Oats Chapati: సాధారణ చపాతీకి బదులుగా ఓట్స్ చపాతీ.. బరువు తగ్గాలనుకునే వారు ఎలా చేసుకోవాలంటే!

ఓట్స్ చపాతీ

సాధారణంగా ఒక మధ్యస్థ పరిమాణంలో ఉండే గోధుమ చపాతీలో సుమారు 100 కేలరీలు ఉండవచ్చు. చపాతీ పరిమాణం, ఉపయోగించే పిండి, నూనె లేదా నెయ్యి పరిమాణాన్ని బట్టి కేలరీలు మారుతాయి. ఒకేసారి రెండు లేదా మూడు చపాతీలు తింటే వాటి నుంచి 200 నుంచి 300 కేలరీలు అందవచ్చు. వీటితోపాటు తినే కూరలు, పప్పు వంటి ఆహారాల కేలరీలు అదనంగా ఉంటాయి.

ఓట్స్ రోటీ ప్రయోజనాలు

అందుకే బరువు తగ్గాలనుకునేవారు ఆహార పరిమాణాన్ని గమనించడం ముఖ్యం. అయితే గోధుమ చపాతీలను పూర్తిగా మానేయాల్సిన అవసరం లేదు. ఆహారంలో వైవిధ్యం కోసం ఓట్స్ చపాతీలను కూడా తీసుకోవచ్చు.

ఓట్స్ చపాతీతో ఎన్ని ప్రయోజనాలు?

ఓట్స్‌లో ఫైబర్ ఉంటుంది. ఇది కడుపు నిండిన భావన కలిగించడంలో, జీర్ణక్రియకు సహాయపడటంలో ఉపయోగపడుతుంది. ఓట్స్ చపాతీలో కేలరీలు ఎంత ఉంటాయనేది దాని పరిమాణం, తయారీ విధానంపై ఆధారపడి ఉంటుంది. సాధారణంగా చిన్న ఓట్స్ చపాతీలో సుమారు 60 కేలరీలు, పెద్ద చపాతీలో 80 కేలరీల వరకు ఉండవచ్చు. అయితే ఇవి అంచనా మాత్రమే. ఓట్స్ చపాతీ తిన్నంత మాత్రాన బరువు తగ్గిపోరు. రోజువారీ ఆహారంలో కేలరీల నియంత్రణ, వ్యాయామం, సరైన నిద్ర కూడా అవసరం.

ఓట్స్ చపాతీని ఇంట్లోనే ఎలా తయారు చేయాలి?

ఓట్స్ చపాతీ తయారీకి ఒక కప్పు ఓట్స్, ఒక కప్పు నీరు, కొద్దిగా ఉప్పు, అర టీస్పూన్ నెయ్యి అవసరం. ముందుగా ఓట్స్‌ను మిక్సీలో వేసి మెత్తని పిండిలా చేసుకోవాలి. ఒక పాత్రలో నీటిని మరిగించి అందులో ఉప్పు, నెయ్యి వేయాలి. ఆ తర్వాత ఓట్స్ పిండిని కొద్దికొద్దిగా కలుపుతూ వేయాలి. రెండు నిమిషాలు కలుపుతూ ఉడికించాలి. మిశ్రమం కొద్దిగా చల్లారిన తర్వాత చేతులతో మెత్తగా పిసికి పిండిలా చేసుకోవాలి. ఈ పిండితో సాధారణ చపాతీల మాదిరిగా తయారు చేసుకోవచ్చు.

బరువు తగ్గడానికి డైట్

వీటిని కూరలు లేదా పప్పుతో కలిపి తినవచ్చు. బరువు తగ్గాలనుకునేవారు తమ ఆహారంలో ఓట్స్ చపాతీలను చేర్చుకోవచ్చు. అయితే సమతుల్య ఆహారం తీసుకోవడం, సరైన పరిమాణంలో తినడం అత్యంత ముఖ్యం.