ఏపీకి తీవ్ర తుఫాను ముప్పు.. అక్టోబర్ 23న అల్పపీడనం.. ఈ జిల్లాలకు భారీ వర్ష సూచన!

AP Weather Alert: తమిళనాడు తీర ప్రాంతంలో సముద్ర మట్టానికి 5.8 కిలోమీటర్ల ఎత్తులో ఉపరితల ఆవర్తనం కొనసాగుతోంది. దీని ప్రభావంతో రానున్న 24 గంటల్లో అక్కడ అల్పపీడనం ఏర్పడే అవకాశం ఉంది. ఈ ఆవర్తనం నుండి ఉత్తర కోస్తాంధ్ర వరకు 3.1 కిలోమీటర్ల ఎత్తులో ద్రోణి విస్తరించి ఉంది. మరోవైపు, థాయ్‌లాండ్ గల్ఫ్‌లో 4.5 కిలోమీటర్ల ఎత్తులో ఉన్న ఉపరితల ఆవర్తనం పశ్చిమ వాయువ్య దిశగా కదులుతూ, అక్టోబర్ 23 నాటికి తూర్పు మధ్య బంగాళాఖాతంలో అల్పపీడనంగా మారే పరిస్థితులు ఉన్నాయని వాతావరణ కేంద్రం పేర్కొంది. ఇది అక్టోబర్ 27 నాటికి వాయుగుండంగా బలపడి మధ్య బంగాళాఖాతంలోకి ప్రవేశిస్తుందని, ఆ తర్వాత రెండు రోజుల్లో తుఫానుగా మారి నెలాఖరు నాటికి ఉత్తర కోస్తా - దక్షిణ ఒడిశా తీరాల మధ్య వెళ్తుందని అధికారులు అంచనా వేస్తున్నారు.

అప్రమత్తమైన యంత్రాంగం.. లోతట్టు ప్రాంతాలకు అలర్ట్..
బంగాళాఖాతంలో వాతావరణ మార్పుల కారణంగా ఏపీలోని కోస్తాంధ్ర, రాయలసీమ ప్రాంతాల్లో వర్షాలు పడే అవకాశం ఎక్కువగా ఉంది. తమిళనాడు తీరంలో ఉన్న ఉపరితల ఆవర్తనం వల్ల రాబోయే 24 గంటల్లో అల్పపీడనం ఏర్పడవచ్చు. దీనివల్ల కొన్ని ప్రాంతాల్లో మోస్తరు, మరికొన్ని చోట్ల చిరుజల్లులు కురిసే అవకాశం ఉన్నందున ప్రజలు, ప్రభుత్వ యంత్రాంగం అప్రమత్తంగా ఉండాలని అధికారులు సూచించారు. అక్టోబర్ 23 నాటికి ఏర్పడే అల్పపీడనం నెలాఖరు నాటికి తుఫానుగా మారే అవకాశం ఉన్న నేపథ్యంలో, ఇప్పటికే అధికార యంత్రాంగాన్ని అప్రమత్తం చేశారు. రాష్ట్ర విపత్తుల నిర్వహణ శాఖ అధికారులు కూడా ముందస్తు చర్యలు తీసుకోవాలని ఆదేశించారు. ముఖ్యంగా శ్రీకాకుళం, పార్వతీపురం మన్యం వంటి జిల్లాల్లోని లోతట్టు ప్రాంతాల ప్రజలను అప్రమత్తం చేయాలి. ఎగువ ప్రాంతాల్లో భారీ వర్షాల వల్ల నదీ పరివాహక ప్రాంతాలు ముంపునకు గురయ్యే ప్రమాదం ఉన్నందున, ప్రజలను సురక్షిత ప్రాంతాలకు తరలించేందుకు పునరావాస కేంద్రాలను ఏర్పాటు చేస్తున్నారు. అలాగే, సముద్ర తీర ప్రాంతాల్లో గంటకు 30 నుండి 50 కిలోమీటర్ల వేగంతో గాలులు వీచే అవకాశం ఉన్నందున ప్రజలు జాగ్రత్తగా ఉండాలని సూచించారు. గాలివానల వల్ల పెద్ద చెట్లు నేల కూలే ప్రమాదం ఉన్నందున, రవాణా వ్యవస్థకు ఆటంకం కలగకుండా రహదారుల పక్కన ఉన్న చెట్ల కొమ్మలను తొలగిస్తున్నారు. రాయలసీమలోని కొన్ని ప్రాంతాల్లో కూడా ఉరుములు, మెరుపులతో కూడిన వర్షాలతో పాటు గంటకు గరిష్టంగా 50 కిలోమీటర్ల వేగంతో గాలులు వీసే అవకాశం ఉంది.

ఉత్తరాంధ్రలో భారీ వర్షాల హెచ్చరిక.. ఏ ఏ జిల్లాల్లో అంటే?
రానున్న మూడు రోజుల్లో ఆంధ్రప్రదేశ్‌లోని పలు జిల్లాల్లో మోస్తరు నుండి భారీ వర్షాలు కురిసే అవకాశం ఉంది. కోస్తాంధ్రలోని ఆరు జిల్లాలతో పాటు, ఉత్తరాంధ్రలోని శ్రీకాకుళం, విజయనగరం, పార్వతీపురం మన్యం, అల్లూరి సీతారామరాజు మరియు అనకాపల్లి జిల్లాల్లో భారీ వర్షాలు పడవచ్చు. విశాఖపట్నంలో కూడా వాతావరణంలో మార్పులు వస్తూ ఆకస్మికంగా వర్షాలు కురుస్తున్నాయి. ఈ వర్షాల వల్ల ఎండ వేడి నుండి ప్రజలకు ఉపశమనం లభిస్తుంది. రైతుల విషయానికి వస్తే, ఈ ఏడాది గత ఏడాదితో పోలిస్తే తక్కువ వర్షపాతం నమోదవుతున్నందున, తక్కువ నీటితో పండించాల్సిన పంటల గురించి అవగాహన కల్పిస్తున్నారు. కొన్ని చోట్ల నారుమడులు ఎండిపోతున్న నేపథ్యంలో, ఎగువ ప్రాంతాల నీటిని జలాశయాలకు తరలించేందుకు ముందస్తు చర్యలు చేపట్టారు. గత నెలలో భారీ వర్షాల వల్ల నదులు పొంగి, జనజీవనం స్తంభించడమే కాకుండా కొండచరియలు విరిగిపడి రైళ్ల రాకపోకలకు కూడా అంతరాయం కలిగింది.

Read Also: స్థానిక ఎన్నికల్లో 57 శాతం స్ట్రైక్ రేట్ కంటే మెరుగ్గా రావాలి: చంద్రబాబు
 

ఎన్డీఆర్‌ఎఫ్, ఎస్డీఆర్‌ఎఫ్ బృందాలు సిద్ధం..
ఈ అల్పపీడనం తుఫానుగా మారి ఒరిస్సా తీరం దాటే అవకాశం ఉన్నందున, దాని ప్రభావం ఉత్తరాంధ్రలోని శ్రీకాకుళం, విజయనగరం, పార్వతీపురం మన్యం, విశాఖపట్నం జిల్లాలపై ఉండవచ్చు. దీనిని ఎదుర్కోవడానికి NDRF, SDRF బృందాలను అప్రమత్తం చేసి, ప్రణాళికలు సిద్ధం చేస్తున్నారు. సముద్రంలో అలలు ఎగసిపడే అవకాశం ఉన్నందున, మత్స్యకారులు వాతావరణ శాఖ సూచనల మేరకు మాత్రమే సముద్రంలోకి వెళ్లాలని అధికారులు సూచిస్తున్నారు. మొత్తంగా, రానున్న మూడు రోజుల్లో ఏపీలో వివిధ ప్రాంతాల్లో వర్షాలు కురిసే అవకాశం ఉంది. ఈ నెల 29, 30 తేదీల్లో తుఫాను వచ్చే అవకాశం ఉన్నందున ప్రజలు అప్రమత్తంగా ఉండాలని వాతావరణ శాఖ అధికారులు హెచ్చరిస్తున్నారు.