Chandrababu: మున్సిపల్‌ ఫలితాల్లో 'కూటమి క్లీన్‌స్వీప్‌'.. సీఎం చంద్రబాబు ఏమన్నారంటే?

AP Municipal Election Results: ఏపీలో జరిగిన మున్సిపల్‌ ఎన్నికల ఫలితాల్లో కూటమి క్లీన్‌స్వీప్‌ చేయగా.. ఈ ఫలితాలపై టీడీపీ అధినేత, సీఎం చంద్రబాబు తొలిసారి స్పందించారు. తాము చేస్తున్న సుపరిపాలనను మెచ్చి ఈ స్థానిక ఎన్నికల్లో ప్రజలు తీర్పు ఇచ్చారని.. అనునిత్యం ప్రజల ఆకాంక్షలు తీర్చేందుకు పనిచేయడం చూసి ప్రజలు ఓటేశారని చంద్రబాబు తెలిపారు. గుడ్ పాలిటిక్స్.. గుడ్ గవర్నెన్స్ ఇదే తన ప్రాధాన్యత అని స్పష్టం చేశారు.

మురసు తుఫానుపై మంగళశారం సమీక్ష నిర్వహించిన అనంతరం సీఎం చంద్రబాబు కీలక వ్యాఖ్యలు చేశారు. ఈ సందర్భంగా మున్సిపల్‌ ఎన్నికల ఫలితాలపై స్పందించారు. 'రాజకీయమా.. ప్రజల సమస్యల పరిష్కారమా అంటే నేను సమస్య పరిష్కారానికే ప్రాధాన్యత ఇస్తా. మూడు రోజుల పాటు నేను తుఫాన్ సహాయక చర్యలపైనే రాత్రింబవళ్లు పనిచేశా. అనునిత్యం ప్రజల ఆకాంక్షలు తీర్చేందుకు పనిచేశాం.. దీన్ని చూసే ప్రజలు ఓటేశారు' అని చెప్పుకొచ్చారు.

'ఇరిగేషన్ ప్రాజెక్టులు చేపడుతున్నాం.. పోలవరం ప్రాజెక్టు పూర్తి చేస్తాం. వెలిగొండ ద్వారా నీటిని అందించాం. అమరావతి పనులు పరుగులు పెట్టిస్తున్నాం. గతంలో రోడ్లను ధ్వంసం చేశారు... మేం రోడ్లేశాం. అన్ని పనులు చేసేశామని చెప్పడం లేదు.. వారసత్వంగా వచ్చిన సమస్యలు ఇంకా ఉన్నాయి. ప్రజలు ఇదే విధంగా కూటమిని ఆశీర్వదించాలి... సహకరించాలి' అని సీఎం చంద్రబాబు కోరారు. మంచి పాలన అందిస్తుండడంతోనే కూటమి ప్రభుత్వంపై ప్రజలకు విశ్వసనీయత ఉందని తెలిపారు. ప్రజల అభిప్రాయాలకు అనుగుణంగా పాలన అందిస్తున్నట్లు చెప్పారు.

'ప్రజలకు సేవలందించే విషయంలో ఏమైనా పొరపాట్లు ఉంటే వాటిని సరిదిద్దుకుంటున్నాం. ప్రజలు మెచ్చే పాలన ఇవ్వాలి. ప్రజలకు ఇబ్బందులను దూరం చేసేలా పాలన అందిస్తున్నాం' అని సీఎం చంద్రబాబు తెలిపారు. 'రాజకీయ పార్టీలు, కులాలు, మతాలు, అధికార పార్టీకి ఓటేయని వారుంటారు. లబ్దిపొందే వాళ్లు కూడా ఎగతాళి చేసే వారుంటారు. ఇలాంటివి ఉన్నా వాటిని పట్టించుకోకుండా ప్రజల కోసం పనిచేస్తున్నాం' అని టీడీపీ అధినేత చంద్రబాబు పేర్కొన్నారు.

తుఫాన్‌ ప్రభావంపై సీఎం చంద్రబాబు స్పందిస్తూ.. 'కేంద్ర ప్రభుత్వానికి తుఫాన్ నష్టంపై మధ్యంతర నివేదిక పంపాం. రూ.4,526 కోట్ల మేర నష్టం జరిగింది. త్వరలో పూర్తి స్థాయి నివేదికను పంపుతాం' అని తెలిపారు. 'అర్నబ్ తుఫాన్ కారణంగా 3.52 లక్షల హెక్టార్లల్లో వ్యవసాయ పంటలు నష్టం కాగా.. 23,211 హెక్టార్లల్లో ఉద్యాన పంటలకు నష్టం వాటిల్లింది' అని వెల్లడించారు. 'మురసు తుఫాన్ పరిస్థితిపైన కేంద్ర హోంమంత్రి మాట్లాడారు.. మురసు తుఫాన్‌పైనా ప్రాథమిక అంచనాలు సిద్ధం చేస్తున్నాం' అని తెలిపారు. తుఫాన్ల సమయంలో ప్రాణాలు కాపాడడంతో పాటు ప్రజలకు కావాల్సిన అన్ని అవసరాలపై శ్రద్ధ పెట్టామని చెప్పారు.

'ప్రజల ప్రాణాలను కాపాడటమే లక్ష్యంగా అందరం కలిసి పని చేశాం.. సాధారణ స్థితికి తెచ్చేందుకు కృషి చేశాం. ఈ రెండు తుఫాన్లతో రిజర్వాయర్లకు 11 టీఎంసీల నీటిని మళ్లించగలిగాం. మైనర్ ఇరిగేషన్ ట్యాంకుల్లో 25 టీఎంసీలు నీటిని భద్రపరిచగలిగాం.    రెండుసార్లు తుఫాన్లు వచ్చినా.. ఇంకా 28 శాతం లోటు వర్షపాతంలో ఉన్నాం.    రాయలసీమలో ఇంకా లోటు వర్షపాతంలోనే ఉంది. తీర ప్రాంతంలో తుఫాన్లు వస్తాయి... సీమలో కరవు ఉంది' అని సీఎం చంద్రబాబు వెల్లడించారు.

లోటు వర్షపాతం అధిగమించాలంటే పోలవరం పూర్తి చేయాలని.. ప్రాధాన్యత ఇరిగేషన్ ప్రాజెక్టులు పూర్తిచేయాల్సి ఉంటుందని సీఎం చంద్రబాబు పేర్కొన్నారు. ప్రస్తుతం తుఫాన్లలో ఎదురైన అనుభవాలను విశ్లేషించుకుని శాశ్వత పరిష్కారాలపై దృష్టి సారిస్తామని చెప్పారు. 'తుఫాన్ల నేపథ్యంలో పంటల సీజన్ మార్చాలా..? లేక తుఫాన్లను తట్టుకుని నిలబడగలిగే వెరైటీ పంటలను వేయడమా..? అనేది చూస్తున్నాం. ఈసారి అందరితోనూ పంటల బీమా చేయించాం.. పంటల బీమాతో పాటు ఇన్పుట్ సబ్సిడీ అందుబాటులోకి వస్తే రైతులకు మేలు చేకూరుతుంది' అని తెలిపారు.