దసరా తర్వాత ముంబైలో 8వ వేతన సంఘం కీలక సమావేశం..ఫిట్‌మెంట్ ఫ్యాక్టర్, బేసిక్ పేపై నిర్ణయం!

8th Pay Commission Updates: కేంద్ర ప్రభుత్వ ఉద్యోగులు, పెన్షనర్లు  ఎంతో ఆసక్తిగా ఎదురుచూస్తున్న 8వ కేంద్ర వేతన సంఘం పనులు మరింత స్పీడప్ అయ్యాయి. తన సమగ్ర నివేదికను సిద్ధం చేసి ప్రభుత్వానికి సమర్పించడానికి కమీషన్‌కు  కొన్ని నెలల సమయం మాత్రమే మిగిలింది. సుప్రీంకోర్టు విశ్రాంత న్యాయమూర్తి జస్టిస్ రంజనా ప్రకాష్ దేశాయ్ నేతృత్వంలోని ఈ సంఘం.. ప్రస్తుతం వివిధ రకాల భాగస్వాములతో విస్తృత స్థాయి సంప్రదింపులు జరుపుతోంది. వివిధ ఉద్యోగ సంఘాలు, వివిధ శాఖల ప్రతినిధులు, పెన్షనర్ల అసోసియేషన్లు,  సమాఖ్యల ప్రతినిధులతో కమీషన్ వరుస సమావేశాలు నిర్వహిస్తూ వారి వినతులను స్వీకరిస్తోంది. దీనిలో భాగంగా ఇప్పటికే పలు రాష్ట్రాల్లో క్షేత్రస్థాయి పర్యటనలు పూర్తి చేసిన కమీషన్.. ఇటీవల బెంగళూరులో కీలక సమావేశాన్ని ముగించింది. దసరా పండుగ ముగిసిన వెంటనే మరో ప్రధాన సమావేశం జరగనుంది. దీనిలో  వేతన పెంపు, ఫిట్‌మెంట్ ఫ్యాక్టర్ వంటి కీలక అంశాలపై తీవ్రంగా చర్చించే అవకాశమున్నట్లు తెలుస్తోంది.

పెరుగుతున్న ద్రవ్యోల్బణం.. కాలక్రమేణా మారుతున్న ఆర్థిక వ్యవస్థను దృష్టిలో ఉంచుకుని, కేంద్ర ప్రభుత్వం తన ఉద్యోగుల భత్యాలు, జీతాలు, పెన్షన్లను సవరించడానికి ప్రతి 10 సంవత్సరాలకు ఒకసారి వేతన సంఘంను ఏర్పాటు చేస్తుంది. ప్రభుత్వం ప్రతి ఆరు నెలలకు ఒకసారి కరువు భత్యాన్ని పెంచుతున్నప్పటికీ.. ఒక నిర్దిష్ట స్థాయి తర్వాత, కేవలం DAను పెంచడం మాత్రమే సరిపోదు. ప్రభుత్వ ఉద్యోగుల జీవన ప్రమాణాలను మెరుగుపరచడానికి, మూల వేతనాలలో కూడా మార్పులు అవసరం. ఇది కేంద్ర ప్రభుత్వ ఉద్యోగులు.. పదవీ విరమణ చేసిన మాజీ సైనికులందరిపై ప్రభావం చూపుతుంది.  కొత్త వేతన సంఘం అమలు వల్ల సుమారు 49 లక్షల మంది కేంద్ర ప్రభుత్వ ఉద్యోగులు.. 68 లక్షలకు పైగా పెన్షనర్లు ప్రయోజనం పొందుతారు.

8వ వేతన సంఘం  జనవరి 1, 2026 నుండి అమలులోకి రావలసి ఉన్నప్పటికీ.. ఆ సంఘం ఇంకా తన నివేదికను సిద్ధం చేసి ప్రభుత్వానికి సమర్పించలేదు. ప్రభుత్వ ఆమోదం లభించిన తర్వాతే పెరిగిన వేతనం ఉద్యోగుల బ్యాంకు ఖాతాలకు జమ అవుతుంది.  కమిషన్‌ను ఏర్పాటు చేసిన తర్వాత.. దాని నివేదికను సిద్ధం చేయడానికి మే 2027 వరకు సమయం ఇచ్చారు. వచ్చే ఏడాది చివరి నాటికి ఇది పూర్తిగా అమలు అవుతుందని భావిస్తున్నారు. ఎందుకంటే, నివేదిక సమర్పించిన తర్వాత, కేంద్ర ఆర్థిక మంత్రిత్వ శాఖ.. మంత్రుల ప్రత్యేక బృందం ఈ సిఫార్సులను నిశితంగా అధ్యయనం చేస్తాయి.  ప్రతిపాదిత జీతభత్యాల పెంపుదల వల్ల జాతీయ ఖజానాపై పడే భారాన్ని, అలాగే ఏ మార్పులను ఆమోదించవచ్చో, ఏ మార్పులను ఆమోదించలేమో ఈ సమీక్ష అంచనా వేస్తుంది. సమీక్ష పూర్తయ్యాక, దానిని కేంద్ర మంత్రివర్గానికి పంపుతారు. కేబినెట్ ఆమోదం అందిన తర్వాత, ప్రభుత్వం అధికారిక గెజిట్ నోటిఫికేషన్‌ను జారీ చేస్తుంది. అనంతరం శాఖలు కొత్త జీతాలను లెక్కించడం ప్రారంభిస్తాయి. ఈ మొత్తం ప్రక్రియకు మరో 3-6 నెలల సమయం పట్టవచ్చు.

ముంబై సమావేశం ఎప్పుడు జరుగుతుంది? 
8వ వేతన సంఘం అక్టోబర్ 22-23 (గురువారం-శుక్రవారం) తేదీలలో ముంబైలో పర్యటించనుంది. ఏదైనా సంస్థ తమ డిమాండ్లను సమర్పించడానికి కమిషన్ ముందు వ్యక్తిగతంగా హాజరు కావాలనుకుంటే, అటువంటి అపాయింట్‌మెంట్‌లకు గడువు అక్టోబర్ 10గా నిర్ణయించారు.  కానీ ఆ తేదీ ఇప్పుడు ముగిసింది. ఈ సమావేశంలో వేతన నిర్మాణాలు, పింఛను విధానాలు.. భత్యాలలో మెరుగుదలలకు సంబంధించిన డిమాండ్లు కూడా చర్చించనున్నారు. ఉద్యోగుల పని పరిస్థితులపై ప్రత్యక్ష అనుభవాన్ని పొందేందుకు, నగరంలోని సెంట్రల్ రైల్వే  జోన్ పరిధిలోని రైల్వే విభాగాలను కమిషన్ సందర్శిస్తుందని రైల్వే మంత్రిత్వ శాఖ గతంలోనే ప్రకటించిందన్నది గమనార్హం. ఈ పర్యటన అజెండాలో ట్రాక్ నిర్వహణ, సిగ్నల్ కార్యకలాపాలు, రోజువారీ కార్యకలాపాలు, విధులు, నిర్వహణ పనులు, కంట్రోల్ రూమ్‌లు, పనికి సంబంధించిన ప్రమాదాల తనిఖీలు ఉన్నాయి.

రెండు గుర్తింపు పొందిన ఫెడరేషన్లైన ఏఐఆర్ఎఫ్ (ఆల్ ఇండియా రైల్వేమెన్స్ ఫెడరేషన్), ఎన్ఎఫ్ఐఆర్ (నేషనల్ ఫెడరేషన్ ఆఫ్ ఇండియన్ రైల్వేమెన్)లకు ఈ పర్యటన గురించి వివరించారు. రైల్వే మంత్రిత్వ శాఖ వారికి శాఖల జాబితాను అందించి, పరిశీలన కోసం ఇతర కీలక రంగాలను సూచించమని కోరింది. ఈ రెండు ఫెడరేషన్లు ట్రాక్‌మెన్, స్టేషన్ మాస్టర్లు, లోకో పైలట్లు, టెక్నీషియన్ల వంటి క్షేత్రస్థాయి రైల్వే ఉద్యోగులకు ప్రాతినిధ్యం వహిస్తున్నందున ఈ సమావేశాలు ప్రాముఖ్యతను సంతరించుకున్నాయి. ఇప్పుడు, వారి అభిప్రాయాలను నేరుగా కమిషన్‌కు సమర్పించడం ద్వారా, తరచుగా ఫైళ్లలో మరుగునపడి ఉండే అసలు సమస్యలు బయటపడతాయి. ఈ విషయంలో, అక్టోబర్ 22, 23 తేదీలలో ముంబై పర్యటన సందర్భంగా పే కమిషన్ బృందం ప్రత్యేకంగా సెంట్రల్ రైల్వే (CR) జోన్‌లోని వివిధ రైల్వే శాఖలను సందర్శిస్తుంది.