AP 3D Printed House: ఆంధ్రప్రదేశ్‌లో గృహ నిర్మాణ విప్లవం..రూ.5 లక్షలకే పేదలకు 3డీ కాంక్రీట్ ప్రింటింగ్ ఇళ్లు..

AP 3D Printed House Project: సొంతింటి కల నెరవేర్చుకోవాలనుకునే పేద ప్రజల కోసం కేంద్ర, రాష్ట్ర ప్రభుత్వాలు అత్యాధునికమైన '3డీ కాంక్రీట్ ప్రింటింగ్' సాంకేతికతను అందుబాటులోకి తెస్తున్నాయి. గృహ నిర్మాణ రంగంలో వస్తున్న సాంకేతిక మార్పులను జోడించి, అతి తక్కువ సమయంలో అత్యుత్తమ నాణ్యతా ప్రమాణాలతో ఇళ్లను నిర్మించడమే ఈ పథకం ముఖ్య ఉద్దేశంగా మారింది. రూర్కీలోని ప్రఖ్యాత 'సెంట్రల్ బిల్డింగ్ రీసెర్చ్ ఇన్‌స్టిట్యూట్' (సీబీఆర్‌ఐ) ఈ ప్రాజెక్టుకు సంపూర్ణ సాంకేతిక సహకారాన్ని అందిస్తోంది.

నిర్మాణ వ్యయం, మౌలిక వసతులు.. 
ఈ నూతన 3డీ సాంకేతికతతో నిర్మించే ఒక్కో ఇంటి నిర్మాణ వ్యయాన్ని రూ. 5.10 లక్షలుగా ఖరారు చేశారు. సాధారణంగా పీఎంఏవై పథకం కింద లభించే రూ. 2.39 లక్షల ఆర్థిక సాయానికి అదనంగా, ఈ కొత్త టెక్నాలజీని ప్రోత్సహించేందుకు ప్రభుత్వం మరిన్ని నిధులను సమకూరుస్తోంది. ఈ రూ. 5.10 లక్షల వ్యయంలోనే కేవలం గోడలు, స్లాబ్ మాత్రమే కాకుండా స్థలం అభివృద్ధి, మెట్లు, మరుగుదొడ్డి, ర్యాంప్, షెడ్ వంటి అన్ని ప్రాథమిక మౌలిక వసతులను కల్పిస్తారు.

కేంద్రమంత్రి పెమ్మసాని చొరవతో పైలట్ ప్రాజెక్ట్.. 
ఈ ప్రాజెక్ట్‌ను ఆంధ్రప్రదేశ్ రాష్ట్రానికి తీసుకురావడంలో కేంద్ర గ్రామీణాభివృద్ధి, కమ్యూనికేషన్ల శాఖ సహాయమంత్రి పెమ్మసాని చంద్రశేఖర్ కీలక పాత్ర వహించారు. సీబీఆర్‌ఐలోని ప్రయోగాత్మక 3డీ ఇళ్లను ఆయన స్వయంగా పరిశీలించిన తర్వాత, తన స్వగ్రామమైన బుర్రిపాలెంలో 100 ఇళ్లను పైలట్ ప్రాజెక్టుగా చేపట్టాలని నిర్ణయించారు. దీనికి తోడు ఓబుల్‌‌నాయుడుపాలెంలో దివ్యాంగుల కోసం ప్రత్యేకంగా 77 ఇళ్లను ఈ విధానంలోనే నిర్మించనున్నారు.

రూ. 13.93 కోట్ల నిధులు 
ఈ మొత్తం ప్రయోగాత్మక ప్రాజెక్టు అంచనా వ్యయం రూ. 13.93 కోట్లు. ఇందులో కేంద్ర ప్రభుత్వం వాటా రూ. 9.44 కోట్లు కాగా, రాష్ట్ర ప్రభుత్వం రూ. 4.49 కోట్లను వెచ్చించనుంది. అక్టోబర్ 4న ముఖ్యమంత్రి నారా చంద్రబాబు నాయుడు సమక్షంలో రాష్ట్ర గృహనిర్మాణ శాఖ, కేంద్ర ప్రభుత్వ ప్రతినిధులు, సీబీఆర్‌ఐ ప్రతినిధుల మధ్య అవగాహన ఒప్పందం (MoU) కుదరనుంది. పేదలకు తక్కువ వ్యవధిలోనే నాణ్యమైన వసతులు కల్పించే ఈ నిర్ణయం గృహ నిర్మాణ రంగంలో సరికొత్త చరిత్రకు శ్రీకారం చుట్టనుంది.