Gymnastics Coach Sentenced: కోచింగ్‌కి వచ్చిన యువతుల అశ్లీల దృశ్యాలు రికార్డు..జిమ్నాస్టిక్స్ కోచ్‌కు 90 ఏళ్ల జైలుశిక్ష!

America Gymnastics Coach Sentenced: అమెరికా క్రీడారంగంలో ఎంతో పేరుపొందిన 39 ఏళ్ల మాజీ జిమ్నాస్టిక్స్ కోచ్ సీన్ గార్డనర్‌కు జైలు శిక్ష పడింది. ముగ్గురు జిమ్నాస్టిక్ బాలికల అశ్లీల చిత్రాలను చిత్రీకరించిన ఆరోపణల నేపథ్యంలో ఫెడరల్ కోర్టు సాధ్యమైనంత గరిష్ట శిక్షను ఖరారు చేసింది. అయితే కోచ్ గార్డనర్ తన నేరాన్ని అంగీకరించాడు. ఈ క్రమంలో ముగ్గురు బాలికల ఆశ్లీల చిత్రాలను చిత్రీకరించిన కారణంగా ఒక్కో కారణం చేత 30 ఏళ్ల చొప్పున మొత్తం 90 ఏళ్ల పాటు జైలు శిక్ష అనుభవించాలని జడ్జి క్రిస్టీ జాన్సన్ ఆదేశించారు. ఈ సుదీర్ఘమైన శిక్ష అతని జీవిత ఖైదుతో సమానమని భావిస్తున్నారు.

కేసు వెలుగులోకి వచ్చిన తీరు..
డిసెంబర్ 2017 నుండి ఏప్రిల్ 2018 మధ్య కాలంలో అమెరికాలోని మిస్సిస్సిప్పి పర్విస్ నగరంలో ఉన్న జిమ్నాస్టిక్స్ స్టూడియో బాత్రూమ్‌లో కోచ్ గార్డనర్ రహస్య కెమెరాను అమర్చాడు. అక్కడ విద్యార్థినులు దుస్తులు మార్చుకుంటుండగా, బాత్రూమ్ ఉపయోగిస్తుండగా దృశ్యాలను దొంగతనంగా రికార్డ్ చేశాడు.

అయోవా రాష్ట్రంలో చౌస్ జిమ్నాస్టిక్స్ అండ్ డాన్స్ ఇన్‌స్టిట్యూట్‌లో పనిచేస్తున్న సమయంలో గార్డనర్ లైంగిక వేధింపులకు పాల్పడ్డాడనే ఆరోపణలపై పోలీసులు దర్యాప్తు చేపట్టారు. ఈ విచారణలో భాగంగా అతడి కంప్యూటర్లను స్వాధీనం చేసుకోగా, కనీసం 10 మంది మైనర్ బాలికల నగ్న, దుస్తులు విప్పుతున్న వీడియోలు లభ్యమయ్యాయి.

ఈ ఆరోపణల నేపథ్యంలో గత వేసవిలో ఎఫ్‌బీఐ (FBI) గార్డనర్‌ను అరెస్ట్ చేసింది. ఒలింపిక్ ఛాంపియన్ల తయారీకి పేరుగాంచిన కోచ్ లియాంగ్ "చౌ" కియావో స్థాపించిన ఈ సంస్థలో గార్డనర్ డైరెక్టర్‌గా బాధ్యతలు నిర్వర్తించేవాడు.

క్రీడా సంస్థల నిర్లక్ష్యంపై విమర్శలు..
గార్డనర్ అక్రమ ప్రవర్తన గురించి 2017లోనే యూఎస్‌ఏ జిమ్నాస్టిక్స్, యూఎస్ సెంటర్ ఫర్ సేఫ్‌స్పోర్ట్ సంస్థలకు ఫిర్యాదులు అందినా.. వారు ఏళ్ల తరబడి ఎటువంటి చర్యలు తీసుకోలేదని బాధితుల తరఫు న్యాయవాదులు ఆరోపించారు. తీవ్ర విమర్శల నేపథ్యంలో 2022లో సేఫ్‌స్పోర్ట్ సస్పెండ్ చేయడంతో చౌస్ సంస్థ అతడిని ఉద్యోగం నుండి తొలగించింది.

సేఫ్‌స్పోర్ట్ నిబంధనల ప్రకారం తమకు సకాలంలో నివేదించడంలో ఇన్‌స్టిట్యూట్ యాజమాన్యం విఫలమైందని తేలింది. ప్రస్తుతం గార్డనర్‌తో పాటు సదరు సంస్థలపై పలు వ్యాజ్యాలు కోర్టుల్లో పెండింగ్‌లో ఉన్నాయి.