Bank Charges: బ్యాంకు ఖాతాదారులకు భారీ షాక్‌.. ఛార్జీలు పెంచుతూ షాకింగ్‌ నిర్ణయం

Savings Account Holders: సేవింగ్‌ ఖాతా కలిగిన వినియోగదారులకు ప్రైవేటు రంగ దిగ్గజం ఐసీఐసీఐ భారీ షాక్‌ ఇచ్చింది. తన సేవింగ్స్ అకౌంట్ వినియోగదారులపై ఛార్జీల భారం మోపింది. తమ వినియోగదారులకు సంబంధించి ఛార్జీలను పెంచేసింది. బ్యాంకింగ్ సేవల రుసుములను తాజాగా సవరించింది. ఎంపిక చేసిన నగదు లావాదేవీల ఛార్జీలను పెంచుతూ ఐసీఐసీఐ నిర్ణయం తీసుకుంది. పెంచిన కొత్త ఛార్జీలు ఈ ఏడాది డిసెంబర్ 1వ తేదీ నుంచి అమల్లోకి రానున్నాయి. ఈ ఛార్జీలకు సంబంధించిన వివరాలు ఇలా ఉన్నాయి.

ఐసీఐసీఐ బ్యాంక్ ప్రకటన ప్రకారం.. కొత్తగా సవరించిన ఛార్జీలు సేవింగ్స్ ఖాతాదారులకు ప్రస్తుతం ఉన్న ఉచిత లావాదేవీల పరిమితిలో ఎటువంటి మార్పు లేదు. అకౌంట్‌ వినియోగదారులు యథావిధిగా నెలకు మూడు ఉచిత నగదు డిపాజిట్లు, విత్‌డ్రాయల్స్ పొందవచ్చు. ఈ ఉచిత పరిమితి దాటిన తర్వాత లేదా నెలవారీ ఉచిత క్యాష్ లిమిట్ విలువను దాటితే వినియోగదారులు అధిక మొత్తంలో చెల్లించుకోవాల్సిన పరిస్థితి.

ఐసీఐసీఐ బ్యాంక్ బ్రాంచ్‌లు, క్యాష్ రీసైక్లర్ మెషిన్ల ద్వారా చేసే నగదు లావాదేవీలపై కొత్తగా పెంచిన ఛార్జీలు వర్తిస్తాయి. ఉచిత పరిమితులు దాటిన తర్వాత ప్రతి రూ.వెయ్యి లావాదేవీపై ఛార్జీలు పెరగనున్నాయి. గతంలో ఉన్న రూ.3.50 ఛార్జీ ఇప్పుడు రూ.4కు పెరగనుంది. నెలవారీ ఉచిత నగదు పరిమితి రూ.లక్ష దాటితే తర్వాతి లావాదేవీలు రూ.లక్ష పైబడిన లావాదేవీలకు ఛార్జీల పెంపు వర్తిస్తుంది.

బ్యాంకు ఖాతాదారుల్లో ఎవరిపై భారం పడనుంది అంటే.. నెలవారీ పరిమితికి లోబడి సాధారణ లావాదేవీలు నిర్వహించేవారికి ఎలాంటి భారం ఉండదు. చిన్న మదుపర్లు, ఖాతాదారులకు ఛార్జీల పెంపు నుంచి మినహాయింపు ఉంది. బ్యాంక్ శాఖల ద్వారా పెద్ద మొత్తంలో నగదు డిపాజిట్లు చేసే వారు, విత్‌డ్రా చేసే హై-వాల్యూ కస్టమర్లు అధిక ఛార్జీలు చెల్లించాల్సిన పరిస్థితి ఏర్పడింది. వీరంతా డిసెంబర్ 1వ తేదీ నుంచి ఎక్కువ ఛార్జీలు భరించాల్సి ఉందని ఐసీఐసీఐ ఓ ప్రకటనలో తెలిపింది. డిజిటల్ లావాదేవీలను ప్రోత్సహించేలా బ్యాంకులు కొత్త నిబంధనలు తీసుకువస్తున్న సమయంలో.. ప్రైవేటు రంగ బ్యాంకు ఐసీఐసీఐ సాధారణ ఖాతాదారులపై ఆర్థిక భారం మోపుతుండడం గమనార్హం.