NBCC Avenue Towers Auction: రూ.15 కోట్ల విలువైన లగ్జరీ ఫ్లాట్ల వేలంలో ట్విస్ట్.. 49 బిడ్లు రద్దు.. NBCCకి హైకోర్టు నోటీసులు!

NBCC Avenue Towers Auction Controversy: దేశ రాజధాని ఢిల్లీలో అత్యంత ఖరీదైన నివాస ప్రాజెక్టుల్లో ఒకటైన NBCC అవెన్యూ టవర్స్ ఇప్పుడు వివాదంతో వార్తల్లో నిలిచింది. సరోజినీ నగర్‌లో నిర్మిస్తున్న ఈ ప్రాజెక్టులో లగ్జరీ ఫ్లాట్ల కొనుగోలుకు నిర్వహించిన వేలంలో అత్యధిక ధరకు బిడ్లు వేసిన కొందరు కొనుగోలుదారులకు అనూహ్య పరిణామం ఎదురైంది. విజేతలుగా ప్రకటించినప్పటికీ వారి బిడ్లను రద్దు చేయడంపై వివాదం చెలరేగింది. ఈ వ్యవహారంపై ఢిల్లీ హైకోర్టు స్పందిస్తూ NBCC నుంచి వివరణ కోరింది.

49 బిడ్ల రద్దుతో మొదలైన వివాదం
నేషనల్ బిల్డింగ్స్ కన్స్ట్రక్షన్ కార్పొరేషన్ (NBCC) తన అవెన్యూ టవర్స్ ప్రాజెక్టులోని 262 నివాస యూనిట్లను విక్రయించేందుకు వేలం ప్రక్రియ చేపట్టింది. అయితే ఈ ప్రక్రియలో పలుమార్లు మార్పులు చోటుచేసుకున్నాయి. మొదట ఆగస్టు 19న జరగాల్సిన వేలం పరిపాలనా కారణాలతో రద్దయింది. అనంతరం అక్టోబర్ 3న మళ్లీ బిడ్లను ఆహ్వానించిన సంస్థ, ఎంపిక చేసిన 49 బిడ్లను తిరస్కరించడంతో కొనుగోలుదారులు అభ్యంతరాలు వ్యక్తం చేశారు.

అత్యధిక ధరకు బిడ్లు వేసి విజయం సాధించినట్లు ప్రకటించిన తర్వాత వాటిని రద్దు చేయడానికి కారణమేంటని బాధితులు ప్రశ్నిస్తున్నారు. ఈ నిర్ణయంపై కొందరు కొనుగోలుదారులు న్యాయస్థానాన్ని ఆశ్రయించారు.

NBCCకి ఢిల్లీ హైకోర్టు నోటీసులు
కొనుగోలుదారుల పిటిషన్లను పరిశీలించిన ఢిల్లీ హైకోర్టు NBCCకి నోటీసులు జారీ చేసింది. రెండు వారాల్లోగా తమ స్పందనను తెలియజేయాలని ఆదేశించింది. కేసు తదుపరి విచారణ జనవరి 12న జరగనుంది. బిడ్ల రద్దుకు సంబంధించిన వివరణను సంస్థ కోర్టుకు సమర్పించాల్సి ఉంది.

అవెన్యూ టవర్స్‌లో ప్రత్యేకతలేమిటి?
సరోజినీ నగర్‌లో సుమారు 8.89 ఎకరాల్లో విస్తరించిన ఈ ప్రాజెక్టులో 262 నివాస యూనిట్లు ఉన్నాయి. ఇందులోని అపార్ట్‌మెంట్లు 4-BHK విభాగానికి చెందినవి. ఒక్కో ఫ్లాట్ ధర రూ.15 కోట్లకు పైగా ఉండగా, కార్పెట్ ఏరియా 2,518 నుంచి 2,598 చదరపు అడుగుల వరకు ఉంటుంది. అత్యాధునిక సదుపాయాలతో నిర్మిస్తున్న ఈ ప్రాజెక్టులో సుమారు 50,000 చదరపు అడుగుల క్లబ్‌హౌస్, మూడు కవర్డ్ కార్ పార్కింగ్ స్థలాలు వంటి సౌకర్యాలు ఉన్నాయి.

అత్యధిక బిడ్లు వేసిన కొనుగోలుదారుల బిడ్లను ఎందుకు తిరస్కరించారనే అంశం ఇప్పుడు కీలకంగా మారింది. వేలం ప్రక్రియలో పారదర్శకత పాటించారా? పరిపాలనా కారణాల పేరుతో బిడ్లను రద్దు చేయడానికి సరైన ఆధారాలున్నాయా? అనే ప్రశ్నలకు NBCC సమాధానం ఇవ్వాల్సి ఉంది. తదుపరి కోర్టు విచారణలో ఈ వివాదంపై మరింత స్పష్టత వచ్చే అవకాశం ఉంది.