దేవుడి పేరుతో ఘోరం.. ఉపవాసాలంటూ 190 మంది చిన్నారుల ప్రాణాలు తీసిన మత గురువు..!!

Forced Fasting Deaths Kenya: మతం ముసుగులో కన్నబిడ్డల ప్రాణాలను పొట్టనబెట్టుకున్న దారుణ ఉదంతంలో కెన్యా న్యాయస్థానం చారిత్రాత్మక తీర్పు వెలువరించింది. దైవ సాక్షాత్కారం పేరుతో అమాయక ప్రజలను, పసిపిల్లలను కడతేర్చిన మత గురువు రాక్షసకాండపై మొంబాసా హైకోర్టు ఉక్కుపాదం మోపింది.  గుడ్ న్యూస్ ఇంటర్నేషనల్ చర్చి పేరుతో చెలామణి అయిన పాల్ మెకెన్సీతో పాటు మరో 28 మంది ఈ దారుణ నరమేధానికి పూర్తి బాధ్యులని కోర్టు స్పష్టం చేసింది. షాకాహోలా అడవిలో జరిగిన మొత్తం 191 మంది హత్యలకు ఈ బృందమే కారణమని ప్రాసిక్యూషన్ పక్కా సాక్ష్యాలతో నిరూపించింది. ఈ ఘోరమైన మారణహోమంలో ప్రాణాలు కోల్పోయినవారిలో దాదాపు 190 మంది చిన్నారులు ఉండటం మానవత్వాన్నే నిలువునా కుదిపేసింది. ఈ కేసుకు సంబంధించి దోషులకు నవంబర్ 6న శిక్ష ఖరారు కానుంది.

ఈ మారణకాండ వెనుక నిందితుడు పక్కా వ్యూహం రచించాడు. బాహ్య ప్రపంచం పూర్తిగా పాపభూయిష్టమైపోయిందని, అడవి మధ్యలో మాత్రమే నిజమైన మోక్షం ప్రాప్తిస్తుందని అమాయకులను నమ్మించాడు. అలా నమ్మిన వందలాది మందిని తన ఆధీనంలోని 800 ఎకరాల సువిశాల భూభాగానికి రప్పించుకున్నాడు. ఆ తర్వాత అక్కడే ఒక నిర్బంధ వాతావరణాన్ని సృష్టించి మరణ శాసనాన్ని అమలు చేయడం మొదలుపెట్టాడు. ముందుగా పసిపిల్లలు, ఆ తర్వాత టీనేజర్లు, మహిళలు, చివరగా పురుషులు ఇలా ఒక పద్ధతి ప్రకారం ఎవరూ తిండి తినకుండా కఠినమైన ఉపవాస దీక్షలు చేయాలని హుకుం జారీచేశాడు. తిండిలేక అలమటించే పసికందులను కనీసం కరుణించకుండా చిత్రహింసలకు గురిచేశాడు. ఒకవేళ ఆకలి తట్టుకోలేక ఎవరైనా రహస్యంగా ఆహారం తీసుకునేందుకు యత్నిస్తే వారిని దారుణంగా శిక్షించి ప్రాణాలు తీశాడు.

ఈ ఘటన వెలుగులోకి వచ్చి పోలీసులు దర్యాప్తు చేపట్టిన సమయంలో వెల్లడైన పోస్టుమార్టం నివేదికలు మరింత భీతావహ నిజాలను బయటపెట్టాయి. బాధితులు కేవలం ఆకలి చావులకే బలవ్వలేదని, కొందరికి ఊపిరి ఆడకుండా చేసి ఊపిరితిత్తులు ఆగిపోయేలా చేశారని, మరికొందరి మెడలపై తీవ్రమైన ఒత్తిడి తెచ్చి, తలపై బలమైన గాయాలు చేసి అతి క్రూరంగా హత్య చేశారని తేలింది. 2023 ఏప్రిల్‌లో ఈ ఉదంతం వెలుగులోకి వచ్చిన తరుణంలో.. అడవిలోని వేర్వేరు ప్రాంతాల్లో ఉన్న సామూహిక సమాధుల నుంచి ఏకంగా 429 శవాలను పోలీసులు వెలికితీశారు. కేవలం ఏడు నుంచి పదేళ్ల లోపు వయసున్న చిన్నారులు సైతం మత పిచ్చికి బలైపోవడం యావత్ ప్రపంచాన్ని దిగ్భ్రాంతికి గురిచేసింది.

కోర్టు వెలువరించిన ఈ తీర్పు బాధితుల కుటుంబాలకు కొంతమేర న్యాయం జరిగేలా చేసినా, వారు కోల్పోయిన కుటుంబసభ్యుల ప్రాణాలను మాత్రం వెనక్కి తీసుకురాలేదు. మత విశ్వాసాలను, భక్తిని అడ్డం పెట్టుకుని అమాయకుల ప్రాణాలతో చెలగాటమాడే మోసగాళ్లకు ఈ తీర్పు ఒక కఠినమైన హెచ్చరికగా నిలుస్తుందని చెప్పవచ్చు. విజ్ఞాన శాస్త్రం ఎంత అభివృద్ధి చెందుతున్నప్పటికీ, మూఢనమ్మకాలు ఏ స్థాయిలో ప్రాణాలను హరిస్తాయనేదానికి షాకాహోలా అడవిలో జరిగిన ఈ దుర్ఘటన మానవ చరిత్రలోనే అత్యంత చీకటి అధ్యాయంగా మిగిలిపోయింది.