PM Surya Ghar: ఉచిత కరెంట్... జీరో బిల్లు..! పీఎం సూర్యఘర్ సంచలనం..!

PM Surya Ghar: ఆంధ్రప్రదేశ్‌లో సూర్యకాంతి ఇప్పుడు ఇంటింటికీ వెలుగులుంచుతోంది. నెలకు 300 యూనిట్ల వరకు ఉచిత విద్యుత్ అందించడమే టార్గెట్ గా తెచ్చిన 'పీఎం సూర్యఘర్' పథకం రాష్ట్రంలో స్పీడప్ అందుకుంది. ఇప్పటికే 4 లక్షల 93 వేల  సోలార్ రూఫ్‌టాప్ కనెక్షన్లతో ఏపీ జాతీయ స్థాయిలో 4వ స్థానంలో నిలిచింది. ఒక్క APCPDCL పరిధిలోనే దాదాపు 55 వేల సోలార్ కనెక్షన్లను గ్రిడ్‌కు అనుసంధానించారు. ఇంధన శాఖ ప్రత్యేక ప్రధాన కార్యదర్శి కె. విజయానంద్ నేతృత్వంలో సమీక్షలు నిర్వహిస్తూ, రాబోయే నెలల విద్యుత్ అవసరాలకు అనుగుణంగా ప్రణాళికలు వేగవంతం చేస్తున్నారు.

పథకంలో ఎస్సీ, ఎస్టీ, బీసీ కుటుంబాలకు ప్రభుత్వం అదనపు ఊరటనిస్తోంది. ముఖ్యంగా ఎస్సీ, ఎస్టీ గృహాలకు నూటికి నూరు శాతం ఉచితంగా సోలార్ ప్యానెళ్లను ఏర్పాటు చేస్తున్నారు. కేంద్రం ఇచ్చే సబ్సిడీ పోను మిగిలిన మొత్తాన్ని రాష్ట్ర ప్రభుత్వమే భరిస్తోంది. ఒక్కో ఇంటికి రూపాయి కూడా ఖర్చు లేకుండా లక్షా 25 వేల వరకు వెచ్చిస్తూ 2 కేవీ లేదా 3 కేవీ సోలార్ ప్యానెళ్లను బిగిస్తున్నారు. ప్రకాశం జిల్లా వై.పాలెం నియోజకవర్గంలో 2,661 కుటుంబాలకు రూ.32.34 కోట్లతో సోలార్ వెలుగులు నింపగా, చిన్నగుడిపాడు వంటి ప్రాంతాల్లో వందలాది ఇళ్లు వెలిగిపోతున్నాయి.

నెలకు 200 యూనిట్ల లోపు వాడే బీసీ కుటుంబాలకు కూడా ప్రభుత్వం పెద్ద ఊరటనిచ్చింది. 2 కిలోవాట్ల సోలార్ సిస్టమ్‌పై కేంద్రం ఇచ్చే 60వేల సబ్సిడీకి అదనంగా రాష్ట్ర ప్రభుత్వం మరో 20 వేలు ఇస్తోంది. అంటే ఏకంగా 80,000ల సబ్సిడీ దక్కుతుంది. మిగిలిన రూ.40,000ల కోసం APCPDCL తరపున బ్యాంకులు తక్కువ వడ్డీతో రుణం అందిస్తున్నాయి. ఈ రుణాన్నీ వినియోగదారులు నెలకు వచ్చే విద్యుత్ బిల్లుతో పాటు 60 ఈఎంఐలలో చెల్లించే వెసులుబాటు కల్పించారు.

ఈ సిస్టమ్ అంతా ఆన్-గ్రిడ్ సాంకేతికతతో పనిచేస్తుంది. ఇళ్లపై ఉత్పత్తి అయిన విద్యుత్ నేరుగా పవర్ గ్రిడ్‌కు కనెక్ట్ అవుతుంది. ఇంటి అవసరాలకు వాడుకోగా మిగిలిన విద్యుత్‌ను గ్రిడ్‌కు పంపితే... డిస్కమ్‌లే ప్రతి యూనిట్‌కు 2.09 పైసల చొప్పున లబ్ధిదారుడికి చెల్లిస్తాయి. అంటే కరెంట్ బిల్లు కట్టకపోగా.. తిరిగి కరెంట్ ద్వారానే డబ్బు సంపాదించుకునే అవకాశం లభిస్తోంది. ఆసక్తి ఉన్న వినియోగదారులు టోల్ ఫ్రీ నంబర్ 1912 ద్వారా గానీ, ఆన్‌లైన్ ద్వారా గానీ నేరుగా దరఖాస్తు చేసుకోవచ్చు.

కొన్ని చోట్ల క్వాలిటీ లేని ప్యానెళ్లు, వెండర్ల ఆలస్యం వల్ల సమస్యలు రాకుండా అనుభవం ఉన్న కంపెనీలనే ఎంచుకోవాలని నిపుణులు సూచిస్తున్నారు. బొగ్గు కొరత, పెరుగుతున్న ఉష్ణోగ్రతల వేళ.. సోలార్ విద్యుత్ భవిష్యత్తుకు ఏకైక మార్గంగా మారింది. ప్రభుత్వం ఇస్తున్న ఈ భారీ సబ్సిడీలను సద్వినియోగం చేసుకుంటే కరెంట్ బిల్లుల భారం నుంచి శాశ్వత విముక్తి పొందవచ్చని అధికారులు సూచిస్తున్నారు.