Govt Employees Holiday: ఆంధ్రప్రదేశ్‌ ప్రభుత్వ ఉద్యోగులకు బిగ్‌ అలర్ట్‌.. 14వ తేదీన సెలవు

Govt Employees Holiday: ఆంధ్రప్రదేశ్ ప్రభుత్వ ఉద్యోగులకు ముఖ్యమైన సమాచారం ఇది. ఈనెల 14వ తేదీన సెలవు వచ్చేసింది. రెండో శనివారం సెలవు వినియోగంపై ప్రభుత్వం కీలక ప్రకటన చేసింది. వాస్తవంగా రానున్న రెండో శనివారం పనిదినంగా ప్రభుత్వం గతంలోనే ప్రకటించింది. అయితే ఎన్నికల సమయంలో ఇచ్చిన సెలవును సద్వినియోగం చేసుకోని ఉద్యోగులు రెండో శనివారం సెలవును యథావిధిగా వినియోగించుకోవచ్చని ప్రభుత్వం స్పష్టత ఇచ్చింది. ఈ శనివారం వాడుకోవాలని ప్రభుత్వం ప్రకటించింది.

దసరా పండుగ సందర్భంగా 19-10-2026న సాధారణ సెలవు ప్రకటించినప్పటికీ ఎన్నికలు, దసరా పండుగ, సరాస్‌ (విజయవాడ దసరా ఉత్సవాలు) ఫెస్టివల్ తదితర వాటివి ఉండడంతో ఉద్యోగులు ఆ రోజు విధులు నిర్వహించారు. కొందరు ఉద్యోగులు సెలవు వినియోగించుకోగా.. చాలా మంది సెలవు వినియోగించుకోకుండా విధుల్లో పాల్గొన్నారు. దీంతో ఆ రోజు సెలవు పొందలేని ఉద్యోగులకు ప్రభుత్వం ప్రత్యేక వెసులుబాటు కల్పించింది. ఆ రోజు సెలవు వినియోగించుకోని ఉద్యోగులకు రానున్న రెండో శనివారం సెలవు వాడుకోవచ్చని తెలిపింది.

ఈనెల 14వ తేదీ రెండో శనివారం సెలవు పొందేందుకు ఏపీ ప్రభుత్వం అనుమతి ఇచ్చింది. 19వ తేదీన విధులు నిర్వహించిన ఉద్యోగులు అందరూ రానున్న రెండో శనివారం సెలవు పొందవచ్చని ఆదేశాల్లో పేర్కొంది. సంబంధిత ఉద్యోగుల విధుల వివరాలను అధికారుల ద్వారా ధృవీకరించాలని ప్రభుత్వం ఆదేశించింది. ఇక ఆరోజు సెలవు పొందిన ఉద్యోగులందరూ 14వ తేదీన రెండో శనివారం రోజు యథావిధిగా విధులకు హాజరు కావాలని ప్రభుత్వం స్పష్టం చేసింది. ఇది అందరికీ వర్తించే సాధారణ సెలవు కాదని ప్రకటించింది.

ఇటీవల ఆంధ్రప్రదేశ్‌లో అనేక పరిణామాలు జరిగిన విషయం తెలిసిందే. మున్సిపల్‌ కార్పొరేషన్‌, మున్సిపాలిటీ ఎన్నికలతోపాటు జెడ్పీటీసీ, ఎంపీటీసీ ఎన్నికల్లో ప్రభుత్వ ఉద్యోగులు పెద్ద ఎత్తున విధుల్లో పాల్గొన్నారు. దీనికితోడు దసరా సందర్భంగా విజయవాడలో అత్యంత ప్రతిష్టాత్మకంగా ఉత్సవాలు నిర్వహించిన విషయం తెలిసిందే. సరస్‌ ఫెస్టివల్‌కు పెద్ద ఎత్తున ఉద్యోగులు విధులు నిర్వర్తించారు. అలాంటి ఉద్యోగులందరూ కూడా రెండో శనివారం సెలవు వినియోగించుకునే అవకాశాన్ని ప్రభుత్వం కల్పించింది.