Sabarimala Ghee Scam Arrest: శబరిమల ఆలయంలో నెయ్యి స్కామ్..రూ.2.27 కోట్ల మేర నష్టం..ఆలయ ఉద్యోగి అరెస్ట్!

Sabarimala Ghee Scam Case Arrest: కేరళంలోని ప్రసిద్ధ శబరిమల అయ్యప్ప స్వామి దేవాలయంలో మిల్మా అనే బ్రాండ్ నెయ్యి సరఫరా వ్యవహారంలో జరిగిన భారీ అక్రమాలు తీవ్ర కలకలం సృష్టిస్తున్నాయి. గతేడాది మండల - మకరవిళక్కు పూజల సీజన్‌లో శబరిమల సన్నిధానానికి అందజేయాల్సిన మిల్మా నెయ్యిని అక్రమంగా బయటి సంస్థలకు విక్రయించినట్లు విజిలెన్స్ అధికారుల దర్యాప్తులో వెల్లడైంది. ముఖ్యంగా తమిళనాడులోని శ్రీ వెంకటేశ్వర ట్రేడర్స్, లియో ట్రేడర్స్ అనే వ్యాపార సంస్థలకు ఈ నెయ్యిని మళ్లించినట్లు దర్యాప్తు బృందం గుర్తించింది.

రికార్డుల్లో మాత్రం మిల్మా నుంచే నాణ్యమైన నెయ్యి కొనుగోలు చేసినట్లు చూపుతూ, క్షేత్రస్థాయిలో నాణ్యత లేని నెయ్యిని ఆలయానికి సరఫరా చేశారని ఆరోపణలు వచ్చాయి. ఈ కేసులో ఇదివరకే అరెస్టయిన ట్రాన్స్‌పోర్ట్ కాంట్రాక్టర్ ఎస్‌ఎస్ బినును విజిలెన్స్ అధికారులు లోతుగా విచారించారు. నెయ్యి రవాణా, సరఫరా పేరుతో బిను లక్షలాది రూపాయల అక్రమార్జనకు పాల్పడినట్లు అభియోగాలు ఎదుర్కొంటున్నారు.

ఆయన ఇచ్చిన కీలక వాంగ్మూలాన్ని ఆధారంగా చేసుకుని, నెయ్యి స్టోర్ సూపరింటెండెంట్ కార్యాలయ ఉద్యోగి జయలాల్‌ను విజిలెన్స్ అధికారులు అదుపులోకి తీసుకున్నారు. మిల్మా నెయ్యి సరఫరా జరిగినట్లు తప్పుడు పత్రాలను సృష్టించి సొమ్ము చేసుకున్నారనే వ్యవహారంలో జయలాల్ ప్రమేయం ఉన్నట్లు దర్యాప్తులో తేలింది.

శబరిమల దేవస్వం బోర్డు లెక్కల ప్రకారం మిల్మా నుంచి దాదాపు 1.65 లక్షల లీటర్ల నెయ్యి కొనుగోలు చేసినట్లు సమాచారం అందుతోంది. ఒక లీటరు నెయ్యికి రూ.369 చొప్పున ధరను కోట్ చేసినప్పటికీ, కొనుగోలు వ్యయం కింద లీటరుకు రూ.510 చొప్పున చెల్లించినట్లు రికార్డుల్లో పేర్కొన్నారు. ఈ వ్యత్యాసాల వల్ల కేరళ దేవస్వం బోర్డుకు రూ.2.27 కోట్ల భారీ ఆర్థిక నష్టం వాటిల్లిందని విజిలెన్స్ విభాగం తెలిపింది.

ఈ కుంభకోణానికి సంబంధించి తమిళనాడులోని సంబంధిత సంస్థల వద్ద నుంచి మరిన్ని ఆధారాలు సేకరించేందుకు విజిలెన్స్ బృందాలు సిద్ధమయ్యాయి. దేవస్వం బోర్డులో ఉన్న మరికొందరు అధికారుల ప్రమేయంపై కూడా విచారణ కొనసాగుతోంది. శబరిమల వంటి పవిత్రమైన పుణ్యక్షేత్రంలోనే ఇటువంటి ఆర్థిక అవకతవకలు జరగడం పట్ల తీవ్ర కలకలం రేగగా, రాబోయే రోజుల్లో మరిన్ని అరెస్టులు జరిగే అవకాశముందని అధికారులు తెలిపారు.