Adarsha Kutumbam Release Postpone: మూడు రోజుల్లో మూవీ రిలీజ్..అంతలోనే వెంకటేష్ సినిమా వాయిదా..ఎందుకు?

Adarsha Kutumbam Movie Release Postpone: పండగల సమయంలో పెద్ద హీరోల సినిమాలు థియేటర్లలో విడుదలవుతుంటే ఆ వాతావరణమే వేరుగా ఉంటుంది. పండగ వినోదంతో పాటు అభిమాన కథానాయకుడి సినిమాని వెండితెరపై చూడడం అభిమానులకు ఎంతో ఉత్సాహాన్ని ఇస్తుంది. అందుకే భారీ బడ్జెట్ చిత్రాలన్నీ పండగలను లేదా వేసవి సెలవులను టార్గెట్ చేస్తూ విడుదలవుతుంటాయి. ముఖ్యంగా, ఇటీవలి కాలంలో విక్టరీ వెంకటేశ్ నటించిన చిత్రాలు ప్రతి సంక్రాంతికి విడుదల కావడం, అది బాక్సాఫీస్ వద్ద ఘనవిజయం సాధించడం ఆనవాయితీగా మారింది.

గతేడాది సంక్రాంతి కానుకగా వచ్చిన 'సంక్రాంతికి వస్తున్నాం' మూవీ బ్లాక్ బస్టర్ హిట్‌గా నిలిచింది. అలాగే, ఈ ఏడాది సంక్రాంతి పండక్కి మెగాస్టార్ చిరంజీవి నటించిన 'మన శంకర వర ప్రసాద్ గారు' చిత్రంలో వెంకటేశ్ ఒక ప్రత్యేక (క్యామియో) పాత్రలో కనిపించి ప్రేక్షకులను అలరించారు. అంతకుముందు 2019 సంక్రాంతి రేసులో వచ్చిన 'ఎఫ్ 2' చిత్రంతో భారీ బ్లాక్ బస్టర్ కొట్టారు. అంతేకాకుండా, వచ్చే ఏడాది సంక్రాంతి కానుకగా అనిల్ రావిపూడి దర్శకత్వంలో 'జనవరి 12 విడుదల' అనే చిత్రంతో ముందుకు రాబోతున్నట్లు ఇప్పటికే అధికారికంగా డేట్‌ను ప్రకటించారు.

అయితే, సంక్రాంతి కంటే ముందే ఈ ఏడాది దసరా కానుకగా వెంకటేశ్ నటించిన 'ఆదర్శ కుటుంబం' సినిమాను ప్రేక్షకుల ముందుకు తీసుకురావాలని చిత్రబృందం ప్లాన్ చేసింది. మాటల మాంత్రికుడు త్రివిక్రమ్ శ్రీనివాస్ దర్శకత్వంలో ఈ సినిమా రూపుదిద్దుతుండటంతో ఫ్యాన్స్‌లో భారీ అంచనాలు నెలకొన్నాయి. గతంలో వీళ్లిద్దరి కాంబినేషన్‌లో వచ్చిన 'నువ్వు నాకు నచ్చావ్', 'మల్లీశ్వరి' చిత్రాలు బ్లాక్ బస్టర్ విజయాలు సాధించడమే ఇందుకు ప్రధాన కారణం. దాంతో ఈ చిత్రం కోసం సినీ ప్రియులు ఎంతో ఆసక్తిగా ఎదురుచూశారు.

దసరా కానుకగా అక్టోబర్ 9న 'ఆదర్శ కుటుంబం - ఏకే 47' విడుదల చేసేందుకు సర్వం సిద్ధం చేసినప్పటికీ, అనూహ్యంగా ఈ సినిమా రిలీజ్ డేట్ వాయిదా పడింది. ఎంతో ఆశగా ఎదురుచూస్తున్న తరుణంలో సడెన్ గా మూవీ వాయిదా పడటంతో వెంకటేశ్ అభిమానులకు పెద్ద షాక్ తగిలింది. కాగా, ఈ మూవీని అక్టోబర్ 30న విడుదల చేసే అవకాశాలు ఉన్నట్లు ప్రచారం జరుగుతోంది. దీనికి సంబంధించి చిత్ర యూనిట్ నుంచి త్వరలోనే అధికారిక ప్రకటన రానుంది.