగుతున్నాయి. ముఖ్యంగా ముఖంపై చర్మం తిమ్మిర్లు రావడం..ఎర్రటి మచ్చలు లేదా నల్లటి చారలు వంటివి రావడం కనిపిస్తే.. అది కచ్చితంగా విటమిన్ బి12 లోపమే అని కొందరు సోషల్ మీడియా వేదికగా చెబుతున్నారు. అయితే ఈ రకమైన వాదనల్లో ఎంతవరకు నిజం ఉందనే విషయమై ప్రముఖ ఇంగ్లీష్ పేపర్ ఇండియన్ ఎక్స్ ప్రెస్ ప్రచురించిన కథన ఆధారంగా వైద్యులు పలు కీలకమైన అంశాలను వెల్లడించారు.

ముఖ లక్షణాలను నమ్మవచ్చా?
తీవ్రమైన విటమిన్ బి12 లోపం నరాలను ప్రభావితం చేసి.. ముఖంలో తిమ్మిరి లేదా స్పర్శ కోల్పోవడానికి దారితీస్తుందని నిపుణులు చెబుతున్నారు. అంతేకాదు. చర్మం నల్లబడటం (పిగ్మెంటేషన్) పెరిగే అవకాశం ఉంటుంది.  ముఖ్యంగా చేతులు.. పాదాలు, నాలుకపై కూడా ఎర్రగా పుండ్లు ఏర్పడే అవకాశం ఉంటుంది. అయితే.. కేవలం ముఖంపై ఎర్రటి మచ్చలు లేదా ఇతర చర్మ మార్పుల ఆధారంగా బి12 లోపాన్ని నిర్ధారించడం సరైనది కాదంటున్నారు.  ఇవి ఇతర ఆరోగ్య సమస్యల వల్ల కూడా సంభవించవచ్చని.. వీటిని ప్రామాణికంగా తీసుకోకూడదని చెబుతున్నారు.

బి12 లోపం   సాధారణ లక్షణాలు:
వైద్యుల ప్రకారం, విటమిన్ బి12 లోపం కొన్ని సాధారణ లక్షణాలు:

*తీవ్రమైన అలసట, నీరసం: మీరు ఎంత విశ్రాంతి తీసుకున్నా తగ్గని నిరంతర అలసట.

*పాలిపోయిన చర్మం, అలసట: ఈ లక్షణాలు రక్తహీనత వల్ల కలుగుతాయి.

*చేతులు- పాదాలలో తిమ్మిరి: నాడీ వ్యవస్థపై ప్రభావం కారణంగా ఈ సమస్య మొదలవుతుంది.

*జ్ఞాపకశక్తి కోల్పోవడం - ఏకాగ్రత లోపం: ఇది మెదడు పనితీరును ప్రభావితం చేస్తుంది.

*నడవడంలో ఇబ్బందులు: లోపం తీవ్రంగా ఉంటే, సమతుల్యత కోల్పోయే ప్రమాదం ఉంది.

ఈ లక్షణాలు క్రమంగా అభివృద్ధి చెందుతాయి. చాలా మంది వీటిని ఒత్తిడి, వృద్ధాప్యం లేదా తీరికలేని జీవనశైలిగా పొరబడతారు. ఐరన్, ఫోలేట్ లోపాలు, హార్మోన్ల మార్పులు ఇతర చర్మ సమస్యలు కూడా ఇలాంటి లక్షణాలను కలిగిస్తాయి.

ఎవరికి ఎక్కువ ప్రమాదం ఉంది?

శాకాహారులు.. వీగన్లు తగినంత సప్లిమెంట్లు తీసుకోకపోతే, వారికి B12 లోపం వచ్చే ప్రమాదం ఎక్కువగా ఉంటుంది. అలాగే, వృద్ధులు,  జీర్ణ సమస్యలు ఉన్నవారు పోషకాలను సరిగ్గా గ్రహించలేకపోవచ్చు. మీరు ఆహారం నుండి తగినంత B12 పొందినప్పటికీ, మీ శరీరం దానిని గ్రహించకపోవచ్చు.

ఎప్పుడు పరీక్ష చేయించుకోవాలి?

మీరు నిరంతర అలసట, చేతులు, కాళ్ళలో తిమ్మిరి, నడవడంలో ఇబ్బంది, జ్ఞాపకశక్తి కోల్పోవడం లేదా అసాధారణ చర్మ మార్పులను అనుభవిస్తే, వెంటనే వైద్యుడిని సంప్రదించడం ఉత్తమం. రక్త పరీక్ష ద్వారా సీరం B12 స్థాయిలను గుర్తించవచ్చు. లోపాన్ని ముందుగానే గుర్తిస్తే, సప్లిమెంట్లు లేదా ఇంజెక్షన్లతో సులభంగా చికిత్స చేయవచ్చు. ఇది తీవ్రమైన ఆరోగ్య సమస్యలను నివారించగలదు. కేవలం వైద్య సమాచారం లేదా ఆన్‌లైన్ సమాచారంపై ఆధారపడటం ప్రమాదకరమని నిపుణులు హెచ్చరిస్తున్నారు.