DA Hike July: ప్రభుత్వ ఉద్యోగులకు భారీ గుడ్‌న్యూస్..జీతాలు భారీగా పెంపు, రూ.21,000 బోనస్!

DA Hike July 2026: కేంద్ర ప్రభుత్వ ఉద్యోగులు, పెన్షనర్లు ఎంతో ఆసక్తిగా ఎదురుచూస్తున్న జూలై 2026 నాటి కరువు భత్యం (DA), కరువు ఉపశమన భత్యం (DR) సవరణపై కీలక పరిణామాలు చోటుచేసుకుంటున్నాయి. జూలై 1, 2026 నుంచి అమల్లోకి రావాల్సిన ఈ సవరణను ఏమాత్రం ఆలస్యం చేయకుండా త్వరగా ప్రకటించాలని 'కాన్ఫెడరేషన్ ఆఫ్ సెంట్రల్ గవర్నమెంట్ ఎంప్లాయీస్ అండ్ వర్కర్స్' సంఘం కేంద్ర ఆర్థిక మంత్రిత్వ శాఖ పరిధిలోని వ్యయ విభాగానికి సెప్టెంబర్ 24, 2026న విజ్ఞప్తి లేఖ రాసింది.

అందుబాటులో ఉన్న ఏఐసీపీఐ-ఐడబ్ల్యూ (AICPI-IW) గణాంకాల ఆధారంగా కరువు భత్యం ప్రస్తుతం ఉన్న 60 శాతం నుంచి 64 శాతానికి పెరిగే అవకాశం ఉందని అంచనా వేస్తున్నారు. అంతకుముందు జనవరి 2026 కాలానికి ప్రభుత్వం DAను 2 శాతం పెంచి 58 శాతం నుంచి 60 శాతానికి చేర్చిన నిర్ణయాన్ని ఏప్రిల్ 18, 2026న వెలువరించింది.

ఈ సవరణ డిమాండ్ వెనుక ముందస్తుగా అదనపు లభ్ది పొందే ఉద్దేశం ఏదీ లేదని ఉద్యోగ ప్రతినిధులు స్పష్టం చేశారు. నిత్యావసర వస్తువుల ధరలు, విద్య, వైద్యం, ప్రయాణం, పిల్లల అవసరాలు, ఇంటి నిర్వహణ ఖర్చులు వేగంగా పెరుగుతున్నందున అమలు తేదీ నుంచే పెరిగిన జీతాలు, పెన్షన్లు అందేలా అధికారిక ప్రక్రియను త్వరగా పూర్తి చేయాలని కోరుతున్నారు.

మరోవైపు, రాబోయే దసరా పండుగను పురస్కరించుకుని కేంద్ర ప్రభుత్వ ఉద్యోగులకు రూ. 21,000 వరకు సవరించిన బోనస్ చెల్లించాలని 'స్టాఫ్ సైడ్ నేషనల్ కౌన్సిల్ - జాయింట్ కన్సల్టేటివ్ మెషినరీ' (NC-JCM) ప్రభుత్వాన్ని అభ్యర్థించింది.

ఆల్ ఇండియా ఎన్‌పీఎస్ ఎంప్లాయీస్ ఫెడరేషన్ అధ్యక్షుడు మంజీత్ సింగ్ పటేల్ మాట్లాడుతూ, ప్రభుత్వం సాధారణంగా సెప్టెంబర్ చివరి నాటికి జూలై DA సవరణ వివరాలు వెల్లడిస్తుందని తెలిపారు. ఒకవేళ ప్రభుత్వం త్వరితగతిన ఈ ప్రకటన చేస్తే, జూలై నుంచి రావాల్సిన బకాయిలతో (Arrears) కలిపి అక్టోబర్ నెల జీతంలోనే పెరిగిన భత్యం జమ అయ్యే అవకాశం ఉందన్నారు.

దసరా, దీపావళి పండుగల వేళ జీతాలు, భత్యాల పెంపు నిర్ణయం ఉద్యోగుల నెలవారీ ఆదాయంపై నేరుగా సానుకూల ప్రభావం చూపుతుందని పేర్కొన్నారు. అయితే, 64 శాతం DA పెంపు అనేది ప్రస్తుతం ఉన్న ఒక అంచనా మాత్రమేనని, తుది సవరణ శాతం, అమల్లోకి వచ్చే తేదీలపై కేంద్ర ప్రభుత్వం నుంచి అధికారిక ఉత్తర్వులు వెలువడాల్సి ఉంది.