Trivikram Srinidhi Shetty: హీరోయిన్ శ్రీనిధి కాళ్లు మొక్కబోయిన డైరెక్టర్ త్రివిక్రమ్..'ఆదర్శ కుటుంబం' వేడుకలో ఆసక్తికర ఘటన!

Trivikram Srinidhi Shetty Video: పలుమార్లు వాయిదా పడిన ఈ సినిమా ఎట్టకేలకు అక్టోబర్ 30న దీపావళి పండుగ కానుకగా ప్రేక్షకుల ముందుకు రాబోతోంది. ఈ సందర్భంగా హైదరాబాద్‌లోని శిల్పకళా వేదికలో అత్యంత వైభవంగా నిర్వహించిన ప్రీ రిలీజ్ ఈవెంట్‌లో ఒక ఆసక్తికరమైన సంఘటన చోటుచేసుకుంది. స్టేజ్ వద్ద తనను పలకరించి కాళ్లకు నమస్కరించబోయిన కథానాయిక శ్రీనిధి శెట్టికి గౌరవం ఇస్తూ, స్టార్ డైరెక్టర్ త్రివిక్రమ్ సరదాగా ఆమె కాళ్లు మొక్కేందుకు కిందికి వంగారు. ఈ ఊహించని పరిణామంతో అక్కడ నవ్వులు విరియగా, ప్రస్తుతం ఇందుకు సంబంధించిన వీడియో నెట్టింట బాగా వైరల్ అవుతోంది.

టాలీవుడ్ సినీ పరిశ్రమలో తనదైన పదునైన సంభాషణలు, ప్రత్యేకమైన మేధస్సు, సెన్స్ ఆఫ్ హ్యూమర్‌తో ప్రత్యేక గుర్తింపు తెచ్చుకున్న ప్రముఖ దర్శకుడు త్రివిక్రమ్ శ్రీనివాస్. ఆయన చిత్రాలకు, సంభాషణలకు ప్రత్యేకమైన ఫ్యాన్ బేస్ ఉంది. మహేష్ బాబు హీరోగా నటించిన 'గుంటూరు కారం' సినిమా తర్వాత కాస్త విరామం తీసుకున్న ఆయన.. ఇప్పుడు విక్టరీ వెంకటేష్ హీరోగా 'ఆదర్శ కుటుంబం' చిత్రంతో ప్రేక్షకుల ముందుకు రాబోతున్నారు. 

ఈ సినిమాలో విక్టరీ వెంకటేశ్ సరసన శ్రీనిధి శెట్టి జంటగా నటించిన ఈ భావోద్వేగ కుటుంబ కథా చిత్రం ఇదివరకే విడుదల కావాల్సి ఉన్నప్పటికీ సాంకేతిక కారణాలతో పలుమార్లు వాయిదా పడింది. ఎట్టకేలకు అక్టోబర్ 30న థియేటర్లలో సందడి చేసేందుకు చిత్ర బృందం అన్ని ఏర్పాట్లు పూర్తి చేసింది.

ప్రీ రిలీజ్ వేడుకలో ఊహించని సన్నివేశం..
సినిమా విడుదల తేదీ దగ్గరపడటంతో హైదరాబాద్‌లోని శిల్పకళా వేదికలో చిత్ర యూనిట్ ప్రీ రిలీజ్ వేడుకను తాజాగా ఘనంగా నిర్వహించింది. ఈ వేడుకకు దర్శకుడు త్రివిక్రమ్‌తో పాటు నటీనటులు అందరూ హాజరయ్యారు. ఈ కార్యక్రమం జరుగుతున్న సమయంలో ఒక ఆసక్తికర ఘట్టం చోటుచేసుకుంది.

హీరోయిన్ శ్రీనిధి శెట్టి త్రివిక్రమ్ కూర్చున్న స్థలానికి వచ్చి ఆప్యాయంగా షేక్ హ్యాండ్ ఇచ్చి పలకరించారు. అనంతరం ఆయన కాళ్లకు నమస్కరించి ఆశీర్వాదం తీసుకోవడానికి ప్రయత్నించారు. అయితే, అందరినీ ఆశ్చర్యపరుస్తూ త్రివిక్రమ్ సైతం ఆమెను గౌరవిస్తూ సరదాగా శ్రీనిధి కాళ్లు మొక్కేందుకు కిందికి వంగారు.

నెట్టింట వైరల్ అవుతున్న వీడియో..
స్టార్ డైరెక్టర్ హోదాలో ఉన్న త్రివిక్రమ్ సడన్‌గా అలా చేసేసరికి హీరోయిన్ శ్రీనిధి శెట్టి ఒక్కసారిగా షాక్‌కు గురయ్యారు. వెంటనే తేరుకుని ఆయన్ని వారిస్తూ, వెనువెంటనే త్రివిక్రమ్ కాళ్లకు నమస్కరించారు. ఈ అనూహ్య పరిణామానికి శిల్పకళా వేదికలో ఉన్నవారందరూ ఎంతో నవ్వుకున్నారు.

ప్రస్తుతం ఇందుకు సంబంధించిన వీడియో క్లిప్ సోషల్ మీడియాలో విపరీతంగా వైరల్ అవుతోంది. ఈ వీడియోను చూసిన నెటిజన్లు "టాలీవుడ్‌లో ఇంత సరదాగా, వినయంగా ఉండే దర్శకుడు త్రివిక్రమ్ ఒక్కరే" అంటూ రకరకాల ఆసక్తికర కామెంట్లు పెడుతున్నారు.