పుతిన్ దెబ్బకు భారీగా తగ్గిన గోల్డ్ రేట్స్..నేటి ధరలు ఎలా ఉన్నాయంటే..?

Gold Rate: అంతర్జాతీయ మార్కెట్లో చోటుచేసుకుంటున్న తాజా పరిణామాల నేపథ్యంలో బంగారం ధరలు క్రమంగా తగ్గుతున్నాయి. బంగారం ధరలు  ఇంతలా దిగిరావడానికి ప్రధాన కారణం ఏంటంటే..  రష్యా పెద్ద ఎత్తున పసిడిని విక్రయించడమేనని ఆర్థిక నిపుణులు విశ్లేషిస్తున్నారు. ఇటీవల రష్యా తన వద్ద ఉన్న భారీ బంగారం నిల్వలను బహిరంగ మార్కెట్లో విక్రయానికి పెట్టిన సంగతి తెలిసిందే.

ఉక్రెయిన్‌తో కొనసాగుతున్న యుద్ధం కారణంగా ఎదురవుతున్న ఆర్థిక నష్టాలను పూడ్చుకునేందుకు రష్యా ఈ వ్యూహాన్ని అనుసరిస్తున్నట్లు నిపుణులు చెబుతున్నారు. దీనిలో భాగంగా తన అపారమైన పసిడి నిల్వల నుంచి టన్నుల కొద్దీ బంగారాన్ని చైనాకు విక్రయిస్తోంది. ఇందుకు బలం చేకూరుస్తూ తాజాగా ప్రముఖ అంతర్జాతీయ వార్తా సంస్థలు కీలక గణాంకాలను వెల్లడించాయి.

ఆ నివేదికల ప్రకారం.. 2026 జనవరి నుంచి సెప్టెంబర్ మధ్య కాలంలో రష్యా హాంకాంగ్ మార్గం ద్వారా చైనాకు ఏకంగా 165 టన్నుల బంగారాన్ని ఎగుమతి చేసింది. గత ఏడాది ఇదే సమయంతో పోలిస్తే ఈ ఎగుమతులు మూడు రెట్లకు పైగా పెరగడం గమనార్హం. ఉక్రెయిన్ యుద్ధం కొనసాగుతున్న వేళ, రష్యా ఇంత భారీ స్థాయిలో బంగారాన్ని విక్రయిస్తుండటం ఇప్పుడు అంతర్జాతీయ బులియన్ మార్కెట్లో హాట్ టాపిక్‌గా మారింది.

యుద్ధానికి ముందుతో పోలిస్తే రష్యా బంగారు ఎగుమతులు 55 రెట్లకు పైగా పెరిగాయి. 2021లో, హాంగ్ కాంగ్ ఏడాది మొత్తానికి రష్యా నుండి కేవలం 3.3 టన్నుల బంగారాన్ని మాత్రమే కొనుగోలు చేసింది. కానీ 2026లో, అది జనవరి,  సెప్టెంబర్ మధ్య 165 టన్నులను దిగుమతి చేసుకుంది. ప్రస్తుతం, హాంగ్ కాంగ్ ద్వారా చైనాకు వస్తున్న మొత్తం బంగారంలో సుమారు 15శాతం  రష్యా నుండే వస్తోంది.

2022 ఫిబ్రవరిలో రష్యా ఉక్రెయిన్‌పై దాడి చేసిన తరువాత, అమెరికా.. యూకేతో సహా అనేక పాశ్చాత్య దేశాలు ఆర్థిక ఆంక్షలను విధించాయి. లండన్ బులియన్ మార్కెట్ అసోసియేషన్ (LBMA) తన గుర్తింపు పొందిన సరఫరాదారుల జాబితా నుండి రష్యన్ బంగారు శుద్ధి కర్మాగారాలను తొలగించింది. G7 దేశాలు కూడా రష్యా బంగారు దిగుమతులను నిషేధించాయి. దీనివల్ల అమెరికా,  యూరప్ వంటి సాంప్రదాయ మార్కెట్లలో బంగారం అమ్మడం రష్యాకు కష్టంగా మారింది. ఫలితంగా, అది చైనా వంటి ఇతర మార్కెట్ల వైపు మళ్లింది. అయితే, రష్యా పెద్ద ఎత్తున బంగారం అమ్మితే, అంతర్జాతీయ మార్కెట్లో బంగారం ధరలు తగ్గే అవకాశం ఉందని అంచనా వేస్తున్నారు.

ఉక్రెయిన్‌తో కొనసాగుతున్న యుద్ధం కారణంగా రష్యా సైనిక వ్యయం గణనీయంగా పెరిగింది. అదే సమయంలో, చమురు,  సహజ వాయువు ఎగుమతుల నుండి వచ్చే ఆదాయాలు తగ్గడం ప్రభుత్వ ఆర్థిక వ్యవస్థపై ఒత్తిడిని పెంచుతోంది. ఈ నేపథ్యంలో, ప్రభుత్వ ఖర్చులు,  ఆర్థిక అవసరాలను తీర్చడానికి బంగారు నిల్వలను ఉపయోగిస్తున్నారని విశ్లేషణలు సూచిస్తున్నాయి. డిసెంబర్ 2025 నుండి రష్యా బంగారు నిల్వలు సుమారు 62 టన్నులు తగ్గాయని ఉక్రెయిన్ విదేశీ నిఘా సంస్థ గతంలో నివేదించింది.

కాగా నేడు నవంబర్ 15న హైదరాబాద్‌లో 24 క్యారెట్ల బంగారం ధర గ్రాముకు రూ. 13,762గా ఉంది. ఫలితంగా, 10 గ్రాముల బంగారం ధర రూ.1,37,620కి చేరింది. ఇది ముందు రోజుతో పోలిస్తే గ్రాముకు రూ.87 తగ్గుదలను సూచిస్తుంది. తాజా ధరల పట్టిక ప్రకారం 10 గ్రాములకు రూ.870 తగ్గుదల నమోదైంది.