AP ZPTC MPTC Election: ఏపీలో జెడ్పీటీసీ, ఎంపీటీసీ పోలింగ్ ప్రారంభం..భారీ భద్రత, వర్షాల నడుమ ఎన్నికల ప్రక్రియ!

AP ZPTC MPTC Election 2026: ఆంధ్రప్రదేశ్ వ్యాప్తంగా ఇటీవలే మున్సిపల్ ఎన్నికలు ముగియగా.. ఇప్పుడు జెడ్పీటీసీ, ఎంపీటీసీ స్థానాలకు పోలింగ్ ప్రారంభమైంది. ఓటర్లు తమ ఓటు హక్కును వినియోగించుకోవడానికి ఉదయం 7:00 గంటల నుండి సాయంత్రం 5:00 గంటల వరకు సమయం కేటాయించారు. రాష్ట్ర వ్యాప్తంగా 582 జెడ్పీటీసీ స్థానాలు, 7,767 ఎంపీటీసీ స్థానాలు బరిలో ఉన్నాయి. ఈ స్థానాల్లో విజయం సాధించేందుకు మొత్తం 18,843 మంది అభ్యర్థులు తీవ్రంగా పోటీ పడుతున్నారు.

పోలింగ్ కేంద్రాలు, అధికారుల నియామకం..
ఈ భారీ ఎన్నికల ప్రక్రియను సుఫీలుంగా పర్యవేక్షించేందుకు రాష్ట్రవ్యాప్తంగా మొత్తం 31,460 పోలింగ్ కేంద్రాలను సకల సదుపాయాలతో ఏర్పాటు చేశారు. ఓటింగ్ పర్యవేక్షణ కోసం 35,333 మంది ప్రిసైడింగ్ అధికారులు, అలాగే 1,41,332 మంది పోలింగ్ అధికారులు నేరుగా విధుల్లో పాల్గొంటున్నారు.

పటిష్ట భద్రతా చర్యలు..
ఎన్నికల వేళ శాంతిభద్రతల పరిరక్షణ నిమిత్తం 38 వేల మందికి పైగా పోలీసు అధికారులతో భద్రతా వలయాన్ని సిద్ధం చేశారు. భద్రతా విశ్లేషణల ఆధారంగా 9,966 సమస్యాత్మక పోలింగ్ కేంద్రాలను, 9,186 అత్యంత సమస్యాత్మక పోలింగ్ కేంద్రాలను ప్రత్యేకంగా గుర్తించి అక్కడ అత్యున్నత స్థాయి భద్రతను పూర్తి చేశారు. అలాగే రాష్ట్రంలో కురుస్తున్న భారీ వర్షాల వల్ల ఓటర్లకు, అధికారులకు ఇబ్బందులు కలగకుండా పోలింగ్ కేంద్రాల వద్ద ప్రత్యేక ఏర్పాట్లు చేశారు.

కూటమి శ్రేణులకు చంద్రబాబు దిశానిర్దేశం..
ఇటీవల పట్టణ స్థానిక సంస్థల ఎన్నికల్లో సాధించిన చారిత్రాత్మక విజయోత్సాహంతో 94 శాతం స్ట్రైక్ రేట్‌ను మించి జెడ్పీటీసీ, ఎంపీటీసీ స్థానాలను గెలుచుకోవాలని ముఖ్యమంత్రి చంద్రబాబు నాయుడు స్పష్టం చేశారు. పొత్తు ధర్మం పాటించకుండా పార్టీ క్రమశిక్షణ తప్పే నాయకులకు పార్టీలో ఎలాంటి స్థానం లేదని ఆయన ఖచ్చితంగా తేల్చిచెప్పారు.