PRC, పెండింగ్ బిల్లులు తేల్చకపోతే ఉద్యమం తప్పదు.. ప్రభుత్వంపై విరుచుకుపడ్డ ఎమ్మెల్సీ శ్రీపాల్ రెడ్డి..!!

PRC: రాష్ట్రంలో ఉపాధ్యాయుల పీఆర్సీ, పెండింగ్ బిల్లుల పరిష్కారం ప్రభుత్వం తాత్సారం చేస్తే మరో ఉద్యమం తప్పదని హెచ్చరించారు పీఆర్టీయూ నల్లగొండ, ఖమ్మం , వరంగల్ నియోజకవర్గ టీచర్ ఎమ్మెల్సీ పింగళి శ్రీపాల్ రెడ్డి.  నల్లగొండలోని జీఎం గార్డెన్ లో 2 రోజులపాటు జరిగే పీఆర్టీయూ  6వ రాష్ట్ర కౌన్సిల్ సమావేశానికి ముఖ్య అతిథిగా హాజరయ్యారు. అనంతరం ఆయన మాట్లాడుతూ.. ఉపాధ్యాయులు, ఉద్యోగులు ఎదుర్కొంటున్న సమస్యల పరిష్కారం కోసం పోరాటాలు ఉద్రుతం చేస్తామని స్పష్టం చేశారు.

ఉపాధ్యాయులు, ఉద్యోగుల న్యాయమైన హక్కుల సాధనకోసం పీఆర్టీయూ ఎల్లప్పుడూ ముందువరుసలో ఉంటుందని.. సమస్యలపై రాజీలేని పోరాటాలు చేస్తామని తేల్చి చెప్పారు. రాబోయే నల్లగొండ, ఖమ్మం, వరంగల్ పట్టభద్రుల ఎమ్మెల్సీ ఎన్నికల్లో పీఆర్టీయూ అభ్యర్థిగా రాష్ట్ర సంఘ ప్రధాన కార్యదర్శి.. నల్లగొండ జిల్లా వాసి సుంకరి భిక్షం గౌడ్ బరిలోకి దింపుతున్నట్లు వెల్లడించారు. సంఘం   అభివృద్ధికి, ఉపాధ్యాయుల సంక్షేమానికి ఆయన అందించిన సేవలను గుర్తించే ఈ నిర్ణయం తీసుకున్నట్లు శ్రీపాల్ రెడ్డి వెల్లడించారు.

కౌన్సిల్ సమావేశాల ముగింపు సందర్భంగా పీఆర్టీయూ తెలంగాణ రాష్ట్ర నూతన కార్యవర్గాన్ని ఎన్నిక చేసి వివరాలను వెల్లడించారు. రాష్ట్ర నూతన అధ్యక్షుడిగా సుంకరి భిక్షంగౌడ్ ను ఎన్నున్నారు. ఈయన వచ్చే నెలలో ఉద్యోగ విరమణ పొందనున్నారు. రాష్ట్ర నూతన ప్రధాన కార్యదర్శిగా మధుసూదన్ రెడ్డి ఎన్నుకున్నారు.  ఇంతకుముందు హైదరాబాద్ జిల్లా ప్రధాన కార్యదర్శిగా బాధ్యతలు నిర్వహించారు.  

ఈ రెండు రోజుల కౌన్సిల్ సమావేశాల్లో పీఆర్టీయూ మాజీ రాష్ట్ర అధ్యక్షుడు పుల్గం దామోదర్‌రెడ్డి, మాజీ ఎమ్మెల్సీ మోహన్‌రెడ్డిలతో పాటు సంఘం ముఖ్య నాయకులు వంగ మహేందర్‌రెడ్డి, కోమటిరెడ్డి వెంకటరెడ్డి, పేరి వెంకటరెడ్డి, గుండు లక్ష్మణ్, జగన్మోహన్ గుప్తా, కాళం నారాయణరెడ్డి, మేకల జానారెడ్డి, అద్దంకి సునీల్ తదితరులు పెద్ద సంఖ్యలో పాల్గొన్నారు.