- జీ తెలుగు న్యూస్
- /ఫోటోలు
- /Architectural Wonders: సైన్స్‌కు సవాల్ విసిరేలా 7 అద్భుత కట్టడాలు.. మూడోది చూస్తే ఆశ్చర్యపోవాల్సిందే..!
Architectural Wonders: సైన్స్‌కు సవాల్ విసిరేలా 7 అద్భుత కట్టడాలు.. మూడోది చూస్తే ఆశ్చర్యపోవాల్సిందే..!
Written ByAshok Krindinti
Published: Nov 11, 2026, 05:00 PM IST|Updated: Nov 11, 2026, 05:05 PM IST
Indias Architectural Wonders: మన దేశ చరిత్రలో ఎన్నో అద్భుతమైన నిర్మాణాలు ఉన్నాయి. వందల ఏళ్ల క్రితమే అప్పటి శిల్పులు, ఇంజినీర్లు తమ అసాధారణ ప్రతిభతో నిర్మించిన కట్టడాలు ఇప్పటికీ అందరినీ ఆశ్చర్యపరుస్తున్నాయి. ఎలాంటి ఆధునిక యంత్రాలు, సాంకేతిక పరిజ్ఞానం అందుబాటులో లేని రోజుల్లోనే అద్భుతమైన నిర్మాణ నైపుణ్యాన్ని ప్రదర్శించారు. ఒకే రాతితో ఆలయాన్ని చెక్కడం నుంచి.. రాళ్లతో సంగీత స్వరాలు పలికించడం వరకు ఎన్నో ప్రత్యేకతలు ఈ కట్టడాల్లో కనిపిస్తాయి. కొన్ని నిర్మాణాల వెనుక ఉన్న ఇంజినీరింగ్ పరిజ్ఞానం ఇప్పటికీ ఆసక్తిని కలిగిస్తోంది. మరి అబ్బురపరిచే ఆ ఏడు అద్భుత కట్టడాలు ఎక్కడ ఉన్నాయి..? వాటి ప్రత్యేకతలు ఏమిటో ఇక్కడ తెలుసుకుందాం..
1/8మహారాష్ట్రలోని కైలాస ఆలయం
మహారాష్ట్రలోని కైలాస ఆలయం ఒకే కొండరాయిని తొలిచి ఆలయాన్ని నిర్మించడమంటే మాటలు కాదు.. మహారాష్ట్రలోని ఎల్లోరా గుహల్లో ఉన్న కైలాస ఆలయం అలాంటి అద్భుతమే. సుమారు 8వ శతాబ్దంలో నిర్మించిన ఈ ఆలయాన్ని పైభాగం నుంచి కిందికి రాయిని తొలగిస్తూ రూపొందించారు. ఆలయ ప్రాంగణం, స్తంభాలు, శిల్పాలు అన్నీ ఒకే భారీ రాతి నిర్మాణంలో భాగంగా ఉండటం ఈ ఆలయం ప్రత్యేకత.
2/8లేపాక్షి ఆలయం
లేపాక్షి ఆలయం అనంతపురం జిల్లాలోని లేపాక్షి వీరభద్ర ఆలయం పేరు చెప్పగానే గుర్తొచ్చేది వేలాడే స్తంభం. 16వ శతాబ్దానికి చెందిన ఈ ఆలయంలోని ఒక స్తంభం నేలను పూర్తిగా తాకకుండా ఉన్నట్లు కనిపిస్తుంది. దాని అడుగు భాగం కింద నుంచి పలుచని వస్త్రాన్ని కూడా దూర్చవచ్చు. అయితే ఈ స్తంభం పైకప్పు నిర్మాణంతో అనుసంధానమై ఉండటమే దాని ప్రత్యేక నిర్మాణ రహస్యం.
3/8విఠల ఆలయం
విఠల ఆలయం రాళ్లతో సంగీతం పలికించడం సాధ్యమేనా..? హంపీలోని విఠల ఆలయంలోకి వెళ్తే ఈ ప్రశ్నకు సమాధానం దొరుకుతుంది. ఇక్కడ ఉన్న 56 సంగీత స్తంభాలు ప్రత్యేక ఆకర్షణ. వీటికి అనుసంధానంగా ఉన్న చిన్న రాతి స్తంభాల నుంచి వేర్వేరు శబ్దాలు వెలువడతాయి. వాటి ఆకృతి, కంపనాల వల్ల ఈ స్వరాలు ఎలా ఏర్పడుతున్నాయనే అంశంపై పరిశోధనలు కూడా జరిగాయి. చారిత్రక సంపదకు నష్టం కలగకుండా సందర్శకులు వాటిని తాకడం లేదా కొట్టడం చేయకూడదు.
4/8కోణార్క్ సూర్య దేవాలయం
కోణార్క్ సూర్య దేవాలయం సుమారు 700 ఏళ్ల క్రితమే సూర్యుడి కదలికలను ఆధారంగా చేసుకుని సమయాన్ని అంచనా వేసే అద్భుత నిర్మాణాన్ని కోణార్క్‌లో రూపొందించారు. 13వ శతాబ్దంలో నిర్మించిన కోణార్క్ సూర్య దేవాలయం భారీ రాతి రథం ఆకృతిలో ఉంటుంది. ఇందులో మొత్తం 24 చక్రాలు ఉన్నాయి. వాటి ఆకులు, వాటిపై పడే సూర్యకాంతి నీడను పరిశీలించడం ద్వారా సమయాన్ని అంచనా వేయవచ్చు. అప్పటి శిల్పుల ఖగోళ పరిజ్ఞానానికి ఇది నిదర్శనం.
5/8రామప్ప ఆలయం
రామప్ప ఆలయం దాదాపు 800 ఏళ్ల క్రితం నిర్మించిన రామప్ప ఆలయంలో తేలికపాటి ఇటుకలను ఉపయోగించడం విశేషం. సాధారణ ఇటుకలతో పోలిస్తే ఇవి చాలా తక్కువ బరువు కలిగి ఉండటంతో వీటిని 'తేలియాడే ఇటుకలు' అని పిలుస్తారు. ఆలయ గోపురం బరువును తగ్గించేందుకు వీటిని వినియోగించారు. ఈ ఆలయ నిర్మాణం 1213లో ప్రారంభమైంది. ఈ ఆలయానికి ఇసుక ఆధారిత పునాది కూడా ప్రత్యేక ఆకర్షణ. భూకంపాల ప్రభావాన్ని తట్టుకునేలా ఈ నిర్మాణాన్ని రూపొందించారు.
6/8రాణి కీ వావ్
రాణి కీ వావ్ భూమి అడుగున ఇలాంటి ఓ అద్భుతమైన నిర్మాణం ఉంటుందని ఊహించడం కూడా కష్టమే. గుజరాత్‌లోని పటాన్ ప్రాంతంలో ఉన్న రాణి కీ వావ్ 11వ శతాబ్దానికి చెందిన మెట్ల బావి గురించి తెలిస్తే ఆశ్చర్యపోవాల్సిందే. ఏడు అంతస్తుల తరహాలో నిర్మించిన ఈ కట్టడంలో 500కు పైగా ప్రధాన శిల్పాలు ఉన్నాయి. నీటి అవసరాల కోసం నిర్మించిన ఈ బావిని సాధారణంగా కాకుండా ఆలయాన్ని తలపించేలా అద్భుతమైన శిల్పకళతో తీర్చిదిద్దారు.
7/8బృహదీశ్వర ఆలయం
బృహదీశ్వర ఆలయం వెయ్యి సంవత్సరాల క్రితమే ఇంత భారీ ఆలయాన్ని నిర్మించారంటే అప్పటి ఇంజినీరింగ్ ప్రతిభ ఏ స్థాయిలో ఉందో అర్థం చేసుకోవచ్చు. తంజావూరులోని బృహదీశ్వర ఆలయాన్ని రాజరాజ చోళుడు పాలించిన కాలంలో.. సుమారు 1010వ సంవత్సరంలో పూర్తి చేశారు. దాదాపు 60 మీటర్ల ఎత్తుతో, 13 అంచెలుగా పైకి ఎదిగిన ఈ ఆలయం అద్భుతమైన రాతి నిర్మాణానికి నిదర్శనం. ఈ ఆలయానికి నీడ పడదనే ప్రచారం ఉన్నప్పటికీ అది నిజం కాదు. సూర్యకాంతి పడినప్పుడు ఇతర కట్టడాల మాదిరిగానే దీనికీ నీడ ఏర్పడుతుంది.
8/8Historical Monuments of India
ఈ ఏడు కట్టడాలను చూస్తే మన పూర్వీకుల నిర్మాణ నైపుణ్యం ఎంత గొప్పదో అర్థమవుతుంది. రాళ్ల స్వభావం, గణిత శాస్త్రం, భౌతిక సూత్రాలు, ప్రకృతి పరిస్థితులను అర్థం చేసుకుని అప్పటి శిల్పులు అద్భుతమైన పరిష్కారాలను కనుగొన్నారు. అందుకే వందల ఏళ్లు గడిచినా ఈ చారిత్రక కట్టడాలు చెక్కు చెదరకుండా నిలిచి ప్రపంచవ్యాప్తంగా పర్యాటకులను ఆకర్షిస్తున్నాయి.ట్రెండింగ్
- వార్తలు
- ఫోటోలు
- వీడియోలు
)