Diwali Bonus 2026: ఈ రాష్ట్ర ప్రభుత్వ ఉద్యోగులకు గుడ్‌న్యూస్.. 30 రోజుల దీపావళి బోనస్‌కు ఆమోదం

Government Employees Diwali Bonus: దీపావళి పండుగకు ముందు ప్రభుత్వ ఉద్యోగులకు యోగి సర్కార్ గుడ్‌న్యూస్ చెప్పింది. 2025-26 ఆర్థిక సంవత్సరానికి సంబంధించి అర్హులైన ఉద్యోగులకు 30 రోజుల వేతనానికి సమానమైన బోనస్ చెల్లించేందుకు గ్రీన్ సిగ్నల్ ఇచ్చింది. నాన్ గెజిటెడ్ ప్రభుత్వ ఉద్యోగులతోపాటు విద్యా సంస్థలు, స్థానిక సంస్థలు, జిల్లా పంచాయతీల అర్హులైన ఉద్యోగులకు కూడా ఈ బోనస్ అందించనుంది. ఈ మేరకు ప్రభుత్వం ఉత్తర్వులు జారీ చేసింది. రోజువారీ వేతనంపై పనిచేసే ఉద్యోగులకు సైతం బోనస్ ఇవ్వాలని ఉత్తర్వుల్లో పేర్కొంది. ఈ కేటగిరీ ఉద్యోగులకు గరిష్ఠంగా రూ.1,184 వరకు బోనస్ లభించనుంది.

బోనస్ చెల్లింపునకు సంబంధించి ప్రభుత్వం ప్రత్యేక విధానాన్ని ఖరారు చేసింది. మొత్తం బోనస్‌లో 25 శాతం మొత్తాన్ని ఉద్యోగులకు నగదు రూపంలో చెల్లించనుంది. మిగిలిన 75 శాతం డబ్బును వారి పీఎఫ్‌ అకౌంట్‌లో జమ చేయనుంది. అయితే ఇప్పటికే పదవీ విరమణ చేసినవారికి.. త్వరలో రిటైర్ కానున్న ఉద్యోగులకు మాత్రం పూర్తి బోనస్ మొత్తాన్ని నగదు రూపంలోనే అందించనున్నారు. దీంతో అర్హులైన ఉద్యోగులకు పండుగ సమయంలో అదనపు ఆర్థిక ప్రయోజనం కలగనుంది.

మరోవైపు ధన్‌తేరస్, దీపావళి వేడుకల సందర్భంగా స్థానిక ఉత్పత్తులను ప్రోత్సహించాలని సీఎం యోగి ఆదిత్యనాథ్ ప్రజలకు పిలుపునిచ్చారు. ప్రధాని నరేంద్ర మోదీ ప్రకటించిన 'వోకల్ ఫర్ లోకల్' నినాదాన్ని ముందుకు తీసుకెళ్లాలని సూచించారు. బహుమతుల కొనుగోలు సమయంలో వన్ డిస్ట్రిక్ట్ వన్ ప్రొడక్ట్ ఉత్పత్తులకు ప్రాధాన్యం ఇవ్వాలని కోరారు. దీనివల్ల స్థానిక కళాకారులు, చేతివృత్తుల వారికి ఉపాధి, ఆదాయం పెరుగుతాయని పేర్కొన్నారు.

"ప్రధాని నరేంద్ర మోదీ 'వోకల్ ఫర్ లోకల్' దార్శనికతను స్వీకరిస్తూ.. ఈ ధంతేరస్ సందర్భంగా దయచేసి ఓడీఓపీ వస్తువులను గిఫ్ట్స్‌గా ఇవ్వండి. మీరు చేసే ఒక్క కొనుగోలు.. ఒక నైపుణ్యం గల కుటుంబంలో సరికొత్త వెలుగుని తీసుకువస్తుంది. మనమందరం 'లోకల్ దీపావళి'ని జరుపుకుందాం.. 'ఆత్మనిర్భర్' ఉత్తర ప్రదేశ్ నిర్మాణానికి మన వంతు సహకారం అందిద్దాం.." యోగి పిలుపునిచ్చారు.