Pawan Kalyan: చింత చెట్టు కింద గిరిపుత్రులపై డిప్యూటీ సీఎం పవన్‌ కల్యాణ్‌ వరాలు

Adavithalli Bata 2 0: గ్రామీణాభివృద్ధిపై ప్రత్యేక దృష్టి సారించిన ఏపీ ఉప ముఖ్యమంత్రి పవన్‌ కల్యాణ్‌ గిరిజన ప్రాంతాల అభివృద్ధిపై మరింత దృష్టి సారించారు. ఈ క్రమంలోనే మరోసారి గిరిజన ప్రాంతాల అభివృద్ధి కోసం అడవితల్లి బాట 2.0 కార్యక్రమాన్ని ప్రారంభించారు. ఈ సందర్భంగా మన్యం ప్రాంతాల్లో తిరిగి గిరిజనులతో ప్రత్యేకంగా మాట్లాడి వారి కష్టసుఖాలు తెలుసుకున్నారు. చింతచెట్టు కింద మాటామంతి పెట్టిన పవన్‌ కల్యాణ్‌ అనంతరం గిరిజనులు అడిగిన అన్నీంటిని చేసేస్తానని వరాలు కురిపించారు. ఆ వివరాలు ఇలా ఉన్నాయి.

‘అడవితల్లిబాట 2.0’ కార్యక్రమాన్ని పోలవరం జిల్లా పరిధిలోని రంపచోడవరం నియోజకవర్గం వేములకొండ గ్రామ పంచాయతీ పరిధిలోని రాకోట గిరిశిఖర గ్రామంలో శ్రీకారం చుట్టారు. కాకవాడ, రాకోట, సువర్లవాడ, వేములకొండ గ్రామాలను కలిపేలా రూ.2.29 కోట్ల వ్యయంతో 3.4 కిలోమీటర్ల మేర నిర్మించనున్న రహదారికి డిప్యూటీ సీఎం పవన్‌ కల్యాణ్‌ శంకుస్థాపన చేశారు. అనంతరం రాకోట గ్రామంలో చింతచెట్టు కింద రచ్చబండ కార్యక్రమంలో గిరిపుత్రులతో ‘మాటా-మంతి’ చేశారు.

రాకోటపై వరాలు
సుమారు 350 మంది జనాభా కలిగిన రాకోట గ్రామాన్ని సందర్శించి, గిరిజనుల సమస్యలను స్వయంగా అడిగి తెలుసుకున్నారు. చింత చెట్టు కింద కూర్చుని వారితో మమేకమయ్యారు. గిరిజనులు ప్రస్తావించిన సమస్యలపై తక్షణమే స్పందించి, పరిష్కారాలకు పవన్ కల్యాణ్ ఆదేశాలు జారీ చేశారు. పాఠశాల, ఆరోగ్య కేంద్రం, ఆలయ అభివృద్ధికి నిధులు ఇస్తామని ప్రకటించారు. రాకోట గ్రా ఎంపీపీ పాఠశాల శిథిలావస్థలో ఉండడంతో పునరుద్ధరణకు రూ.20 లక్షలు మంజూరు చేశారు. గ్రామస్తుల విజ్ఞప్తి మేరకు విలేజ్ హెల్త్ క్లినిక్ నిర్మాణానికి రూ.15 లక్షలు ఇచ్చారు. రాకోట హనుమాన్ ఆలయం రేకుల షెడ్డులో కొనసాగుతుండడంతో ఆలయ అభివృద్ధికి రూ.20 లక్షలు కేటాయించారు.

‘మాటా-మంతి’ కార్యక్రమంలో రాకోట పరిసర ప్రాంతాలైన వేములకొండ, సువర్లవాడ, డబ్బావలస, తిరుగటిరాళ్లు, కాకవాడ, చిలకవీధి, వెట్టిచెలకలు, సోకులగూడెం తదితర గ్రామాల ప్రజలు తమ సమస్యలను డిప్యూటీ సీఎం పవన్ కల్యాణ్‌కు విన్నవించుకున్నారు. ప్రతి గ్రామానికి అంగన్‌వాడీ కేంద్రంతో కూడిన మండల పరిషత్ పాఠశాల, విలేజ్ హెల్త్ క్లినిక్ మంజూరు చేస్తూ వాటికి దాదాపు రూ.5 కోట్లు కేటాయించారు. గిరిజనులు తమ సమస్యలను స్వయంగా ఉప ముఖ్యమంత్రివర్యుల దృష్టికి తీసుకురాగా, వాటి పరిష్కారానికి అక్కడికక్కడే ఆదేశాలు జారీ చేశారు.

రాకోట గ్రామంలో వెదురు బొంగులతో గృహోపకరణాలు తయారు చేస్తున్న కొమ్మిరెడ్డి కుటుంబంతో డిప్యూటీ సీఎం పవన్‌ కల్యాణ్‌ మాట్లాడి వారి సమస్యలు తెలుసుకున్నారు. అనంతరం సెర్ప్ ఆధ్వర్యంలో వెదురు ఉత్పత్తుల ప్రోత్సాహానికి తీసుకుంటున్న చర్యలను అధికారులు వివరించారు. వెదురు ఉత్పత్తులకు మరింత విలువ జోడించి గిరిజన కుటుంబాలకు మెరుగైన ఆదాయం లభించేలా ప్రభుత్వం తరఫున సహకారం అందిస్తామని డిప్యూటీ సీఎం హామీ ఇచ్చారు. కాకవాడ గ్రామంలో పీఎం కృషి సించాయి యోజన 2.0 కింద వాటర్‌షెడ్ అభివృద్ధి పరికరాల పంపిణీని ప్రారంభించారు. వ్యవసాయ ఉత్పాదకతను పెంపొందించే లక్ష్యంతో రాష్ట్రవ్యాప్తంగా సుమారు రూ.68 కోట్ల వ్యయంతో 34 వేల మంది అర్హులైన రైతులకు వ్యవసాయ పనిముట్లు అందించే కార్యక్రమంలో భాగంగా స్థానిక గిరిజన రైతులకు పరికరాలను డిప్యూటీ సీఎం పవన్‌ కల్యాణ్‌ పంపిణీ చేశారు.